«التىن جاس» جوباسى قاراعاندىدا دا قانات قاقتى. باعدارلامانى جۇزەگە اسىرۋعا وبلىستىق بيۋدجەتتەن ارنايى قارجى ءبولىندى. قازىرگى ۋاقىتتا جەكەمەنشىك ءبىلىم بەرۋ ورتالىقتارى كوپ. زەينەتكەرلەردىڭ كوبىسى سول جەردە ساباق بەرىپ ءجۇر.
وبلىس اكىمدىگىمەن ايماقتاعى 146 ءبىلىم بەرۋ ورتالىعى وسى جوبا اياسىندا كەلىسىمشارتقا قول قويعان. ورتالىقتارعا 96 زەينەتكەر جۇمىسقا قابىلدانعان. جوبا اياسىندا جۇمىسقا ورنالاسقان زەينەتكەرلەر «2025–2027 جىلدارعا ارنالعان رەسپۋبليكالىق بيۋدجەت تۋرالى» زاڭمەن بەكىتىلگەن ەڭ تومەنگى جالاقى مولشەرىن, 85 مىڭ تەڭگە الادى. زەينەتكەر جالاقىسىنىڭ جارتىسى سۋبسيديالانسا, قالعان جارتىسى جەكە كاسىپكەردىڭ ەسەبىنەن تولەنەدى.
قاراعاندى وبلىسى بويىنشا ەڭبەك موبيلدىلىگى ورتالىعىنىڭ ديرەكتورى نۇرجان سىزدىقوۆ ورتاق كەلىسىمگە كەلگەن ءبىلىم بەرۋ ۇيىمدارىنا 641 زەينەتكەردى جۇمىسقا ورنالاستىرۋدى ويلاستىرىپ وتىرمىز دەيدى. وسى ماقساتتا جۇمىس بەرۋشى تاراپ الدىن الا مانساپ ورتالىقتارىنا ءوتىنىش بەرەدى. جوبا اياسىندا جۇمىسقا قابىلدانۋعا ەرلەر – 63 جاستان, ايەلدەر – 61 جاستان اسىپ بارىپ قانا ءوتىنىش جولداي الادى.
– «دەنساۋلىعىم جاقسى, جۇمىس ىستەۋگە شامام كەلەدى, نيەتىم بار» دەگەن زەينەتكەرلەر بولسا, ءبىزدىڭ تاراپتان قولداۋ بار. ەگەر ول كىسى باسقا سالادا قىزمەت ىستەپ زەينەتكە شىقسا, وندا كۇزەت قىزمەتىنە ورنالاستىرا الامىز. حابارلاسقان ءار زەينەتكەرگە جۇمىس ۇسىنامىز. جىل سوڭىنا دەيىن 500-گە جۋىق زەينەتكەردى جۇمىسپەن قامتىساق دەپ وتىرمىز, – دەيدى ن.سىزدىقوۆ.
«التىن جاس» جوباسى اياسىندا جۇمىس ىستەپ جاتقان زەينەتكەردىڭ ءبىرى – ءلاززات اسىلبەكوۆا. پەداگوگ قارقارالى اۋدانى, تومار اۋىلىنىڭ مەكتەبىندە 42 جىل باستاۋىش سىنىپ مۇعالىمى بولىپ ەڭبەك ەتىپ زەينەتكەرلىككە شىققان. قولى بوساپ, قالاعا قونىس اۋدارعان سوڭ ۇيگە سىيمادىم دەيدى. جوبانىڭ شاراپاتىن سەزىنگەن ۇستاز «قازساراپسەرۆيس» جشس-نا تيەسىلى ورتالىقتا جۇمىسقا قابىلدانادى. مەكتەپكە دەيىنگى دايارلىق بولىمىندە ساباق بەرەدى. ازىرگە تۇسكە دەيىن بالاعا, تۇستەن كەيىن 2-4 سىنىپ ارالىعىنداعى 8 بالاعا قوسىمشا ساباعىن وتكىزەدى.
بۇل ورتالىقتا جوبا اياسىندا جۇمىس ىستەپ جاتقان ازىرگە ءلاززات كارىبايقىزى عانا. ورتالىق باسشىسى ەكى اعىلشىن ءتىلى مەن ەكى باستاۋىش سىنىپ مۇعالىمىن جۇمىسقا الۋعا ءوتىنىش بەرىپ قويىپتى. ولاردىڭ دا جۇمىسقا ورنالاساتىن كۇنى الىس ەمەس.
داريا نۋرەكينا دا وسى جوبامەن جۇمىسقا ورنالاسقان زەينەتكەردىڭ ءبىرى. ول قاراعاندىداعى «Aisha» جشس تيەسىلى «Happy kids» ورتالىعىندا مەكتەپكە دايارلىق كۋرسىن وتكىزەدى. عۇمىر بويى ۇستازدىق قىزمەت اتقارعان. شەت اۋدانى, اقجال كەنتىندەگى مەكتەپتە 44 جىل باستاۋىش سىنىپ مۇعالىمى بولىپ ەڭبەك ەتكەن. زەينەت دەمالىسىنا 2016 جىلى شىعىپ, قالاعا قونىس اۋدارادى. ون جىلعا جۋىق ۋاقىت وتكەن سوڭ سۇيىكتى جۇمىسىمەن قايتا قاۋىشادى. جوبا جايلى الەۋمەتتىك جەلىدەن كورىپ قالعان زەينەتكەر بۇل مۇمكىندىكتى قالت جىبەرمەيدى.
– زەينەتكە شىققاننان كەيىن ءبىراز ۋاقىت دەم الدىم. قىرىق جىل عۇمىرىمدا تاقتا الدىندا تۇرعاننان بولار, ۇيدە كوپ وتىرا المادىم. بالالارىم كۇنى بويى جۇمىستا. نەمەرەلەرىم دە ساباقتا. ۇيدە ءوزىم عانا قالامىن. جۇمىس ىزدەپ كورىپ ەدىم, الەۋمەتتىك جەلىدەن «التىن جاس» جوباسى تۋرالى ءبىلدىم. تولىق اقپارات الىپ, ءوتىنىش قالدىردىم. جۇمىس ورنىم ءۇيدىڭ ىرگەسىندە. جاياۋ قاتىنايمىن. جوبانىڭ جەتەكشىلەرىنە العىستان باسقا ايتارىمىز جوق, – دەيدى د.نۋرەكينا.
قازىر داريا جامانقۇلقىزىنىڭ 10 وقۋشىسى بار. تاڭەرتەڭگى 9-دان 12-گە دەيىن مەكتەپكە دايارلىق كۋرسىن وتكىزسە, تۇستەن كەيىن 7-13 جاس ارالىعىنداعىلارعا قوسىمشا ساباق بەرەدى. وقۋ ۇلگەرىمى جاقسارعان بالالاردىڭ اتا-انالارى بىلىكتى پەداگوگكە العىس بىلدىرەدى.
«Happy kids» ورتالىعى ەكى اۋىسىممەن جۇمىس ىستەيدى. مۇندا باستاۋىش سىنىپ وقۋشىلارى مەن مەكتەپكە دايارلىق جاسىنداعى, ياعني بەستەن جەتى جاسقا دەيىنگى بالالار ءدارىس الادى.
– بۇگىندە بالالار بەس جاستا بالاباقشانى ءتامامدايدى. كوپ اتا-انا بالاسىن مەكتەپكە ەرتە بەرمەيدى. وسى ماسەلە جونىندە اتا-انالار ۇسىنىس بىلدىرگەن سوڭ كۋرستى قولعا الدىق. مۇنىمەن قوسا باستاۋىش سىنىپ وقۋشىلارىنا ارنالعان «ۇزارتىلعان كۇن توبى» باعدارلاماسى ءساتتى جۇمىس ىستەپ تۇر. اتا-انالاردىڭ وتىنىشىمەن باعدارلاماعا بالانى تاسىمالداۋ قىزمەتىن دە قوستىق. مەكتەپتەن بالانى ءوزىمىز الىپ كەلىپ, ءۇي تاپسىرماسىن بىرگە ورىندايمىز. تاماعىن دا وسى جەردە ىشەدى, – دەيدى قازاق ءتىلى مەن ادەبيەتى ءپانى مۇعالىمى ءاسيا رىشكەن.
قاراعاندى وبلىسى