سوت ۇكىمى شىقتى

ۇلتتىق قاۋىپسىزدىك كوميتەتى بەسىنشى دەپارتامەنتىنىڭ بۇرىنعى باسشىسى رۋسلان ىسقاقوۆ الاڭدا ميتينگ ۇيىمداستىرۋعا تاپسىرما بەرگەنى ءۇشىن كىنالى دەپ تانىلىپ, 15 جىل 6 ايعا سوتتالدى.

«ديكي ارمان» لاقاپ اتىمەن تانىمال ارمان جۇماگەلديەۆ 20 جىل ارقالادى. وعان بىرنەشە ايىپ قاتار تاعىلعان. سونىڭ ىشىندە ا.جۇماگەلديەۆ قاڭتار وقيعاسى كەزىندە 24 ادامدى ۇرلاپ اكەتكەنى ايتىلعان.

الماتى ءماسليحاتىنىڭ بۇرىنعى دەپۋتاتى, كاسىپكەر قايرات قۇدايبەرگەن سوت ۇكىمىمەن 8 جىلعا باس بوستاندىعىنان ايىرىلدى. ەستە بولسا, 2022 جىلدىڭ ءساۋىر ايىندا ول قاڭتار وقيعاسى كەزىندە جاپپاي تارتىپسىزدىك ۇيىمداستىرۋعا قاتىستى دەگەن كۇدىكپەن ۇستالعان ەدى.

«سوت انىقتاعانداي, 2016 جىلى ۇقك-نىڭ 5-دەپارتامەنتى باسشىسىنىڭ ورىنباسارى ىسقاقوۆ ۇلتتىق قاۋىپسىزدىك ورگان­دارىنىڭ قولداۋىنا كەپىلدىك بەرە­تىنىن ايتىپ, ا.جۇماگەلديەۆتى سەرىكتەستىككە كوندىرگەن. ۇقك ورگاندا­رىنىڭ قولداۋىنا يە بولعان ا.جۇماگەلديەۆ قازاقستان مەن شەتەلدەردەگى قىلمىستىق ىقپالىن كەڭەيتۋ ماقساتىندا قىلمىستىق ۇيىم قۇرۋعا كىرىسكەن. ول بۇرىننان تانىس, پسيحولوگيالىق تۇرعىدان تۇراقتى, قىلمىستىق قۋدالاۋدان قورىقپايتىن جانە جاقسى فيزيكالىق دايىندىعى بار ادامداردى تارتقان. ا.جۇماگەلديەۆتىڭ قىلمىستىق ۇيىمىنىڭ بارلىق مۇشەلەرى, ۇيىمداستىرۋشىلىق, فۋنكتسيونالدىق جانە اۋماقتىق نەگىزدە توپتارعا ءبولىنىپ, تىكەلەي وعان باعىنعان. 2022 جىلى قاڭتار وقيعالارى كەزىندە ق.قۇدايبەرگەن «قازاقستان» قوناقۇيىندە شتاب قۇرىپ, وعان ا.جۇماگەلديەۆتىڭ توبىن شاقىردى. وسىلايشا كورسەتىلگەن ادامدار, قارۋلى توپتىڭ جانە ولارعا قوسىلعان باسقا ادامداردىڭ ارەكەتتەرىن باسقارعان», دەلىنگەن سوت قاۋلىسىندا.

«جاپپاي تارتىپسىزدىككە قاتىستى» دەپ ايىپتالعان بلوگەر بەرداح بەكەتوۆ 7 جىلعا سوتتالدى. سوتتا اتالعان تۇلعالاردان بولەك قىرىق ادامعا ۇكىم شىقتى. سوتتالۋشىلاردىڭ تەرگەۋ اباقتىسىنا قامالعان ۋاقىتىن ەسەپتەگەندە, كەيبىرىنىڭ جازاسى وتەلگەن بولىپ ەسەپتەلدى.

الماتى