قاراعاندى وبلىسىندا ەسىرتكى جانە پسيحوتروپتىق زاتتاردى ءوندىرۋ جانە ساتۋمەن اينالىسقان ۇيىمداسقان قىلمىستىق توپقا قاتىستى سوتقا دەيىنگى تەرگەۋ امالدارى جۇرگىزىلىپ جاتىر, دەپ حابارلايدى Egemen.kz ءتىلشىسى وبلىستىق پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
ەسىرتكى قىلمىسىنا قارسى كۇرەس ءبولىمىنىڭ قىزمەتكەرلەرى جۇرگىزگەن جەدەل-ىزدەستىرۋ ءىس-شارالارى اياسىندا اسىل اۋىلىندا ەسىرتكى زەرتحاناسى جويىلدى. وقيعا ورنىنان 200 كەلىگە جۋىق ەسىرتكى زاتتارى مەن ولاردى جاساۋعا ارنالعان قۇرال-جابدىقتار تابىلدى. وپەراتسيا بارىسىندا ەرلى-زايىپتىلار – الماتى قالاسىنىڭ تۋماسى 25 جاستاعى ەر ادام مەن 29 جاستاعى ايەل ۇستالدى.
ودان ءارى جۇرگىزىلگەن ءىس-شارالار ناتيجەسىندە الماتىدا 30 جاستاعى ەسىرتكى زەرتحانالارى جەلىسىن ۇيىمداستىرۋشى تەمىرتاۋ قالاسىنىڭ تۋماسى ۇستالدى. كۇدىكتىدەن قىلمىستىق جەلى قىزمەتىن ۇيلەستىرۋ ءۇشىن پايدالانىلعان نوۋتبۋك, تارازى, كۇندەلىك جانە 21 ۇيالى تەلەفون سياقتى ايعاق زاتتار الىندى.
تەرگەۋ ناتيجەسىندە ۇستالعان ازاماتتىڭ قاراعاندى جانە الماتى وبلىستارىندا ورنالاسقان بەس ەسىرتكى زەرتحاناسىن ۇيىمداستىرۋعا قاتىسى بار ەكەنى انىقتالدى.
- قىلمىستىق ارەكەتكە قاتىسى بار بارلىعى بەس ادام ۇستالدى. ۇيىمداسقان قىلمىستىق توپتىڭ بارلىق مۇشەلەرىن انىقتاۋ جانە ولاردىڭ زاڭسىز ارەكەتتەرىن توقتاتۋ بويىنشا جەدەل-ىزدەستىرۋ شارالارى جالعاسىپ جاتىر, - دەلىنگەن حابارلامادا.