2026 جىلى وزبەكستان تۇركى مەملەكەتتەرى ۇيىمىنا مۇشە ەلدەرمەن بىرلەسىپ, عارىشقا جەر سەرىگىن ۇشىرماق. بۇل تۋرالى «وزبەكعارىشتىڭ» اەروعارىشتىق قىزمەت جانە عارىش مونيتورينگى جۇيەلەرىن دامىتۋ ءبولىمىنىڭ باستىعى مۋحيددين يبراگيموۆ مالىمدەدى, دەپ حابارلايدى Egemen.kz.
ونىڭ ايتۋىنشا, تۇركى مەملەكەتتەرى ۇيىمىنا مۇشە ەلدەرمەن بىرلەسكەن زەرتتەۋ جوباسى قولعا الىنعان. سپۋتنيكتى قۇراستىرۋعا سايكەس ناقتى جوسپار بەكىتىلگەن. الايدا «وزبەكعارىش» وتاندىق سپۋتنيك دايىنداۋعا ازىرگە اسىقپايدى. وعان قوماقتى قارجى قاجەت. بۇگىندە الەمدەگى عارىش سالاسىندا قارجى اينالىمى 500 ملرد دوللارعا جەتكەن. الداعى ون جىلدا كورسەتكىش 2 ترلن اقش دوللارىنان اسۋى عاجاپ ەمەس.
«بۇگىندە وزبەكستان 600 مىڭنان 1 ملن شارشى شاقىرىمعا دەيىنگى اۋماقتى قامتيتىن سپۋتنيك سۋرەتتەرىن ءوزى وڭدەي الادى. قازىر ءبىز جەردى قاشىقتان زوندتاۋمەن اينالىساتىن جەرسەرىكتەردى ىسكە قوسۋدى جوسپارلاپ وتىرمىز. ول ءۇشىن ءتيىستى ۇسىنىستار ازىرلەپ جاتىرمىز جانە بىرنەشە ەلمەن كەلىسسوز باستادىق. ەسكە سالايىق, بىلتىر وزبەكستان عارىش كەڭىستىگىن زەرتتەۋگە باعىتتالعان حالىقارالىق شارتقا قوسىلعان ەدى. بۇل سالادا قازاقستان مەن وزبەكستان سەرىكتەستىكتى نىعايتۋعا نيەتتى», دەيدى «وزبەكعارىش» اەروعارىشتىق قىزمەت جانە عارىش مونيتورينگى جۇيەلەرىن دامىتۋ ءبولىمىنىڭ باستىعى مۋحيددين يبراگيموۆ.