حالىق ءارتىسى, مەملەكەتتىك سىيلىقتىڭ لاۋرەاتى, سوتسياليستىك ەڭبەك ەرى بيبىگۇل تولەگەنوۆانى قاراعاندىلىقتار الاقانىنا سالدى. 95 جاستاعى اڭىز ءانشىنىڭ داۋىسىن ساعىنسا كەرەك, كەنشىلەر مادەنيەت سارايىندا ينەشانشار ورىن بولمادى.
كونتسەرتتە ءان ونەرىنىڭ ساڭلاقتارى ونەر كورسەتتى. قازاقستاننىڭ ەڭبەك سىڭىرگەن قايراتكەرى, وپەرا ءانشىسى تولقىن زابيروۆا دا ارنايى كەلىپ, ەل الدىندا بيبىگۇل تولەگەنوۆا اۋەلەتكەن ايگىلى «گاۋھارتاستى», لاتيف ءحاميديدىڭ «بۇلب ۇلىن» تاتتىمبەت اتىنداعى حالىق اسپاپتارى اكادەميالىق وركەسترىنىڭ سۇيەمەلدەۋىمەن شىرقادى. ول ءانىن اۋەلەتىپ بولعان سوڭ, «قارلىعاش كومەي قۇربىم-اۋ, ءبىر بۇراۋ ەمەس, مىڭ بۇراۋ. قاي كۇنى, قانداي انادان, باعىنا ەلدىڭ تۋدىڭ-اۋ؟», دەپ باستالاتىن مۇزبالاق مۇقاعاليدىڭ بيبىگۇل تولەگەنوۆاعا ارناعان ولەڭىن وقىپ بەردى. كەش يەسىن مەرەيتويىمەن قۇتتىقتاپ, ء«ان ونەرىندەگى ۇستازىم, انام» دەپ قۇشاعىنا باستى.
قازاقستاننىڭ ەڭبەك سىڭىرگەن قايراتكەرى تالعات ىدىرىسوۆ باستاعان جەرگىلىكتى ونەرپازدار ەسكەندىر حاسانعاليەۆتىڭ «اناعا سالەم» ءانىن ورىندادى. ارقانىڭ ماقتانىشى, تالانتتى ءانشى رىستى راقىمجان ەۆگەني برۋسيلوۆسكيدىڭ «قوس قارلىعاشىن», نۇرعيسا تىلەنديەۆتىڭ «كەل, ەركەم, الاتاۋىما!» ءانىن وركەستر سۇيەمەلدەۋىمەن اسقاقتاتتى. كەشتە كىلەڭ كلاسسيكالىق اندەر شىرقالدى. ونەر كورسەتكەن تالانتتار ساحناعا شىعىپ, بۇلبۇل بيبىگۇلدىڭ باتاسىن العانداي اسەر قالدىردى.
كونتسەرت سوڭىنا تامان بيبىگۇل تولەگەنوۆا ساحناعا كوتەرىلدى. وبلىس اكىمى ەرماعانبەت بولەكپاەۆ كەش قوناعىنىڭ يىعىنا قۇندىز جاعالى كامزول جاۋىپ, ىقىلاس گ ۇلىن سىيلادى.
– ءسىزدىڭ شىعارماشىلىعىڭىز قاراعاندى وڭىرىمەن تىعىز بايلانىستى. 2007 جىلى قاراعاندى قالاسىندا العاش رەت «جۇلدىزدار اللەياسى» اشىلىپ, ۇلكەن شىعارماشىلىق كەشىڭىز ءوتتى. سول جىلى «قاراعاندى – بالالىق شاعىمنىڭ كۋاسى» اتتى رەترو فەستيۆالىنىڭ تۇساۋىن دا كەسكەن ەدىڭىز. 2016 جىلى قازاقتان شىققان تۇڭعىش عارىشكەر, حالىق قاھارمانى توقتار اۋباكىروۆتىڭ 70 جىلدىق مەرەيتويىنا وراي استانا, قاراعاندى قالالارىندا, قارقارالى اۋدانىندا جەرلەسىمىزدىڭ مەرەيىن اسقاقتاتىپ كونتسەرت وتكىزدىڭىز. ءسىزدى 95 جىلدىق مەرەيتويىڭىزبەن شىن جۇرەكتەن قۇتتىقتايمىن! بايتاق دالامىزدى بۇلبۇل ۇنىڭىزبەن تەربەپ, عاسىرعا جۋىق ۋاقىت بويى ساحنادا ونەر كورسەتىپ كەلە جاتقان دارا تۇلعاسىز. تۋعان جەرىڭىز سەمەيدەن باستالعان مەرەيتويىڭىز استانا, الماتى قالالارىندا ءوتىپ, قاراعاندى قالاسىندا جالعاسقانى ءبىز ءۇشىن زور مارتەبە! – دەدى ايماق باسشىسى.
بيبىگۇل تولەگەنوۆا دا قاراعاندىلىقتارعا باسىن ءيىپ, جىلى لەبىزىن ءبىلدىردى.
«95 جاسقا كەلگەندە قازاقستاندى شارلاۋ وڭاي ەمەس ەكەن. بىراق مەن ساحنانىڭ ادامىمىن. ساحنا – ءومىرىمنىڭ ءمانى. ءدال قازىر وسى ساحنادا جانىم جادىراپ وتىر. قاراعاندىنى ەرەكشە جاقسى كورەمىن! مۇندا شاحتاعا دا تۇسكەنمىن, قويشىلاردىڭ اراسىنا دا بارىپ ءان شىرقاعانمىن. ارقاداعى ءسىڭلىم رىمبالا وماربەكوۆا ەكەۋمىز ءبىراز جەردى شارلادىق. بارشاڭىزعا باس ءيىپ العىس بىلدىرەمىن, دەدى ءانشى.
«سىرلى اياقتىڭ سىرى كەتسە دە, سىنى كەتپەيتىنى» راس-تى. عاجاپ تەبىرەنىستەن سوڭ بيبىگۇل تولەگەنوۆا الەكساندر زاتسەپيننىڭ «پەسنيا و ۆەسنە» ءانىن شىرقاعاندا حالىق دەمىن ىشىنە تارتتى. وسى ءبىر عالامات ءساتتى تىڭدارمان ۇزاق كۇتكەن ەدى. ءانشىنىڭ ءوزى دە ارقا دالاسىندا ءان سالعاندى اڭساپ كەلگەندەي. بۇلبۇل ۇنىنەن بۇلتارماس ىرعاقتى, بۇلجىماس اۋەزدى سەزىنگەن جۇرت تىك تۇرىپ, قوشەمەت قىلدى.
قاراعاندى وبلىسى