قاڭتار وقيعاسى كەزىندە ادامداردى ازاپتاعان پوليتسەيلەر سوتتالدى

جابىرلەنگەن 44 ادامنىڭ اراسىندا 2022 جىلدىڭ قاڭتارىندا پوليتسيا باسقارماسىنا جەتكىزىلگەن شەتەل ازاماتتارى دا بولعان.

«سوتتالۋشىلار وزدەرىنىڭ لاۋازىمدىق وكىلەتتىكتەرىن پايدالانا وتىرىپ, زاڭعا قايشى ارەكەتتەر جاسادى, ناتيجەسىندە زارداپ شەككەندەر ازاپتالدى. سوت ۇكىمىمەن 6 پوليتسيا قىزمەتكەرى 146-باپتىڭ 1-بولىگىندە (2023 جىلعى 17 ناۋرىزعا دەيىن رەداكتسيادا) جانە قك-ءنىڭ 362-بابىنىڭ 1-بولىگىندە كوزدەلگەن قىلمىس جاساعانى ءۇشىن كىنالى دەپ تانىلدى, قىلمىستىق قۇقىق بۇزۋشىلىقتاردىڭ جيىنتىعى بويىنشا قك-ءنىڭ 58-بابىنىڭ 2-بولىگىنە سايكەس ارقايسىسىنا 3 جىل مەرزىمگە باس بوستاندىعىنان ايىرۋ جازاسى تاعايىندالدى», دەلىنگەن قاراساي اۋداندىق سوتىنىڭ ءباسپاسوز قىزمەتى تاراتقان حابارلامادا.

سوتتالۋشىلاردىڭ كىناسى كۋاگەرلەردىڭ ايعاقتارى, ساراپتامالاردىڭ قورىتىندىلارى, سوتتا راستالعان جانە زەرتتەلگەن باسقا دا ايعاقتارمەن تولىق دالەلدەنگەن.

ۇكىم زاڭدى كۇشىنە ەنگەن جوق.