كاليفورنياداعى ءورت سەيىلمەي تۇر

ۆۆس تاراتقان مالىمەتكە سۇيەنسەك, 7 قاڭتاردا باستال­عان لوس-اندجەلەستەگى ورتتەن 180 مىڭ­عا جۋىق ادام ەۆاكۋاتسيا­لان­عان, شامامەن 10 مىڭ عيمارات قىزىل جالىنعا ورانعان. لوس-اندجەلەس وكرۋگىنىڭ پاتولوگواناتوم دارىگەرى 24 ادام ءورتتىڭ قۇربانى بولعانىن مالىمدەدى. 16 ادام يتون اۋدانىندا, تاعى 8-ءى پاليسەيدس اۋدانىندا تابىلعان. ءورت 3 اۋداندا – پاسيفيك-پاليسەيدس (شامامەن 96 شارشى شاقىرىمدى قامتيدى), يتون (شامامەن 57 شارشى كم) جانە حەرست اۋدانىندا (شامامەن 3,2 شارشى كم, باقىلاۋعا الىندى) ورىن العان. جۇما كۇنى لوس-اندجەلەستەگى قاتتى جەل ازداپ باسىلىپ, ءورت سوندىرۋشىلەر ءبىرشاما جەردى اۋىزدىقتاعان. الايدا جەل قايتا كۇشەيگەن. سينوپتيكتەردىڭ بولجامىنشا, جەكسەنبى كۇنى باستالعان «سانتا-انا» جەلى سارسەنبىگە دەيىن جالعاسىپ, جىلدامدىعى ساعاتىنا 96 كم-گە جەتۋى مۇمكىن. سونداي-اق اقش اۋا رايى قىزمەتىنىڭ مالىمەتى بويىنشا, ەڭ قاتتى جەل سەيسەنبىدە, ياعني بۇگىن بولادى دەپ كۇتىلىپ وتىر. پاسادەنا ءورت ءسوندىرۋ ءبولىمىنىڭ باستىعى چەد وگاستين: «وكىنىشتىسى, جەكسەنبىدەن باستاپ سارسەنبىگە دەيىن «قىزىل جالاۋ» رەجىمىنە ورالامىز. جەل ەكپىنى سەيسەنبىدە كۇشەيگەلى تۇر. ءبىز ءبىراز جەردە ءورتتى سوندىردىك, الايدا كۇرەس ءالى بىتكەن جوق», دەدى ۆۆس-گە بەرگەن مالىمدەمەسىندە. ال كاليفورنيا ءورت ءسوندىرۋ ءبولى­مىنىڭ وكىلى تودد حوپكينس جەك­سەنبىدە پاليسەيدستەگى ءورت شامامەن 90 شارشى شاقىرىم اۋماق­تى جويىپ, برەنتۆۋد اۋدانىنا تارالۋ قاۋپى بار دەپ مالىم­دە­دى. وندا كوپتەگەن گولليۆۋد جۇلدىز­دارى­نىڭ, سونىڭ ىشىندە ارنولد شۆارتسەنەگگەردىڭ جانە ريز ۋيزەرسپۋننىڭ ۇيلەرى ورنالاسقان. سونىمەن قاتار برەنتۆۋدتا گەتتي كورمە ورتا­لىعى ورنالاسقان, وندا باعا جەتپەس ونەر تۋىندىلارى, سونىڭ ىشىندە رەمبراندت پەن ۆان گوگتىڭ سۋ­رەت­تەرى بار. ءورت شامامەن 1,8 ميل­­­ليون ادام تۇراتىن سان-فەر­نان­­دو القابىنا دا تارالۋى مۇمكىن.

لوس-اندجەلەس شەريفى رو­بەرت لۋنا جەكسەنبىدە قالا­نىڭ 105 مىڭ تۇرعىنىنا ەۆاكۋا­تسيا­لاۋ­عا نۇسقاۋ بەرىلگەنىن, تاعى 87 مىڭعا ەۆاكۋاتسيالاۋ تۋرالى بۇيرىق بەرىلگەنىن حابارلادى. ايتا كەتەيىك, اقش-تىڭ كاليفورنيا شتاتىندا 73 وتانداسىمىز ءبىلىم الىپ جاتىر, ونىڭ ىشىندە «بولاشاق» باعدارلاماسىمەن 56 ستۋدەنت جانە «عىلىمي تاعىلىمداما» باعدارلاماسىمەن 17 ادام وقيدى. ولاردىڭ بارلىعى قاۋىپسىز جانە كۋراتورلارمەن بايلانىستا. «حالىقارالىق باعدارلامالار ورتالىعى» اق جاعدايدى مۇقيات قاداعالاپ وتىرعانىن حابارلادى. «ستيپەندياتتار جەرگىلىكتى بيلىكتىڭ نۇسقاۋلارىن ورىنداپ, بىزگە جاعداي تۋرالى جەدەل حابارلايدى. ءبىز ۋنيۆەرسيتەتتەرمەن تۇراقتى بايلانىستا وتىرمىز جانە كەز كەلگەن جاعدايدا جاۋاپ بەرۋگە دايىنبىز», دەپ مالىمدەدى «حالىقارالىق باعدارلامالار ورتالىعى» قىزمەتكەرلەرى.

سونداي-اق كاليفورنيادا 2,5 جىلدان بەرى تۇرىپ جاتقان وتانداسىمىز جاسۇلان سەرىك «لوس-اندجەلەس قالاسىنىڭ وزىندە ءورت بولعان جوق. تەك شەتكى ايماقتارىنداعى ورمان مەن تاۋعا جاقىن قالالارىندا ورىن الدى», دەپ جازدى Facebook پاراق­شاسىندا. ونىڭ مالىمەتىن­شە, جالپى لوس-اندجەلەس وكرۋگىندە 10 ميلليون حالىق تۇرادى.

«جەلىدە جاساندى ينتەللەكت­تىڭ جالعان ۆيدەولارى كوپتەپ ءجۇر. سونىڭ ءبىرىن ايتا كەتەيىن: گولليۆۋد جازۋى جانىندا ءورت بولعان جوق. ءورت سەبەپتەرى: ادام­دار­دىڭ تابيعاتتا بايقاماي ورتەپ الۋى, ادەيى ورتەۋگە ارەكەت جاساعان ادامدار دا ۇستالعان, سانتا-انا جەلىنىڭ سايكەس كەلۋى (بىزشە بەسقوناق جەلى), كۇننىڭ ىستىق (قۇرعاق) بولۋى, ءورت ءسوندىرۋ ينفراقۇرىلىمى بيۋدجەتىنىڭ ازايۋى. ءورت باسقارۋعا كەلگەندەي, بىراق ءورت سوندىرۋشىلەر ءالى تولىق توقتاتا المادى. قۋانىشتىسى, ءورتتى ەلدى مەكەندەردەن الىستاتتى», دەپ ءتۇسىندىردى ول.

ال سىرتقى ىستەر مينيستر­لىگىنىڭ رەسمي وكىلى ايبەك سمادياروۆ: «ول جاقتاعى قازاق­ستان ازاماتتارى بىزگە كومەك سۇراپ حابارلاسقان جوق. جالپى, سول جەرگىلىكتى حالىق ەۆاكۋاتسيا جاساعاندا بارلىعى بىرگە كوشىرىلەدى», دەپ پىكىر ءبىلدىردى.