ب.بەيسەنوۆ اتىنداعى قر ءىىم قاراعاندى اكادەمياسىنىڭ سپورت سارايىندا ەلىمىزدىڭ ەڭبەك سىڭىرگەن جاتتىقتىرۋشىسى, قۇرمەتتى سپورت قىزمەتكەرى, حالىقارالىق دارەجەدەگى تورەشى سابەن الكەەۆتىڭ 80 جاسقا تولۋىنا ارنالعان قويان-قولتىق جەكپە-جەك تۇرىنەن اشىق تۋرنير ءوتتى. بايراقتى باسەكەنىڭ بوزكىلەمىندە وبلىستاعى 200-گە جۋىق ءجاسوسپىرىم باق سىناستى.
سابەن باپكەر گەننادي گولوۆكين, سەرىك ەلەۋوۆ سىندى ەل بايراعىن بيىكتەن جەلبىرەتكەن سپورتشىلاردى باپتادى. ءتۋرنيردىڭ سالتاناتتى اشىلۋ راسىمىندە قۇرمەتتى مەيماندار س.الكەەۆتىڭ سپورتقا سىڭىرگەن ەڭبەگى جونىندە ەستەلىك ايتىپ, جارىسقا قاتىسۋشىلارعا ساتتىلىك, جەڭىس تىلەدى.
س.الكەەۆ قاراعاندى وبلىسىندا دۇنيەگە كەلدى. سپورتتىق مەكەمەلەردەگى ەڭبەك ءوتىلى جارتى عاسىردان ەركىن اسادى. ينستيتۋت بىتىرگەننەن سوڭ, ەڭبەك جولىن اۋىلداعى دەنەشىنىقتىرۋ ءپانىنىڭ مۇعالىمى رەتىندە باستايدى. ودان سوڭ تسەلينوگراد قالاسىندا كووپەراتيۆتىك تەحنيكۋمدا, پەداگوگيكالىق ۋچيليششەدە جۇمىس ىستەدى. اۋداندىق سپورتتىق مەكەمەلەردە دە ءبىرتالاي ەڭبەك ەتتى. 1980–1987 جىلدارى «ەڭبەك» كەشەندى بالالار مەن جاسوسپىرىمدەر سپورت مەكتەبىندە باسشىنىڭ ورىنباسارى قىزمەتىن اتقاردى. 1987–1994 جىلدارى سپورت مەكتەبىندە ديرەكتور, 1994–2008 جىلدارى قاراعاندى وبلىسىنىڭ دەنە شىنىقتىرۋ جانە سپورت باسقارماسىنىڭ مامانداندىرىلعان بالالار مەن جاسوسپىرىمدەر سپورت مەكتەبىنىڭ ديرەكتورى بولدى.
ول باسقارعان جىلدارى وڭىردە كيكبوكسينگ, تاەكۆوندو WTF, قويان-قولتىق ۇرىس, تاەكۆوندو يتف (I.T.F), كاراتە WKF بولىمدەرى اشىلدى. مەكتەپكە اتاقتى جاتتىقتىرۋشىلار مەن تاربيەلەنۋشىلەر كەلدى. 1994–2001 جىلدارى وقىتۋ-جاتتىقتىرۋ ساباقتارى جالعا العان بازالاردا وتكىزىلەتىن. س.الكەەۆتىڭ ىسكەرلىگى ارقاسىندا 2001 جىلدىڭ اقپان ايىندا مەكتەپكە جەدەل باسقارۋ قۇقىعىندا «وربيتا-1» شاعىن اۋدانىنداعى, اۋماعى 1400 شارشى مەتر بوس تۇرعان بالاباقشا عيماراتى بەرىلدى. عيمارات قايتا قالپىنا كەلتىرىلىپ, مۇندا تاەكۆوندو, كيكبوكسينگ, قويان-قولتىق ۇرىس, كاراتە بولىمدەرىنىڭ بالالارى جاتتىعاتىن بولدى. سول جىلى ونىڭ باسشىلىعىمەن مەكتەپ قىزمەتكەرلەرىنىڭ كۇشىمەن قۇجاتتارى جوق, بۇزىلعان كۇيدە العان «بريگانتينا» لاگەرىندە جوندەۋ جۇمىسىن جۇرگىزىپ, قالپىنا كەلتىردى. 2004 جىلى اتاۋى «جالىن» مەكتەبى بولىپ وزگەرتىلدى. لاگەردە 2001 جىلدان بەرى از قامتىلعان وتباسىلاردىڭ بالالارى دەمالادى, سپورتتىق-ساۋىقتىرۋ جيىندارى وتكىزىلەدى.
بىلىكتى باپكەر ۇلتتىق, حالىقارالىق سپورتتىڭ دامۋىنا زور ۇلەسىن قوستى. شاكىرتتەرى الەم, ازيا چەمپيوناتتارى, حالىقارالىق جارىستاردا جاقسى ناتيجەلەرگە قول جەتكىزگەنى ءۇشىن وعان «ەڭبەك سىڭىرگەن جاتتىقتىرۋشى» اتاعى بەرىلدى. «دەنە شىنىقتىرۋ جانە سپورتتىڭ دامۋىنا ۇلكەن ۇلەس قوسقانى ءۇشىن» قۇرمەت بەلگىسىمەن ماراپاتتالدى. مىنە, وسىنداي بىلىكتى باپكەر, سپورتتىڭ شىن جاناشىرىنىڭ ەسىمى ارداقتالدى. تۋرنيردە توپ جارعان جەڭىمپازدار ارنايى جۇلدەلەرگە يە بولدى.
قاراعاندى وبلىسى