قازاقستاننىڭ پاكىستانداعى ەلشىلىگى بەلگىلى ونەر قايراتكەرى, پاكىستاننىڭ ۇلتتىق مۇرا جانە مادەنيەت جونىندەگى بۇرىنعى ءمينيسترى دجامال شاح ۇيىمداستىرعان «جىبەك جولى» مادەنيەت ورتالىعىنىڭ سالتاناتتى اشىلۋ راسىمىنە قاتىستى.
اتالعان ءىس-شارا ازەربايجان, يران, قىتاي, رەسەي, تۇرىكمەنستان, وزبەكستان ەلشىلىكتەرىمەن بىرلەسىپ ۇيىمداستىرىلدى.
القالى جيىن بارىسىندا قازاقستان ەلشىسى ەرجان قىستافين قۇتتىقتاۋ ءسوز سويلەپ, ءوڭىر ەلدەرى اراسىنداعى قارىم-قاتىناستى نىعايتۋدا مادەني ىنتىماقتاستىقتىڭ ەرەكشە ماڭىزدىلىعىن اتاپ ءوتتى. سونىمەن قاتار ول قازاقستان مەن پاكىستان اراسىنداعى مادەني بايلانىستاردى دامىتىپ, نىعايتۋ جونىندەگى جوسپارلارعا توقتالدى.
ەلشى ءوز سوزىندە «جىبەك جولى» مادەنيەت ورتالىعىنىڭ اشىلۋى ءوڭىر مەملەكەتتەرى اراسىنداعى مادەني جانە ديپلوماتيالىق قاتىناستاردى كۇشەيتۋدىڭ ماڭىزدى قادامى بولعانىن اتاپ ءوتىپ, ەلىمىزدىڭ بۇل باستامانى تولىعىمەن قولدايتىنىن مالىمدەدى.
ءىس-شارا بارىسىندا ۇيىمداستىرىلعان كورمەدە كەلۋشىلەر قازاقستان حالقىنىڭ باي مادەني مۇراسى, اسەم تابيعاتى, سالت-داستۇرلەرى مەن ادەت-عۇرىپتارى بەينەلەنگەن كارتينالار, كىتاپتار جانە فوتوسۋرەتتەرمەن تانىستى.