عيماراتتار قابىرعاسىنا ەسىرتكى ساۋداسىن جارنامالايتىن جازبا قالدىرۋشىلار ايىلىن جيار ەمەس. ناشاقورلىقتى ناسيحاتتاپ, ەسىرتكىنىڭ ەتەك جايۋىنا ەكپىن بەرەتىن مۇنداي گراففيتيلەردى قالانىڭ كەز كەلگەن نۇكتەسىنەن كەزدەستىرەسىز.
ەسىرتكىگە ەسى كەتكەندەردى تىيىم سالىنعان سايتتارعا شاقىراتىن زاڭسىز جارناما تاراتۋمەن اينالىسقاندار قر قك-ءنىڭ 299-1-بابىنا سايكەس, قىلمىستىق جاۋاپكەرشىلىككە تارتىلادى. جىمىسقى ارەكەتىن جۇزەگە اسىرۋدىڭ ءتۇرلى جولىن مەڭگەرگەن ايلاكەرلەر مۇنداي لاس ىسكە جاستاردى تارتاتىن بولعان. وكىنىشكە قاراي, وڭ-سولىن تانىماعان جاستار وڭاي ولجاعا كەنەلەم دەپ وپىق جەپ جاتادى. ولاردى مۇنداي كەلەڭسىزدىكتەن ساقتاندىرۋ ماقساتىندا ءتيىستى ورىندار تاراپىنان ۇگىت-ناسيحات جۇمىستارى جۇرگىزىلىپ جاتىر. ال جىمىسقى جازبالارمەن كۇرەس ماسەلەسى – جىل ون ەكى اي توقتامايتىن شارۋالاردىڭ تىزىمىندە.
الماتى قالاسى جاستار ساياساتى باسقارماسى مەن پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى قالا عيماراتتارىنا جازىلعان ەسىرتكى جارنامالارىن جويۋعا باعىتتالعان كەزەكتى «ناركوستوپ» اكتسياسىن وتكىزدى. قۇزىرلى ورىن قىزمەتكەرلەرىنە ەرىكتى جاستار كومەككە كەلگەن. اتاپ ايتقاندا, اكتسياعا 500-گە جۋىق ۆولونتەرلەر, ستۋدەنتتەر جانە كوميۋنيتي ورتالىقتاردىڭ رەزيدەنتتەرى قاتىستى. ولار الماتى قالاسىنىڭ پوليتسيا دەپارتامەنتىنىڭ قىزمەتكەرلەرىمەن بىرگە ەسىرتكى جارنامالارىنىڭ ورىندارىن انىقتاپ, ولاردىڭ زاڭسىز جازبالارىن ءوشىردى. رەيد بارىسىندا ءبىر كۇننىڭ ىشىندە عيماراتتاردىڭ سىرتقى قابىرعاسىنا جازىلعان 100-دەن اسا جارناما انىقتالىپ, جويىلعان.
«زامانداستارىما ەسىرتكىنىڭ زيان ەكەنىن تۇسىندىرە وتىرىپ, سالاماتتى ءومىردى تاڭداۋعا شاقىرۋدى ازاماتتىق مىندەتىم دەپ سانايمىن. بۇگىن الماتى قالاسىنىڭ ۆولونتەرلەرى جاستار ءۇشىن ماڭىزدى «ناركوستوپ» اكتسياسىنا قاتىسۋعا كەلدىك. الماتى – ءبىزدىڭ ورتاق ءۇيىمىز, سوندىقتان ءىس-شارا اياسىندا زاڭسىز جارنامالاردى ءوشىرىپ, ولاردىڭ ءارى قاراي تارالماۋىنا از دا بولسا ءوز ۇلەسىمىزدى قوسىپ جاتىرمىز», دەيدى ۆولونتەر امانعازى نۇراسىل.
ەسىرتكى قىلمىسىنا قارسى ءىس-قيمىل باسقارماسىنداعىلاردىڭ ايتۋىنشا, جىل باسىنان بەرى «ناركوستوپ» جوباسىنا قالا بويىنشا 3 مىڭنان اسا ۆولونتەر قاتىسقان. جوبا اياسىندا 60-تان اسا ءىس-شارا ءوتىپ, 2 مىڭ ترافارەت پەن گراففيتي وشىرىلگەن. سونىمەن قاتار قالاداعى كوميۋنيتي ورتالىقتاردا ناشاقورلىققا قارسى مادەنيەتتى قالىپتاستىرۋعا جانە ەسىرتكى اينالىمىنا قارسى قوعامدىق كۇرەسكە باعىتتالعان تۇسىندىرمە جۇمىستارى, ينتەللەكتۋالدىق ويىندار, دەباتتار, ۆيكتورينالار مەن كۋيزدەر جۇيەلى تۇردە ءوتىپ كەلەدى.
قالادا ناشاقورلىققا قارسى كۇرەس اياسىندا جەرگىلىكتى اتقارۋشى ورگاندار, قۇقىق قورعاۋ ۆەدومستۆوسىنىڭ وكىلدەرى, قوعام بەلسەندىلەرى مەن ەرىكتىلەر بىرلەسىپ جاز بەن كۇز ايلارىندا 3 مىڭ ادامدى قامتيتىن 23 ءىس-شارا ۇيىمداستىرعان. سولاردىڭ ءبىرى – جاسوسپىرىمدەردىڭ اتا-انالارى مەن تۇركسىب اۋدانىنىڭ يۋۆەنالدى پوليتسيا ينسپەكتورلارى ءۇشىن «كەپىلگەرلەرمەن كەزدەسكەن جاعدايدا قاۋىپسىزدىك شارالارى» تاقىرىبىندا وتكەن شەبەرلىك ساباعى. سونداي-اق قالانىڭ مەدەۋ, اۋەزوۆ, جەتىسۋ اۋداندارى اۋماعىندا دا الماتى قالاسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىمەن بىرلەسىپ ەسىرتكى قۇرالدارىن تاراتۋمەن اينالىساتىن سايتتاردىڭ سىرتقى جارناماسىنىڭ گراففيتيىن انىقتاۋعا باعىتتالعان اكتسياعا قاتىسۋعا زەينەتكەرلەر دە نيەت بىلدىرگەن.
«وتكەن جىلى جۇرگىزگەن ساۋالناما ناتيجەسىندە جاستاردىڭ 10%-ى ومىرىندە ءبىر رەت بولسا دا سينتەتيكالىق ەسىرتكى قابىلداعانى انىقتالعان ەدى. سينتەتيكالىق ەسىرتكىنى پايدالانۋشىلار الەۋمەتتىك توپتارعا بولىنبەيدى. ال جالپى بۇل – الەمدىك دەڭگەيدەگى قاۋىپتى ءۇردىس. ءبىز ەسىرتكى قىلمىسىمەن قوعام بولىپ كۇرەسۋىمىز كەرەك», دەيدى الماتى قالالىق جاستار ساياساتى باسقارماسىنىڭ وكىلدەرى.
الماتى قالاسىنداعى پسيحيكالىق دەنساۋلىق ورتالىعىنىڭ دەرەكتەرىنە سۇيەنسەك, 2024 جىلدىڭ شىلدە ايىندا «ناشاقورلىق» دياگنوزىمەن ديسپانسەرلىك ەسەپتە 1 154 ادام تىركەلگەن. ونىڭ 180-ءى ايەل ادام بولسا, جەتەۋى – كامەلەت جاسىنا تولماعاندار. مامانداردىڭ ايتۋىنشا, ەسىرتكىگە شاتىلعانداردىڭ سانى رەسمي ستاتيستيكادان الدەقايدا كوپ. ال ولاردىڭ قالىپتى ومىرگە قايتا قادام باسۋىنا قوعام بولىپ قولداۋ كورسەتۋدىڭ ماڭىزى زور.
الماتى