استانادا «Dyson» قويماسىنىڭ اتىن جامىلعان ەسىرتكىنىڭ ءىرى پارتياسى انىقتالدى, دەپ حابارلايدى Egemen.kz.
ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى تۇرمىستىق تەحنيكا ساتامىن دەگەن جەلەۋمەن قويمانى جالعا الىپ, بىراق ونى اسا ءىرى كولەمدەگى ەسىرتكى زاتتارىن ساقتاۋ ءۇشىن پايدالانعان 35 جاستاعى ازاماتتى انىقتاپ, ۇستاعان.
«ۇستالعان ادامنىڭ كولىگىندە جەدەل ۋاكىلدەر ۇنتاق زاتى بار 11 كونۆوليۋتسيانى تاپتى. پاتەردى ءتىنتۋ كەزىندە مەتكاتينون, سينتەتيكالىق ەسىرتكى, كاننابيس شايىرى, سونداي-اق ساتۋعا دايىن 357 بەتبەلگى سياقتى تىيىم سالىنعان زاتتار تاركىلەندى. پوليتسەيلەر زاڭسىز اينالىمنان جەتى كيلوگرامنان استام ەسىرتكى تاركىلەدى. وسىلايشا, ەسىرتكىنىڭ 35 مىڭ دوزاسى زاڭسىز اينالىمعا جىبەرىلمەدى», دەپ حابارلادى استانا پد ءباسپاسوز قىزمەتى.
سونىمەن قاتار, ەسىرتكى ساتاتىن ينتەرنەت-دۇكەننىڭ جارناماسى بار پلاستيكالىق كارتالار تابىلعانى حابارلاندى.
تاركىلەنگەن تىيىم سالىنعان زاتتار الەۋمەتتىك جەلىلەر ارقىلى تاراتۋعا ارنالعانى انىقتالعان.
«كۇدىكتى ءوزىنىڭ Dyson ينتەرنەت-دۇكەنىنىڭ «قويما» قىزمەتىن اتقارعانىن مويىندادى, بۇل فاكتى بويىنشا سوتقا دەيىنگى تەرگەۋ جۇرگىزىلىپ, ەر ادام ۋاقىتشا ۇستاۋ يزولياتورىنا قامالدى», دەلىنگەن حابارلامادا.