سوت سولتۇستىك قازاقستان وبلىسىنىڭ بۇرىنعى اكىمى سامات ەسكەندىروۆتى الداپ-ارباۋ ارقىلى ۇلەسكەرلەردىڭ جەرلەرىن ساتىپ جىبەرگەنى ءۇشىن شارتتى تۇردە 5 جىلعا باس بوستاندىعىنان ايىردى, دەپ حابارلايدى Egemen.kz.
ءىس ماتەريالدارىنا سايكەس, ەسكەندىروۆ جانە باسقا تۇلعا نەسيە الۋ ماقساتىندا جشس قاتىسۋشىلارىنىڭ كەلىسىمىنسىز جالعان جينالىس حاتتامالارىن دايىنداپ, كەپىلگە بۋراباي اۋدانى تۇرعىندارىنىڭ جەر تەلىمدەرىن بەرگەن.
سالدارىنان ەسكەندىروۆ ءبىر توپ اداممەن الدىن الا ءسوز بايلاسۋ ارقىلى اۋىل تۇرعىندارىنىڭ شارتتى جەر ۇلەستەرىنە قۇقىقتى يەمدەنىپ, جەر ۋچاسكەسىنە قۇقىقتاردى كەپىلگە قويۋ جانە يەلىكتەن ايىرۋ ارقىلى جابىرلەنۋشىلەرگە اسا ءىرى كولەمدە ماتەريالدىق زالال كەلتىرگەن.
ەسكەندىروۆتىڭ كىناسى جابىرلەنۋشىلەردىڭ, كۋالاردىڭ, تاركىلەنگەن تولەم تاپسىرمالارىنىڭ, ساراپتامانىڭ جانە تاۋەلسىز اۋديتوردىڭ قورىتىندىلارىمەن دالەلدەنگەن.
سوت جازا تاعايىنداۋ كەزىندە قاتاڭ جازانى تالاپ ەتپەگەن جابىرلەنۋشىلەردىڭ پىكىرىن ەسكەرگەن.
ونىڭ ۇستىنە 2023 جىلى سوت اكتىلەرى جشس قۇرىلتايشىلارى جينالىسىنىڭ شەشىمى مەن قۇقىقتاردى ءۇشىنشى تۇلعالارعا بەرۋ تۋرالى كەلىسىمنىڭ كۇشىن جويدى. دەمەك, سوتتا قارالعان ءىس بويىنشا جابىرلەنۋشىلەرگە جەر تەلىمى قايتارىلعان.
ناتيجەسىندە سوت ەسكەندىروۆتى قىلمىستىق كودەكستىڭ 63-بابى بويىنشا 5 جىلعا باس بوستاندىعىنان ايىردى.
سوت ۇكىمى زاڭدى كۇشىنە ەنگەن جوق.