قارقارالى اۋدانى بەسوبا اۋىلدىق وكرۋگىنە قاراستى قىزىلتۋ اۋلىندا فەلدشەرلىك-اكۋشەرلىك پۋنكت اشىلدى. جاڭا نىساننىڭ قۇرىلىسى بيىل باستالعان ەدى, جاقىندا اياقتالىپ, پايدالانۋعا بەرىلدى.
اۋدان ورتالىعىنان توقسان شاقىرىم قاشىقتىقتا ورنالاسقان اۋىلدا قازىرگى ۋاقىتتا ەكى جۇزدەي ادام تۇرادى. مۇنداعى اۋىل تۇرعىندارىنا ءدال وسىنداي مەديتسينالىق نىسان اۋاداي قاجەت ەدى. كوپشىلىكتىڭ كوكەيىندە كوپتەن جۇرگەن ماسەلە وڭ شەشىمىن تاۋىپ, بارشانى قۋانتتى. مەديتسينالىق پۋنكتتە دارىگەرگە دەيىنگى قاراۋ كابينەتى, ەگۋ, تاڭۋ بولمەلەرى, مەديتسينا قىزمەتكەرلەرىنە ارنالعان, اكۋشەرلىك كابينەتتەر جۇمىس ىستەيدى.
نىساننىڭ سالتاناتتى اشىلۋ راسىمىنە اۋدان اكىمى ءادىلجان ارعىنوۆ, اۋداندىق ورتالىق اۋرۋحانانىڭ ديرەكتورى داۋرەن سەيتپانوۆ, اۋداندىق ءماسليحاتتىڭ دەپۋتاتى ءبىرجان ساپاروۆ قاتىسىپ, حالىققا قۇتتى بولسىن ايتتى. اۋىل اقساقالى, تىل ارداگەرى تولەۋ بۇلانباەۆ ۇلكەندەر اتىنان يگى لەبىزىن ءبىلدىرىپ, باتاسىن بەردى.
فاپ قۇرىلىسى «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنىڭ اياسىندا اتقارىلدى. وسى جوبا نەگىزىندە قارقارالى اۋدانىندا 2025 جىلعا دەيىن اشىلادى دەپ جوسپارلانعان 17 مەديتسينالىق نىسان كەزەگىمەن ەل يگىلىگىنە بەرىلىپ جاتىر.
قاراعاندى وبلىسى,
قارقارالى اۋدانى,
بەسوبا اۋىلى