قاراعاندى قالاسىنىڭ 90 جىلدىعىنا وراي 90 كەزدەسۋ جوباسىنىڭ كەزەكتى قوناعى ساتيريك, «Arqa aqshamy» گازەتىنىڭ باس رەداكتورى, جۋرناليست ادەبيەت بەلگىباي ۇلى بولدى. مۇحتار اۋەزوۆ اتىنداعى كىتاپحانانىڭ №14 فيليالىندا وتكەن كەزدەسۋدە قالامگەردىڭ بويىنداعى ەرەكشە قاسيەتتەرى, شىعارماشىلىعى جونىندە ءسوز قوزعالدى.
كەزدەسۋگە قاراعاندى مەديتسينا كوللەدجىنىڭ ستۋدەنتتەرى, كىتاپحانا ۇجىمى مەن اقىندار قۋانىش ماقسۇتوۆ, سەرعازى قابىلدا ۇلى, ولكەتانۋشى, جۋرناليست اڭعار سماعۇلوۆ, ۇستاز عازيزا عابدوللاقىزى, قولونەر شەبەرى قىلىشبەك قۇرمانتەگى قاتىستى.
ساتيريك شىعارماشىلىققا كەلگەن جولىن اسەرمەن جەتكىزدى. ءازىل-وسپاق جانرىندا العاش قالام تەربەپ جۇرگەندە «قيسىق شەگە» دەگەن شاعىن ساتيرالىق اڭگىمەلەر جيناعىنىڭ جارىق كورىپ, كەيىن شىعارمالارى «مىرس-مىرس» كىتابىمەن وقىرماندارعا جول تارتقاندىعى جونىندە اڭگىمەلەدى.
«وبلىستىق «Ortalyq Qazastan» گازەتىنىڭ توقسان جىلدىعى قارساڭىندا ساتيرالىق اڭگىمەلەرىم باسپادان كىتاپ بولىپ جارىق كوردى. كىتاپتىڭ تانىستىرىلىمىن جاسادىق. ۇستازىم كوپەن امىربەك كەلىپ, باتاسىن بەردى. كوپەن اعامەن «ايقىن» گازەتىندە بىرگە قىزمەت ەتىپ, «ارا» اپتالىعىن شىعاردىق. «مىرس-مىرس» كىتابىما ەنگەن شىعارمالارىم سول كەزدە جازىلعان. قازىر «تۇندەلىك» ايدارىمەن شاعىن ساتيرا جازىپ جاتىرمىن», دەدى كەش قوناعى.
كەزدەسۋگە كەلگەن مەيماندار قالامگەردىڭ بولمىسى بالا سەكىلدى ەكەنىن, ءجۇرىس-تۇرىسىنىڭ ءوزى ساتيريك ەكەنىن اڭعارتاتىنىن ايتتى.
ساتيرا ساڭلاعى كوپەن امىربەكتەن: «ادەبيەتتىڭ شەبەرلىگىنە شەك قويمايمىن. ادىر-بۇدىرلى اعاشتىڭ اجارىن اشىپ, تەمىردەن ءتۇيىن تۇيگەندەي ۇلى ساتيرانىڭ ۇستاسىنا اينالسىن دەپ تىلەيمىن», دەپ باتا العان ساتيريك-جازۋشىعا جينالعان جۇرت قوعامنىڭ قوردالانعان ماسەلەلەرىن اششى مىسقىلمەن جەتكىزە بەرۋى ءۇشىن قالامىنا قۋات تىلەدى.
قاراعاندى وبلىسى