ىشكى ىستەر مينيسترلىگى جوعالعان ادامداردىڭ ورنالاسقان جەرىن انىقتاۋ جانە ىزدەۋدە جۇرگەن ادامداردى ۇستاۋ بويىنشا جەدەل-پروفيلاكتيكالىق ءىس-شارا وتكىزدى, دەپ حابارلايدى Egemen.kz Polisia.kz-كە سىلتەمە جاساپ.
ەكى كۇن ىشىندە پوليتسيا ىزدەۋدە جۇرگەن 280 قىلمىسكەردى ۇستادى, ونىڭ ىشىندە:
كىسى ولتىرگەنى ءۇشىن – 9; دەنساۋلىققا اۋىر زيان كەلتىرگەنى ءۇشىن – 4; قاراقشىلىق شابۋىلدار ءۇشىن – 5; توناۋ ءۇشىن – 7; ەسىرتكى قىلمىسى ءۇشىن – 19 ادام قولعا تۇسكەن.رەسپۋبليكادان تىس جەرلەردە 33 قىلمىسكەر قۇرىقتالىپ, ال باسقا مەملەكەتتەردىڭ سۇراۋىمەن 145 ادام قاماۋعا الىنعان.سونىمەن قاتار, ارمەنيانىڭ نوەمبەريان اۋدانىنىڭ اۋماعىندا 36 جاستاعى قازاقستان ازاماتى ۇستالعان. ول قىركۇيەك ايىنىڭ سوڭىندا پەتروپاۆلدا قالا تۇرعىنىنا پىشاق جاراقاتىن سالىپ, ومىرىنە قاستاندىق جاساعان.
پاۆلودار وبلىسى پوليتسياسىنىڭ جەدەل-ىزدەستىرۋ توبى رەسەي فەدەراتسياسىنىڭ ورەل قالاسىندا 42 جاستاعى ازاماتتى قولعا ءتۇسىردى. قاسكوي 2017 جىلى وڭىرلىك جشس-ءنىڭ بىرىنە ديزەل وتىنىن جەتكىزۋگە ۋادە بەرىپ, 50 ملن تەڭگەنى يەمدەنگەن.
الماتى پوليتسياسى تاشكەنت وبلىسىنىڭ ءمىىب-مەن ىزدەۋدە جۇرگەن 28 جاستاعى وزبەكستان ازاماتىن ۇستاعان. ايەل 2015 جىلدىڭ مامىر ايىندا ءوزىنىڭ كامەلەتكە تولماعان قىزىن ولتىرگەن.
قازاقستان ءىىم ينتەرپولىنىڭ سۇراۋى بويىنشا گەرمانيانىڭ نيۋرنبەرگ قالاسىندا ەلىمىزدىڭ 42 جاستاعى ازاماتى ۇستالعان. ول ناۋرىز ايىنىڭ سوڭىندا استىق جەتكىزۋگە ۋادە بەرىپ, پاۆلوداردا شەتەلدىكتىڭ 244 مىڭ اقش دوللارىن جىمقىرعان.
اباي وبلىسىنىڭ پد قىزمەتكەرلەرى ىزدەۋدە جۇرگەن سەمەيلىك تۇرعىنداردى قالانىڭ وزىندە قولعا تۇسىرگەن. ولار 2021 جىلى ۇقت كومەگىمەن مەتالل زاۋىتىنان قۇرامىندا التىنى بار ماتەريالدى ۇرلاپ اكەتكەن.
سونداي-اق, جۇرگىزىلگەن جۇمىس بارىسىندا پوليتسيا قىزمەتكەرلەرى حابار-وشارسىز كەتكەن 53 ادامنىڭ ورنالاسقان جەرىن انىقتاعان.