استانا قالاسىندا جاس ۇرپاقتى زامانعا ساي بىلىممەن سۋسىنداتىپ, ۇلتتىق تاربيەگە باۋليتىن «Sun study» اتتى ورتالىق اشىلدى. الاش ارىسى سۇلتانماحمۇت تورايعىروۆتىڭ «قاراڭعى قازاق كوگىنە, ورمەلەپ شىعىپ كۇن بولام» اتتى ولەڭىن ۇران ەتىپ العان «Sun study» بالالاردى دامىتۋ ورتالىعىنىڭ اشىلۋ سالتاناتىنا ەلىمىزگە بەلگىلى ۇستازدار, عالىمدار, زيالى قاۋىم وكىلدەرى مەن مەملەكەت قايراتكەرلەرى قاتىستى.
ۇرپاقتىڭ بويىنا ۇلتتىق رۋح ءسىڭىرۋدى ماقسات تۇتقان وقۋ ورداسىنىڭ اشىلۋ سالتاناتىندا جۋرناليست-قالامگەر ورالبەك ءجۇنىس ۇلى باتا بەرىپ, تۇساۋكەسەر لەنتاسىن عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى اقەركە ابىلايحان, ۇلتتىق اكادەميالىق كىتاپحانا ديرەكتورى عازيزا قۇدايبەرگەن, استانا قالاسىنداعى مۋزىكالىق جاس كورەرمەن تەاترىنىڭ ديرەكتورى, تەاتر رەجيسسەرى اسحات ماەميروۆ سەكىلدى جۇرتقا بەلگىلى تۇلعالار كەستى.
عىلىم جانە جوعارى ءبىلىم مينيسترلىگىنىڭ وكىلى اقەركە ابىلايحان بالالاردى بىلىمگە باۋلۋدىڭ وزەكتىلىگىنە توقتالىپ, ورتالىق جۇمىسىنا ساتتىلىك تىلەدى. رەجيسسەر اسحات ماەميروۆ ۇرپاق ساناسىنا زامانعا ساي ءبىلىم مەن ۇلتتىق تاربيەنى قاتار سىڭىرەتىن وقۋ ورتالىقتارىنىڭ ەلىمىزدەگى بارلىق قالاعا كەرەك ەكەنىن تىلگە تيەك ەتىپ, جوبا اۆتورلارى الداعى ۋاقىتتا وسى باعىتتا جۇمىسىن جالعاستىرسا دەگەن تىلەگىن ايتتى. ال ۇلتتىق اكادەميالىق كىتاپحانا ديرەكتورى عازيزا قۇدايبەرگەن بولاشاقتا «Sun study»-دىڭ شاكىرتتەرى بيىكتەردى باعىندىرارىنا سەنىم ءبىلدىرىپ, ورتالىققا شاعىن كىتاپحانا جاساقتاپ بەرەتىنىن سۇيىنشىلەدى.
«Sun study» بالالاردى دامىتۋ ورتالىعىنىڭ يدەيا اۆتورى ارمان اۋباكىر: «قازىر كاسىپ جاساپ, تابىس تابۋدىڭ جولى وتە كوپ. بىراق بىزدە كاسىپ پەن ۇلتتىق تانىمدى ءبىر ارناعا توعىستىراتىن جوبالار وتە از بولىپ تۇر. بۇگىنگى ۇرپاقتىڭ شەت تىلدەرىن كوپتەپ مەڭگەرگەنى دۇرىس. بارلىق اتا-انا وسى ماقساتتا بالالارىن وقىتۋعا قارجى ايامايتىنىن كورىپ ءجۇرمىز. دەسە دە مەنى ء«تىل ءبىلىپ, تەحنيكانىڭ ءتىلىن يگەرگەن بۇگىنگى بۋىن ەرتەڭ قازاق ەلىنە, قازاق مەملەكەتىنە قىزمەت ەتە مە؟» دەگەن سۇراق مازالايدى. ۇلتتىق تاربيەمەن سۋسىنداماعان ءجاسوسپىرىم قازاقتىق تامىرىن ءۇزىپ السا, وتانىمىزعا قىزمەت ەتۋ بىلاي تۇرسىن, جايلى مەكەندى اڭساپ, قۇرلىق اسىپ كەتۋى ابدەن مۇمكىن. سوندىقتان ءبىز ەل كەلەشەگىنىڭ ساۋلەلى بولۋىن ويلاساق, جاپوندار سياقتى «شەت ءتىلىن ۇيرەنەمىن» دەپ قۇلشىنىپ تۇرعان بالالاردىڭ بويىنا قازاقى تاربيەنى دە قاتار سىڭىرگەنىمىز دۇرىس» دەيدى.
سونداي-اق يدەيا اۆتورى بابالارىمىزدىڭ تاۋەلسىز ەل بولۋ جولىنداعى ۇلى كۇرەستەرى مەن سان عاسىرلىق ەرەن ەڭبەگى قۇمعا سىڭگەن سۋداي بولماۋى ءۇشىن دە بۇگىنگى كاسىپكەرلەردىڭ قامسىز وتىرۋعا حاقى جوق ەكەنىن العا تارتتى. «الاش يدەياسىن تۋ ەتكەن ۇلت قايراتكەرلەرى ءوز زامانىندا ەڭ مىقتى بىلىمگە قول جەتكىزىپ, باستارىنا قانداي قاۋىپ-قاتەر تونسە دە شەتەلگە باس ساۋعالاپ كەتكەن جوق. كەرىسىنشە, وزدەرى يگەرگەن ءبىلىمدى زاماننىڭ قيىندىعىنا قاراماي ۇلتتىق باعىتقا بۇرىپ, بۇگىنگى تاۋەلسىز مەملەكەتىمىزدىڭ ىرگەتاسىن قالاۋعا ايانباي كۇش-جىگەرىن جۇمسادى. ماسەلەن, وتىزعا دا تولماي ومىردەن وزعان سۇلتانماحمۇتتىڭ «قاراڭعى قازاق كوگىنە, ورمەلەپ شىعىپ كۇن بولعىسى» كەلۋى ونىڭ ۇلتتىق رۋحىنىڭ كەمەلدىگىن كورسەتپەي مە؟ سول سۇلتانماحمۇتقا ءتان رۋحتى ۇرپاقتىڭ ساناسىنا جاڭعىرتۋ ءۇشىن بالالاردى دامىتۋ ورتالىعىنىڭ اتاۋىن «كۇن ورتالىعى», ياعني «Sun Study» دەپ اتادىق. اتاۋى اعىلشىنشا قويىلعانىمەن, ءمان-مازمۇنى قازاقشا, ء«بىزدىڭ تالىمگەرلەر كەلەشەكتە قازاقتىڭ كوگىندە كۇن بولىپ جارقىراپ تۇرسىن» دەگەن نيەتپەن جۇمىسىمىزدى باستاپ وتىرمىز», دەدى ارمان اۋباكىر.
جوبا اۆتورى قازىر اتا-انالاردىڭ كوبى جۇمىستا بولعاندىقتان, بالالارىنىڭ وقۋ ۇلگەرىمى مەن ءۇي تاپسىرماسىن قاداعالاۋعا مۇمكىندىگى جوق ەكەنىن, سونىڭ سالدارىنان جەتكىنشەكتەر تەلەفونعا تەلمىرىپ, ماعىناسىز تاسپالار كورىپ, ءىلىم مەن عىلىمدى يگەرەتىن التىن ۋاقىتىن الەۋمەتتىك جەلىلەرگە ءراسۋا ەتىپ جاتقانىنا الاڭدايدى.
«Sun study» بالالاردى دامىتۋ ورتالىعى بالانىڭ ساباققا دايىندالۋىنا, ۇلتتىق قۇندىلىقتاردى بويىنا ءسىڭىرىپ, اعىلشىن ءتىلىن تەرەڭ مەڭگەرۋىنە بارلىق جاعداي جاسايدى. ماسەلەن, ورتالىق جانىنان شاحمات ويناۋ, دومبىرا تارتۋ سەكىلدى ونەرلەردى دە ۇيرەتەتىن ءتۇرلى كلۋب اشىپ جاتىرمىز. قازىر تەلەفونعا دەگەن تاۋەلدىلىك سالدارىنان ءتىلى شىقپاي قالعان سابيلەرىمىز وتە كوپ. ولارمەن ارنايى لوگوپەد ماماندارى جۇمىس ىستەيدى. سونىمەن قاتار بالدىرعانداردى مەكتەپكە دايىنداۋ دا ورتالىقتىڭ باستى جۇمىستارىنىڭ ءبىرى بولادى», دەدى «Sun study» بالالاردى دامىتۋ ورتالىعىنىڭ اتقارۋشى ديرەكتورى گۇلفايرۋز مىقتىبەكوۆا.
«Sun study» بالالاردى دامىتۋ ورتالىعىنىڭ ءار وقۋ بولمەسى الاش ارىستارىنىڭ اتىنا بەرىلگەنى دە قوناقتاردى تاڭعالدىردى. الاش ارداقتىلارىنىڭ اتىن يەلەنگەن بولمەلەرگە كىرسەڭىز, تۇلعالارىمىز تۋرالى مول ماعلۇمات الىپ, ولاردىڭ جارعاق قۇلاعى جاستىققا تيمەي حالىققا ەتكەن ەڭبەگىن تانىپ بىلۋگە بولادى. مىسالى, ءاليحان بوكەيحان بولمەسىنىڭ قابىرعاسىنا ء«تىرى بولسام, قازاققا قىزمەت قىلماي قويمايمىن», ماعجان جۇماباي بولمەسىندە «قاراعىم, وقۋ وقى, بوسقا جۇرمە! ويىنعا قۇر قالارسىڭ, كوڭىل بولمە», مىرجاقىپ دۋلات ۇلى بولمەسىندە «حالىققا جاستار باسشى بول! قاراڭعىدا جەتەكتەپ», احمەت بايتۇرسىن ۇلى بولمەسىندە «باسقادان كەم بولماۋ ءۇشىن ءبىز ءبىلىمدى, باي ءھام كۇشتى بولۋىمىز كەرەك» دەگەن سەكىلدى ناقىل سوزدەر جازىلعان.
«قازىرگىدەي ينتەرنەتتىڭ قارىشتاپ دامىعان زامانىندا جەتكىنشەكتەردىڭ كوبى قيالدان تۋعان ءتۇرلى پەرسوناجداردى قاھارمان سانايدى. وتاندى, ەلدى, ۇلتتى ءسۇيۋى ءۇشىن شاكىرتتەرىمىز الاش ارىستارىنا ەلىكتەپ ءوسۋى كەرەك. بالا كەزدەگى قيال, ءتۇبى ۇلى ارمانعا اينالارى حاق. ءبىزدىڭ باستى ماقساتىمىز – جاس ۇرپاقتىڭ ارمانىنا قول جەتكىزۋدىڭ جالعىز جولى ءىلىم مەن عىلىم ىزدەۋ ەكەنىن ءتۇيسىندىرۋ. ءار بولمەگە ارىستارىمىزدىڭ اتىن بەرۋ ارقىلى وقۋشىلارىمىزعا كىمدەردى قاھارمان ساناپ, كىمدەرگە ەلىكتەۋ كەرەگىن كورسەتكىمىز كەلدى. قازاقتىڭ ءبىرتۋار تۇلعالارىنىڭ قابىرعاداعى كوركەم بەزەندىرىلگەن بەينەلەرىنە كۇندە قاراپ, جالپى حالىقتىق ناقىل سوزگە اينالىپ كەتكەن ويلارىن وقىپ وسكەن جەتكىنشەك بولاشاقتا ءسوزسىز ءاليحان, احمەت, مىرجاقىپتارداي تۇلعا بولۋدى ارماندايدى. قازىر وقۋشىنى كىتاپتاعى جازىلعان بىلىممەن عانا تاربيەلەۋ ازدىق ەتەدى. وقۋ ورنىنداعى ءار زات, ءار بۇيىم, ءار دەتال بالا ساناسىنا سىلكىنىس جاساپ, ولاردى ويلاندىرا الۋى قاجەت. ءبىزدىڭ وقۋ بولمەلەرىمىز سول تالاپقا جاۋاپ بەرىپ تۇر», دەيدى گۇلفايرۋز مىقتىبەكوۆا.