كەشە ۇلتتىق قورعانىس ۋنيۆەرسيتەتىندە «راحىمجان قوشقارباەۆ: رەيحستاگ ۇستىندەگى تۋ» اتتى عىلىمي-تاجىريبەلىك كونفەرەنتسيا ءوتتى. ءىس-شاراعا قورعانىس مينيسترلىگىنىڭ وكىلدەرى, اسكەري عالىمدار مەن ماگيسترانتتار, اسكەري وقۋ ورىندارىنىڭ كۋرسانتتارى مەن باتىردىڭ ۇرپاقتارى قاتىستى.
بيىل 100 جىلدىق مەرەيتويى رەسپۋبليكالىق دەڭگەيدە تويلانىپ جاتقان قازاقتىڭ ەرجۇرەك باتىر ۇلى, بەرليندەگى رەيحستاگقا العاش بولىپ جەڭىس تۋىن تىككەن, حالىق قاھارمانى راحىمجان قوشقارباەۆتىڭ ەسىمىن ۇلىقتاۋ ماقساتىندا, ۇلى تۇلعانىڭ تۋعان كۇنىمەن ورايلاستىرا ۇيىمداستىرىلعان كونفەرەنتسيانىڭ شىمىلدىعىن ۇلتتىق قورعانىس ۋنيۆەرسيتەتىنىڭ باستىعى, PhD, دوتسەنت, گەنەرال-مايور اسقار دوسبوسىن ۇلى مۇستابەكوۆ اشتى.
– قارۋلى كۇشتەرىنىڭ باس قولباسشىسى, مەملەكەت باسشىسى قاسىم-جومارت توقاەۆتىڭ «Egemen Qazaqstan» گازەتىنە سۇحبات بەرگەنىن ءبارىڭىز بىلەسىزدەر. سول سۇحباتتا مەملەكەت باسشىسى «ەل تاريحىندا ەرەكشە ورنى بار تۇلعالارعا قۇرمەت كورسەتۋ ءداستۇرى ەلىمىزدىڭ جالپى ۇلتتىڭ بىرەگەيلىگىن نىعايتا تۇسۋگە زور سەپتىگىن تيگىزەدى» دەدى. ۇلتتىڭ بىرەگەيلىگىن ساقتاۋ ءۇشىن باتىرلار رۋحىنا قۇرمەت كورسەتىپ, ولاردىڭ كوزسىز ەرلىگىن كەيىنگى ۇرپاققا ناسيحاتتاۋ ءىسىن ۇزدىكسىز جۇرگىزە بەرۋگە ءتيىسپىز. بۇگىنگى ءىس-شارا سونىڭ ناقتى مىسالى بولا الادى, – دەدى ۇلتتىق قورعانىس ۋنيۆەرسيتەتىنىڭ باسشىسى.
سونداي-اق اسقار دوسبوسىن ۇلى كونفەرەنتسيا قوناقتارىن ايگىلى عالىم قانىش ساتباەۆتىڭ تۋعانىنا – 125, داڭقتى باتىرلار ساعادات نۇرماعامبەتوۆ پەن راحىمجان قوشقارباەۆتىڭ تۋعانىنا 100 جىل تولۋىمەن قۇتتىقتاپ, ءىس-شارا بارىسىندا ەلىمىزدىڭ اسكەري تاريحىنا قاتىستى كەڭ كولەمدەگى تەوريالىق جانە تاجىريبەلىك ماسەلەلەردىڭ تالقىلاناتىنىنا سەنىم ءبىلدىردى.
قارۋلى كۇشتەر باس شتابى اكادەمياسى جەدەل ونەر جانە اسكەري تاريح كافەدراسىنىڭ اعا وقىتۋشىسى, PhD, زاپاستاعى پولكوۆنيك داۋرەن مايحيەۆ ەكىنشى دۇنيەجۇزىلىك سوعىستىڭ سوڭعى نۇكتەسىن قويۋدا بەرليندەگى شايقاستىڭ ماڭىزىن ارنايى دايىندالعان كورنەكى قۇرالدارمەن دەرەكتەرگە سۇيەنىپ بايانداپ شىقتى.
باياندامادا عالىم «راحىمجان قوشقارباەۆتىڭ رەيحستاگقا تۋ تىگۋ ەرلىگىن ۇرپاق ساناسىنا سىڭىرەمىز دەسەك, ءفاشيزمدى تۇپكىلىكتى تالقانداۋدا كەڭەس اسكەرىنىڭ قانداي تاۋەكەلدەرگە بارعانىن, بەرليندى الۋ شايقاسىنىڭ ادامزات تاريحىنداعى ءمان-ماعىناسىن تەرەڭىرەك ءبىلىپ الۋعا ءتيىسپىز» دەگەن ويىن ورتاعا سالدى.
مۇنان كەيىنگى باياندامالاردا راحىمجان قوشقارباەۆتىڭ رەيحستاگقا تۋ تىگۋ ءۇشىن 360 قادام جەردى جەتى ساعات بويى قالاي جىلجىعانى, قوشقارباەۆ قىزمەت ەتكەن پولكتىڭ جاۋىنگەرلىك ەرلىكتەرى, حالىق قاھارمانى تۋرالى جازىلعان ادەبي تۋىندىلار مەن زەرتتەۋ ەڭبەكتەردىڭ اسكەري ماماندارعا اسەرى تۋرالى كوپتەگەن ماسەلەلەر ايتىلدى.
سونداي-اق كونفەرەنتسيا بارىسىندا عالىمدار «قازاقستاننىڭ ەگەمەن مەملەكەت رەتىندەگى اسكەري زاڭناماسىن جەتىلدىرۋ» تاقىرىبىندا دا ءوز ويلارىن ورتاعا سالدى.
ءىس-شاراعا ونلاين قاتىسقان اۋە قورعانىسى كۇشتەرىنىڭ اسكەري ينستيتۋتى, ۇلتتىق ۇلان اكادەمياسى, سابىر راحىموۆ اتىنداعى اسكەري كوللەدج ماماندارى مەن ۇجىمدىق قاۋىپسىزدىك شارتى ۇيىمىنىڭ وكىلدەرى ءفاشيزمدى تالقانداۋداعى باتىرلاردىڭ ەرلىك ىستەرىنە عىلىمي تۇرعىدا باعا بەرۋ ماسەلەسىن كۇن تارتىبىنەن تۇسىرمەۋدى ۇسىندى.
كونفەرەنتسيا سوڭىندا ۇلتتىق قورعانىس ۋنيۆەرسيتەتىنىڭ باستىعى, گەنەرال-مايور, PhD اسقار مۇستابەكوۆ اسكەري ماماندار مەن عالىمدارعا العىس ءبىلدىردى.