جىگەرلى جاس جىگىت اسلانبەك تۇرسىننىڭ قۇتقارۋشى قىزمەتىنە كەلگەلى ءبىر جىل بولدى. ونىڭ بۇل سالاعا كەلۋىنە اكەسى اسەر ەتىپتى. اكەسى دۋلات ءورت ءسوندىرۋ سالاسىندا ۇزاق جىل قىزمەت اتقارىپ, زەينەتكە شىققان. بالا اسلانبەك سودان بەرى اكەسىن باتىر ساناپ, ءىزىن جالعاۋدى ويلايدى. «اكەمدەي قادىرلى قۇتقارۋشى بولامىن, ەل-جۇرتقا پايدامدى تيگىزىپ, ادال قىزمەت اتقارامىن», دەگەن سەرتىنە دە, سەنىمىنە دە بەرىك.
اسلانبەك بىلتىر قاراعاندى جوعارى تەحنيكالىق كوللەدجىن «توتەنشە جاعدايلارداعى قورعانىس» ماماندىعىنا وقىپ ءبىتىردى. سودان سوڭ بىردەن قاراعاندى وبلىسى توتەنشە جاعدايلار دەپارتامەنتى ء«ورت ءسوندىرۋ جانە اۆاريالىق-قۇتقارۋ جۇمىستارى قىزمەتى» رەسپۋبليكالىق مەملەكەتتىك مەكەمەسىنىڭ №10 ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى بولىپ قىزمەتكە تۇردى.
– ءبىزدىڭ ءبولىم – شاقىرتۋلارعا ەڭ كوپ شىعاتىن بولىمدەردىڭ ءبىرى, تاۋلىگىنە ون شاقتى ءتۇرلى قوڭىراۋ تۇسەدى. ارينە, جان تۇرشىگەتىن وقيعالارمەن دە ءجيى ۇشىراسامىز. ونىڭ ءبارى جۇرەككە وڭاي تيمەيدى. بىراق ءار قۇتقارۋشى ونداي كەزدە تاستاي قاتتى, جەلدەي جىلدام بولۋ كەرەك. سەكۋندتىڭ ءوزى بىرەۋدىڭ تاعدىرىن شەشەدى. ابدىراپ قالۋ – ەڭ ۇلكەن قاتەلىك. سوعان جول بەرمەۋ كەرەك, – دەيدى كىشى سەرجانت اسلانبەك تۇرسىن.
اسلانبەك – ءوزىن ەڭ العاشقى قۇتقارۋ جۇمىسىنان-اق كورسەتە بىلگەن جاس مامان. بىلتىر كۇزدە پويىز بەن جەڭىل كولىك قاعىسىپ, جان تۇرشىگەتىن جول اپاتى بولدى. سوندا كولىكتىڭ ىشىندە كوز جۇمعان ەكى ادامنىڭ مۇردەسىن كورە تۇرا سالقىندىق تانىتىپ, ىشىندەگى قىسىلىپ قالعان باسقا جولاۋشىلارعا جىلدام كومەك بەردى.
– قۇتقارۋشى ماماندىعىندا باستىسى ءوزىڭ مىقتى بولۋىڭ كەرەك, ءتۇرلى وقيعا مەن جاعداي بولادى. سول كەزدەگى بار ويىڭ – ادام جانىن امان اراشالاپ قالۋ. جاس مامان اسلانبەك بۇل مىندەتىنە ادال. شاپشاڭ. شىمىر. جۇرەكتى. وزىنە جۇكتەلگەن باسقا دا جۇمىسىنا تياناقتى. جاس بولسا دا ۇجىمدا بەدەلى بار, – دەيدى №1 قاراۋىل باستىعى, اعا لەيتەنانت ماديار نۇرمۇحان.
جاقىندا قۇرامىندا اسلانبەك بار قۇتقارۋشى توپ قالاداعى مولوكوۆ كوشەسىندەگى 94-ءۇيدىڭ ءتورتىنشى قاباتىنداعى ورتتەن ءبىر وتباسىنى امان الىپ شىقتى. قىزىل جالىننىڭ ىشىنەن ەگدە جاستاعى اجەيدى, كىشكەنتاي بالا مەن ءجاسوسپىرىم قىزدى قۇتقاردى.
«نەگىزى وڭاي بولعان جوق. ءبىز كەلسەك پاتەر ءىشى قىپ-قىزىل, وت شارپىپ تۇر. ىشىندە ادام بارىن ءبىلىپ, جاساقتاعى ۇشەۋمىز دە ءبىر مەزگىلدە كىردىك. مەن اجەيدى الىپ شىقتىم, قاسىمداعىلار ەكى بالاسىن قۇتقاردى. از ۋاقىتتىڭ ىشىندە ءورتتى دە اۋىزدىقتادىق. باستىسى, ىشىندەگى ادامدار امان. ءوزىم ءار ادامنىڭ ومىرىنە اراشا تۇسكەن سايىن, بويىما كۇش-جىگەر جينايمىن», دەيدى جاس قۇتقارۋشى.
قاراعاندى وبلىسى