سولتۇستىك قازاقستان وبلىسىندا كۇن كۇرت سۋىتىپ, تۇندە جاۋعان قاردىڭ سوڭى بۇرقاسىنعا ۇلاسقان. سينوپتيكتەر بۇل اۋا رايىنىڭ ءبىر-ەكى كۇنگە جالعاساتىنىن اتاپ ءوتتى, دەپ حابارلايدى Egemen.kz.
ايتا كەتەيىك, «قازگيدرومەت» رمك سقو فيليالى 9 قازاننان بەرى قار, بوران, كوكتايعاق جايلى ەسكەرتىپ جاتىر. قازىرگى ۋاقىتتا وبلىس باتىس تسيكلونىنىڭ ىقپالىندا. مۇنداي قولايسىز اۋا رايى ەرتەڭ دە ساقتالادى دەپ حابارلاندى.
بولجام بويىنشا بۇگىن ءوڭىردىڭ باتىس, سولتۇستىك جانە شىعىسىندا جاڭبىر, قار جاۋادى. سولتۇستىك شىعىستان سوققان جەلدىڭ ەكپىنى 15-20 م/س, كەيدە 23-28 م/س دەيىن جەتپەك. ال وبلىستىڭ سولتۇستىگى مەن شىعىسىندا داۋىل تۇرىپ, ەكپىنى 30 م/س جەتەدى.
تۇندە اۋا تەمپەراتۋراسى -5 گرادۋسقا دەيىن تومەندەسە, كۇندىز +2-3 ارالىعىندا بولماق.
ەرتەڭ 12 قازاندا دا وبلىستىڭ سولتۇستىگى, شىعىسى مەن وڭتۇستىگىندە قار جاۋىپ, بوران ساقتالادى. كوكتايعاق بولماق. تۇندە اۋا تەمپەراتۋراسى -2,-7 گرادۋس ارالىعىندا, كۇندىز -5 گرادۋسقا دەيىن سۋىتادى.
ءبىر تۇندە جاۋعان جاۋىن-شاشىن مولشەرى 3,2 مم دەيىن جەتكەن. م.جۇماباەۆ اۋدانىنىڭ ۆوزۆىشەنكا, ەسىل اۋدانىنىڭ ياۆلەنكا مەتەورولوگيالىق ستانساسىندا مۇزدى جاۋىن جاۋعان. جالپى, قازان ايىنداعى جاۋىن-شاشىننىڭ ورتاشا نورماسى – 22-40 مم.