ىشكى ىستەر مينيسترلىگى ۇيىمداسقان قىلمىسقا قارسى كۇرەس ءبولىنىسىنىڭ قىزمەتكەرلەرى مۇناي ونىمدەرىنىڭ ءىرى كونترابانداسىنىڭ ارناسىن جويعان, دەپ حابارلايدى Egemen.kz Polisia.kz-كە سىلتەمە جاساپ.
جەدەل ءىس-شارالاردىڭ ناتيجەسىندە شەكارادان شىعارۋعا ارنالعان 10-نان استام ۆاگون-تسيستەرنا تابىلعان.
انىقتالعانداي, ىرگەلەس مەملەكەتتىڭ اۋماعىنا جونەلتىلمەك بولعان ۆاگونداردا قۇنى 120 ملن تەڭگەدەن اساتىن 750 توننادان استام مۇناي ءونىمى بولعان. ولار توقتاتىلىپ, تەرگەۋ جۇرگىزۋ ءۇشىن تاركىلەنگەن.
«مۇناي ونىمدەرىن ءتيىستى رۇقسات قۇجاتتارىنسىز تاسىمالداۋ فاكتىسى بويىنشا قىلمىستىق ءىس قوزعالدى. جەدەل-تەرگەۋ ءىس-شارالارىنىڭ كەشەنى جۇرگىزىلىپ جاتىر», دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.