سۇڭقار ساكەننىڭ جاڭا تۇعىرى

بيىكتىگى ءبىر مەتردەن اساتىن تۇعىردى تولىعىمەن ءۇش مەترگە بيىكتەتىپ, ونى گرانيت تاسپەن قاپتاعان. ودان بولەك, اقىن ءبيۋستى قولا تۇسىنە بويالعان. ەسكەرتكىشتىڭ اينالاسى اباتتاندىرىلعان. ماڭايىنا تاس توسەلىپ, ورىندىقتار, جارىق باعاندارى مەن جاڭا قورشاۋ قويىلدى.

– ساپالى ماتەريالدار پايدالانىلدى, كۇن باتارەيالارىمەن قۋاتتاناتىن جارىقتاندىرۋ جانە ورىندىقتار ورناتىلدى. بۇرىن جازۋشىنىڭ اكە-شەشەسى تۇرعان ءۇيدىڭ اۋماعى دا اباتتاندىرىلدى. قازىر وندا ءۇيدىڭ تەك ىرگەتاسى عانا قالعان. ەندى توزعان تۇسى قايتادان قۇيىلىپ, اكتەلدى. ءۇيدىڭ جانىنداعى مەموريالدىق تاقتا دا جاڭارتىلدى, – دەيدى ورتاۋ اۋىلدىق وكرۋگىنىڭ اكىمى دوسان قۋانىشبەك.

قايتا جاڭعىرتىلعان ەسكەرتكىشتىڭ سالتاناتتى اشىلۋىنا وراي بەلگىلى عالىمدار, اقىن, جازۋشىلار جينالىپ, قايراتكەر رۋحىنا قۇرمەت كورسەتتى.

– وسىدان ون جىل بۇرىن ساكەن سەيفۋلليننىڭ 120 جىلدىق مەرەيتويى اياسىندا قاراشىلىك قىستاۋىندا العاش رەت كونسەرۆاتسيالىق جانە اباتتاندىرۋ جۇمىسى جۇرگىزىلدى. قىستاۋدىڭ ورنىن زەرتتەۋ بارىسىندا ءۇيدىڭ ىرگەتاسى تولىق اشىلىپ, قايتا قالپىنا كەلتىرىلدى. قىستاۋعا كونسەرۆاتسيالىق جۇمىس جۇرگىزىلىپ, تولىقتاي قورشالىپ, بەل­گىتاس قويىلدى. بيىل مىنە, قاراعاندى وبلىستىق ماسليحاتىنىڭ دەپۋتاتى رىسقالي ابدىكەروۆتىڭ باستاماسىمەن ساكەن سەيفۋليننىڭ 130 جىلدىق مەرەيتويىنا بايلانىستى اقىننىڭ تۋعان جەرى قاراشىلىك قىستاۋىن دا قالپىنا كەلتىرۋ, اباتتاندىرۋ جۇمىسىن جۇر­گىزۋگە وبلىس بيۋدجەتىنەن 50 ملن تەڭگە قاراجات ءبولىندى. بۇل جۇمىستى جۇر­گىزۋگە جوبالىق سمەتالىق قۇجاتتار دايىندالىپ, بارلىق جۇمىس وسى قۇ­جات اياسىندا اتقارىلدى, – دەيدى وب­لىستىق تاريحي-مادەني مۇرانى ساقتاۋ ورتالىعىنىڭ باسشىسى تۇلكىباي تو­لەۋوۆ.

ەڭ العاش سەيفوللانىڭ قاراشى­لىگىندە ءھام ورتاۋ اۋىلىندا اقىننىڭ ەكى بىردەي ءمۇسىنىن قالىپتاۋشى – سۋرەتشى, ءمۇسىنشى جاقسىباي قالياقپار ەدى. ول 1992 جىل-تىن. ارادا وتىز جىلدان اسا ۋاقىت وزىپ, سۇڭعىلا ساكەننىڭ سۇلۋ بەينەسى جاڭا تاستۇعىرعا قوندى. ەندى بابا رۋحىنا تاعزىم ەتۋگە كەلگەندەر قاراشىلىك قىستاۋىنىڭ تۇنىپ تۇرعان تاريحىمەن تانىسا الادى.

قاراعاندى وبلىسى,

شەت اۋدانى,

ورتاۋ اۋىلى