اقتوعاي اۋدانىندا ەكىنشى رەت اكىم سايلاۋى ءوتتى. بۇل جولى ەل تىزگىنىن مەملەكەتتىك قىزمەتتە شىڭدالعان, اۋداننىڭ الەۋمەتتىك, ەكونوميكالىق ماسەلەلەرىن جەتىك بىلەتىن ابىلاي امانجولوۆ ۇستايدى. بۇعان دەيىن ول اۋدان اكىمىنىڭ ورىنباسارى قىزمەتىن اتقارىپ كەلدى.
ساياسي ناۋقانعا اۋداننىڭ 4698 تۇرعىنى قاتىسىپ, تاڭداۋىن جاساعان. سايلاۋدا باسىم داۋىسقا يە بولعان ابىلاي امانجولوۆ اۋداننىڭ جاڭا باسشىسى بولىپ سايلاندى.
– بۇل سايلاۋدا ءۇش كانديدات وزدەرىنىڭ ۇگىت-ناسيحات جۇمىسىن جۇرگىزدى. بارلىعىنا بىردەي مۇمكىندىك بەرىلدى. سايلاۋ كوميسسيالارىنا دا ارىز-شاعىم تۇسكەن جوق. اقتوعاي اۋدانىندا اكىم سايلاۋىنا بايلانىستى 38 سايلاۋ ۋچاسكەسى تالاپقا ساي جۇمىس ىستەدى. زاڭ بۇزۋشىلىق تىركەلگەن جوق. اۋدان بويىنشا سايلاۋ ۋچاسكەلەرىنە بارلىعى 10 213 ادام تىركەلگەن. سايلاۋ قورىتىندىسىنا سۇيەنسەك, 2997 سايلاۋشى ابىلاي امانجولوۆقا داۋىس بەرگەن. ال ونىڭ باسەكەلەستەرى قايرات نوكەش پەن ورال ستىباەۆ 1424 جانە 59 داۋىس جينادى. مۇنىمەن قوسا, «بارلىعىنا قارسى» بەلگىسى بار بيۋللەتەندەر سانى 60», دەيدى اۋداننىڭ اۋماقتىق سايلاۋ كوميسسياسىنىڭ توراعاسى جانبولات رايىمبەكوۆ.
اۋدان اكىمدەرىن تىكەلەي سايلاۋ – جالپى ءوزىن-ءوزى باسقارۋ جۇيەسىنىڭ ماڭىزدى بولىگىنىڭ ءبىرى. سوندىقتان اۋدان اكىمىن تىكەلەي سايلاۋ ناتيجەسى مەيلىنشە ماڭىزدى دەيدى كوميسسيا توراعاسى.
«بۇل ءبىر جاعىنان سايلاناتىن اكىمنىڭ جاۋاپكەرشىلىگىنە بايلانىستى. ەكىنشى جاعىنان حالىقپەن قارىم-قاتىناستاعى «حالىق ۇنىنە قۇلاق اساتىن مەملەكەت» قاعيداسىنىڭ شىن مانىندە جۇزەگە اسۋىنا تولىقتاي ءوز ۇلەسىن قوسادى. ەگەر سايلانعان اكىمنىڭ جۇمىسىنا كوڭىلى تولماسا, حالىق وعان ءماسليحات ارقىلى سەنىمسىزدىك بىلدىرەدى. ءماسليحاتتىڭ قۇرامى دا بۇرىنعىداي پارتيا تىزىمىمەن ەمەس, اۋىل, اۋدان, قالا دەڭگەيىندە تولىقتاي ماجوريتارلىق سايلاۋ جۇيەسى ارقىلى جۇزەگە اسادى. بۇل – جەرگىلىكتى بەلسەندىلەرگە, تۋعان جەرىنىڭ دامۋىنا ۇلەسىمدى قوسامىن دەگەن ازاماتتارعا جول اشادى. بۇل – تىكەلەي سايلاۋدىڭ ارتىقشىلىقتارى. اكىم مەن حالىق اراسىنداعى بايلانىستىڭ نىعايۋىنا, جاۋاپكەرشىلىكتىڭ ارتۋىنا جانە جۇمىستىڭ تيىمدىلىگىنە تىكەلەي اسەر ەتەدى», دەيدى اكىم سايلاۋىنىڭ ەل ىشىندەگى ساياسي ءرولى جونىندە جانبولات رايىمبەكوۆ.
سونىمەن, اۋدانداعى ساياسي دودا مارەسىنە جەتتى. حالىق تاڭداۋ جاساعان اكىم باعدارلاماسىندا شەشىمىن تابۋعا ءتيىس ماسەلە جەتەرلىك.
«حالىقتىڭ سەنىمى – ەڭ قۇندى. جەرلەستەرىمنىڭ قولداۋىنا يە بولىپ, ەل تىزگىنىن ۇستاۋ – ەڭ بيىك مارتەبە ءارى وراسان زور جاۋاپكەرشىلىك. وسى دودادا ماعان قارسىلاس بولعان ارىپتەستەرىمە قۇرمەتىم جوعارى. سايلاۋعا قاتىسقان بارشا جەرلەستەرىمە العىسىمدى ايتامىن. ناۋقانعا اتسالىسقان شتاب مۇشەلەرىنە, سەنىمدى وكىلدەرىم مەن بايقاۋشىلارعا ريزاشىلىعىمدى بىلدىرەمىن. ەل مەن جەرگە قالتقىسىز قىزمەت ەتەمىز», دەيدى جاڭا اكىم.
اقتوعايعا قىزمەت ەتۋ – حالىققا قىزمەت ەتۋ. ەل سەنىمىنە سەلكەۋ تۇسىرمەي, اۋدان حالقىنىڭ ءال-اۋقاتىن ارتتىرۋ – ەندى جاڭا اكىمگە جۇك.
قاراعاندى وبلىسى,
اقتوعاي اۋدانى