ماراپات يەلەنگەن مەتاللۋرگتەر

ماراپاتتالعانداردىڭ ىشىندەگى جەتەۋىنە – «قۇرمەت», 11-ىنە III دارەجەلى «ەڭبەك داڭقى» وردەنى تابىستالدى. ودان بولەك 13 مەتاللۋرگ – «ەرەن ەڭبەگى ءۇشىن» مەدالىمەن, 7 قىز­مەتكەر مەملەكەت باسشىسىنىڭ قۇرمەت گراموتاسىمەن ماراپاتتالدى. بۇل مارتەبەلى ماراپاتتاردى ايماق باسشىسى ەرماعانبەت بولەكپاەۆ سالتاناتتى ءراسىم كەزىندە تاپسىردى.

– بۇل سالادا ەڭبەك ەتكەن ارداگەرلەردىڭ ەڭبەگى زور. سولاردىڭ ەرەن ەڭبەگىمەن بۇگىندە الىپ كومپانيا ەلىمىزدەگى مەتاللۋرگيانىڭ العاشقى الپاۋىتىنا اينالدى. ءبىزدىڭ كومبينات قازاقستاندا شىعاتىن بولاتتىڭ باسىم ۇلەسىن وندىرەدى. سونىمەن قاتار كومبينات قازاقستاندا وندىرىلەتىن ونەركاسىپ ونىمدەرىنىڭ 25 پايىزىن قامتاماسىز ەتەدى. مۇنداعى ەڭبەككەرلەردىڭ بارلىعى قازاقستاندىق ماگنيتكانىڭ دامۋى­نا ۇلەسىن قوسىپ جاتىر, – دەدى ايماق باسشىسى.

مەتاللۋرگتەردى مەرەيلى مەرەكەسىمەن «Qarmet» ديرەكتورلار كەڭەسىنىڭ توراعاسى اندرەي لاۆرەنتەۆ تە قۇتتىقتاپ, قاجىرلى ەڭبەكتەرىنە تولايىم تابىس تىلەدى.

– مەتاللۋرگتەر كۇنى – بۇل كومبيناتتىڭ ۇلى تاريحىنا قانىق­قان ناعىز ەرلىكتىڭ, كۇشتىڭ, ومىرلىك ەنەرگيانىڭ مەرە­كەسى. مەملەكەت باسشىسى قىزمەتكەرلەرىمىزدىڭ ەڭبەگىن وسى­لاي جوعارى باعالاعانى ءبىز ءۇشىن وتە ماڭىزدى. بۇگىن «Qarmet»-ءتىڭ جاڭا ءداۋىرى, ناعىز قايتا جاندانۋ ءداۋىرى باستالدى, – دەدى توراعا.

ماراپات العانداردىڭ قاتارىندا تالاي جىلدان بەرى قىزمەت ىستەپ كەلە جاتقان تاجىريبەلى ماماندار دا, ۇزدىك جاس ماماندار دا بار. سولاردىڭ ىشىندەگى ۆلاديمير فيليپپوۆتىڭ كومبيناتتاعى ەڭبەگىنە ەلۋ جىل تولىپتى. العاش جۇمىسقا قاراپايىم جۇمىسكەر بولىپ قابىلدانعان ول جوسپارلاۋ جانە جەدەل باسقارۋ جونىندەگى ديرەكتورى.

– مەكتەپ بىتىرگەننەن كەيىن بىردەن اكەم مەنى كومبيناتقا الىپ كەلدى. ودان كەيىن اسكەر. سودان كومبيناتقا قايتا كەلىپ, ۇزدىكسىز وڭدەۋ قوندىرعىلارىن باسقارۋ پوستىنىڭ وپەراتورى بولىپ جۇمىسقا تۇردىم. ەڭبەكتەن قاشپادىق. بەل ورتاسىندا جۇردىك. بولاتتاي شىڭدالدىق. ەڭبەگىمدى باعالاعانىنا قۋانىشتىمىن, – دەيدى «قۇرمەت» وردەنىن ومىراۋىنا تاققان ۆلاديمير فيليپپوۆ.

قاراعاندى وبلىسى