جول-كولىك اپاتى بۇگىن قىزىلجار اۋدانىنا قاراستى بەسكول اۋىلىنان 3 شاقىرىم جەردە ورىن العان, دەپ جازادى Egemen.kz.
سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, «استانا – پەتروپاۆل» اۆتوجولىندا Infiniti FX45 اۆتوكولىگىنىڭ جۇرگىزۋشىسى ءبىر باعىتتا كەتىپ بارا جاتقان «بەلارۋس» تراكتورىنىڭ تىركەمەسىنە سوعىلعان.
سالدارىنان جەڭىل كولىكتىڭ 20 جاستاعى جۇرگىزۋشىسى مەن ونىڭ 37 جانە 27 جاستاعى ەكى جولاۋشىسى وقيعا ورنىندا كوز جۇمدى, تاعى ءبىر 1996 جىلعى جولاۋشى قىز بالا ورتالىق اۋداندىق اۋرۋحاناعا جەتكىزىلدى. تراكتوردىڭ 35 جاستاعى جۇرگىزۋشىسى زارداپ شەكپەدى.
قازىرگى ۋاقىتتا پوليتسيا قىزمەتكەرلەرى ءۇش ادامنىڭ قازاسىنا الىپ كەلگەن جول-كولىك وقيعاسى فاكتىسى بويىنشا قاجەتتى ساراپتامالار مەن سوتقا دەيىنگى ءىس جۇرگىزۋدى تاعايىنداۋ ءۇشىن ماتەريالدار جيناپ جاتىر.