قاراعاندى قالاسى اكىمىنىڭ جاستار كاسىپكەرلىگىن قولداۋعا جانە دامىتۋعا ارنالعان گرانتتارى ورتالىق ساياباقتىڭ ساحناسىندا كاسىپكەرلەرگە سالتاناتتى تۇردە تابىستالدى. بۇل جولى دا ەرەكشە جوبالار قولداۋ تاپتى.
جەڭىمپازدار 3D-پرينتەر ارقىلى ەرەكشە قاجەتتىلىكتەرى بار ادامدارعا پروتەز جاساۋ, STEAM زاماناۋي جانە يننوۆاتسيالىق ادىستەمەسى بار IT-مەكتەپ, گيپس بۇيىمدارىن شىعاراتىن ءوندىرىس ورنى, ەرەكشە بالالارعا ارنالعان «سەزين» ينكليۋزيۆتى شىعارماشىلىق ورتالىعىن اشۋ, «Blackjump» فيتنەسستۋديا سەكىلدى جوبالارىن ىسكە اسىرماق.
گرانتتاردى قالالىق ءماسليحات توراعاسى التىنتورە جانگەلدى ۇلى, قاراعاندى قالاسى اكىمىنىڭ ورىنباسارى داستان امانگەلدى ۇلى, قالالىق جاستار رەسۋرسى ورتالىعىنىڭ ديرەكتورى ياكۋب دجامالوۆ تاپسىرىپ, كونكۋرسقا قوسقان جوبالاردىڭ ۇلكەن بيزنەسكە اينالۋىن تىلەدى.
«جاس كاسىپكەرلەردى قولداۋ, ولارعا جول اشۋ جىل سايىن ۇيىمداستىرىلىپ كەلەدى. بۇگىنگى جوبا – ەرتەڭگى ءبىر-ءبىر بيزنەس. ءبىز ۇلەستىرگەن گرانتتار ارقىلى ولار بيزنەستەگى العاشقى قادامىن جاسايدى. ءوز ىستەرىن جۇزەگە اسىرۋ ارقىلى ەل ەكونوميكاسىن دامىتادى. جەڭىمپازداردىڭ كاسىبىنە كەڭ ءورىس تىلەيمىن», دەيدى قالالىق ءماسليحات توراعاسى التىنتورە جانگەلدى ۇلى.
قاراعاندى قالاسى اكىمىنىڭ جاستار اراسىنداعى كاسىپكەرلىكتى دامىتۋعا جانە قولداۋعا ارنالعان گرانتى ءۇشىنشى جىل قاتارىنان بەرىلىپ وتىر. وسى ۋاقىت ارالىعىندا 118 جاس كاسىپكەر ءوز بيزنەسىن باستاعان. وسى جولى قالا اكىمىنىڭ 1 500 000 تەڭگە گرانتىن 10 كاسىپكەر يەلەندى. اسىرەسە تىڭ جوبانىڭ يەسى الەكساندر ەرمولەنكونىڭ جوبا-جوسپارى بىردەن قولداۋ تاپقان. ول 3D پرينتەر ارقىلى ارنايى قاجەتتىلىكتەرى بار ادامدارعا پروتەز جاسايدى. گرانت قاراجاتىن سوعان جۇمسايدى.
«بۇل ءىستى كوپ ۋاقىتتان بەرى ويلاپ جۇرگەنمىن. 3D تەحنولوگيانىڭ مۇمكىندىگى مول بولىپ تۇر. سونى يگەرىپ الىپ, ەرەكشە قاجەتتىلىگى بار جاندارعا پروتەز جاساۋدىڭ جوباسىن ازىرلەدىم. ارينە, جۇزەگە اسىرۋ ءۇشىن العاشقى كومەك, ياعني قارجى كەرەك. بىردەن قالا اكىمىنىڭ گرانتىنا ءوتىنىش جولدادىم. راسىمەن, قازىر بيزنەستەگى باسەكەلەستىك جوعارى بولىپ تۇر عوي. بىراق جوبامنىڭ ەرەكشە قاجەتتىلىگى بار جاندارعا سەپتىگى تيەتىن بولعاندىقتان, گرانت يەگەرى اتاناتىنىما سەنىمدى بولدىم. گرانت اقشاسىنا پرينتەر, كەرەك-جاراعىمدى الامىن. ىسكە كىرىسىپ, ءۇمىتتى اقتاۋ كەرەك», دەيدى الەكساندر ەرمولەنكو.
كونكۋرس كوميسسياسىنىڭ توراعاسى, قالا اكىمىنىڭ ورىنباسارى داستان قۇداباەۆ بيزنەستىڭ ءتۇرلى باعىتى بويىنشا ءوتىنىم تۇسكەنىن, جۇزدەن جۇيرىك شىققان جوبالارعا ۇلكەن سەنىم ارتىلاتىنىن ايتتى.
«سىزدەر كاسىپكەرلىك جولدى تاڭدادىڭىزدار. بۇل – ءبىزدىڭ قالامىزدىڭ الەۋمەتتىك-ەكونوميكالىق دامۋىنداعى وتە ماڭىزدى باعىت. جاستاردىڭ ءوز ءىسىن قۇرۋعا جانە دامىتۋعا دەگەن ۇمتىلىسى بار. اسىرەسە بيىلعى تۇسكەن وتىنىمدەر بىرىنەن-ءبىرى وتەدى. سونىڭ ىشىنەن سىزدەردى ۇزدىك دەپ تاڭدادىق. سىزدەرگە ەندى ۇلكەن ءۇمىت ارتىلدى. جالپى ايتقاندا, گرانتتى ءوز ءىسىن جاڭا باستاعان كاسىپكەرلەر ءۇشىن ەلەۋلى قولداۋ دەپ بىلەمىز. ەندى ەلگە پايدالارىڭىز ءتيىپ, كاسىپتەرىڭىز وركەن جايسىن», دەدى قالا اكىمىنىڭ ورىنباسارى داستان امانگەلدى ۇلى.
كونكۋرسقا تاعام تۇرلەرى بويىنشا جوبا تاپسىرعاندار اراسىنان جازيرا دارىبايقىزى قولداۋ تاپتى. ول قۇرتتىڭ جيىرمادان استام ءتۇرىن وندىرەدى. تۇيەنىڭ, ەشكىنىڭ, سيىردىڭ سۇتىنەن جاسايدى. ودان بولەك, سارىماي, قايماق, جەنت, قىمىز سەكىلدى اۋىل شارۋاشىلىعى ونىمدەرىن ازىرلەيدى. «ۇلتتىق تاعامىمىزدىڭ قولداۋ تاپقانىنا قۋانىشتىمىن», دەيدى ول.
جوباما بار كۇشىمدى سالدىم. اۋىل شارۋاشىلىعى ونىمدەرىنە قولداۋ كەرەكتىگىن دالەلدەدىم دەسەم دە بولادى. ۇلتتىق تاعامنىڭ قۇنارى وتە جوعارى. بويىندا بارلىق دارۋمەن بار. ءبىز سەكىلدى جاس كاسىپكەرلەردى قولداپ, قاراجات بەرگەن قالا اكىمدىگىنە ايتار العىسىمىز شەكسىز», دەيدى گرانت يەگەرى جازيرا دارىبايقىزى.
قاراعاندى وبلىسى