قاراعاندى وبلىسىنداعى «الماتى-استانا» تاس جولىندا (الماتى-ەكاتەرينبۋرگ) جولاۋشىلار اۆتوبۋسى مەن جەڭىل كولىك سوقتىعىسىپ, ءۇش ادام كوز جۇمدى, دەپ حابارلايدى Egemen.kz.
ءدال وسى تراسسادا 14 شىلدە كۇنى جولاۋشىلار اۆتوبۋسىنىڭ قاتىسۋىمەن جانتۇرشىگەرلىك جول اپاتى بولىپ, بەس ادام قازا تاپقان ەدى. وبلىستىق پوليتسيا دەپارتامەنتىنىڭ ءباسپاسوز قىزمەتى جول قوزعالىسى ەرەجەلەرىن ساقتاۋ قاجەتتىگى تۋرالى بىرنەشە رەت ەسكەرتۋ جاساعانىمەن جولدىڭ وسى بولىگىندە ادام ولىمىنە اكەلەتىن جول-كولىك وقيعالارى جالعاسىپ جاتقانىن اتاپ ءوتتى.
الەۋمەتتىك جەلىدە وقيعا ورنىنان تۇسىرىلگەن كادرلار پايدا بولدى.
رەسمي مالىمەت بويىنشا, 17 شىلدە كۇنى تاڭعى ساعات 06:00 شاماسىندا «الماتى-ەكاتەرينبۋرگ» تاس جولىندا اقسۋ-ايۋلى اۋىلىنان بەس شاقىرىم جەردە كەلە جاتقان Chery Tiggo كولىگى مەن Van Hool اۆتوبۋسى سوقتىعىسقان.
كادرلاردا بايقالعانداي, جەڭىل كولىك سوققى اسەرىنەن بىرنەشە بولشەككە ءبولىنىپ كەتكەن.
جان تۇرشىگەرلىك وقيعا سالدارىنان Chery Tiggo كولىگىنىڭ جۇرگىزۋشىسى مەن ەكى جولاۋشىسى العان جاراقاتتارىنان وقيعا ورنىندا كوز جۇمدى, تاعى ءۇش جولاۋشى مەن اۆتوبۋس جۇرگىزۋشىسى اۋرۋحاناعا جەتكىزىلدى. وقيعا كەزىندە اۆتوبۋستا 51 ادام بولعان.
«اتالعان فاكتى بويىنشا قىلمىستىق ءىس قوزعالدى. قاجەتتى ساراپتامالار تاعايىندالدى, تەرگەۋ امالدارى جۇرگىزىلىپ جاتىر. ايتا كەتۋ كەرەك, جازدا ءبىر عانا «الماتى - ەكاتەرينبۋرگ» تاس جولىندا كۇنىنە 33 مىڭعا دەيىن كولىك جۇرەدى. ەكيپاج سانى 22 بريگاداعا دەيىن ۇلعايتىلدى, ال جوعارىدا اتالعان كولىكتەردىڭ ەكى جۇرگىزۋشىسىن دە قاراعاندى وبلىسى اۋماعىنداعى پاترۋلدىك پوليتسيا باتالونىنىڭ قىزمەتكەرلەرى توقتاتىپ, جول قوزعالىسى ەرەجەلەرىن ساقتاۋدى ەسكەرتكەن ەدى», دەپ حابارلادى قاراعاندى وبلىسى ءىىد ءباسپاسوز قىزمەتى.
قاراعاندى وبلىسىنىڭ پوليتسيا دەپارتامەنتى جول قوزعالىسىنا قاتىسۋشىلاردى قىراعى بولۋعا جانە بەلگىلەنگەن جىلدامدىقتى قاتاڭ ساقتاۋعا شاقىرادى.
«جول بەلگىلەرى مەن تاڭبالارعا ءمان بەرىڭىزدەر, جول قاۋىپسىزدىگى ارقايسىمىز ءۇشىن ماڭىزدى», دەدى قاراعاندى وبلىسىنىڭ پوليتسەيلەرى جۇرگىزۋشىلەرگە.