استانا پوليتسەيلەرى ادام ۇرلاۋ فاكتىسىنە قاتىستى تۇسىنىكتەمە بەردى, دەپ حابارلايدى Egemen.kz.
پوليتسەيلەر اتالعان فاكتىگە قاتىستى قىلمىستىق ءىس قوزعالىپ, تەرگەۋ امالدارى جۇرگىزىلىپ جاتقانىن راستادى. قازىرگى ۋاقىتتا سۋدياعا قوقان-لوققى كورسەتكەن ازامات ىزدەستىرىلىپ جاتىر.
«قالالىق پوليتسيا دەپارتامەنتى استانا تۇرعىنىن بوپسالاۋ جانە ۇرلاۋ فاكتىسى بويىنشا سوتقا دەيىنگى تەرگەۋ امالدارىن جۇرگىزىپ جاتىر. سوتقا دەيىنگى تەرگەپ-تەكسەرۋ مۇددەسى ءۇشىن وزگە مالىمەتتەر جاريالانبايدى», دەدى ۆەدومستۆو وكىلدەرى.
ايتا كەتەيىك, بەلگىسىز بىرەۋ استانا قالاسىنىڭ ازاماتتىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ايدوس ورداباەۆتان ءىرى كولەمدە اقشا بوپسالاعانى تۋرالى اقپارات Kozachkov offside Telegram-ارناسىندا جاريالانعان ەدى.
اقپاراتقا سۇيەنسەك, بەتپەردە كيىپ, قولىنا قارۋ ۇستاعان بەلگىسىز بىرەۋ سۋديا ورداباەۆقا جاقىنداپ كەلىپ, ونى كولىككە مىنگىزىپ اكەتكەن. قارۋلى ازامات سۋدياعا ونىڭ وتباسى مەن بالالارى تۋرالى بىلەتىنىن ايتىپ, ءىرى كولەمدە اقشا بەرۋىن تالاپ ەتكەن. ورداباەۆ ءوزىنىڭ اتىنان 300 مىڭ تەڭگە نەسيە الىپ بەرگەن. سونداي-اق قىلمىسكەر كەيبىر سوت اكتىسى جويىلماسا, ونى ولتىرەمىن دەپ قورقىتىپ, تاعى 12 ميلليون تەڭگە بەرۋىن تالاپ ەتكەن.