قاراعاندى وبلىسىنا جۇمىس ساپارى اياسىندا «Respublica» پارتياسىنان سايلانعان ءماجىلىس دەپۋتاتى دينارا ناۋموۆا وبلىستىق كوپبەيىندى بالالار اۋرۋحاناسى مەن وبلىستىق مەكتەپ-ينتەرناتقا باردى.
2023 جىلدىڭ 1 ماۋسىمىنان باستاپ وبلىستىق كوپسالالى بالالار اۋرۋحاناسىنىڭ زاماناۋي جاڭا عيماراتى بوي كوتەرگەن. مەكەمە جاڭا كت جانە مرت اپپاراتتارىمەن, زاماناۋي رەنتگەن جانە ۋلترادىبىستىق قۇرىلعىلارمەن, سونداي-اق جاپوندىق كۇيىككە قارسى توسەكتەرى بار وزىق مەديتسينالىق جابدىقتارمەن جابدىقتالعان. وپەراتسيا جاسايتىن بولىمدەر 4K دەڭگەيىندەگى بەينە-ەندوسكوپيالىق كەشەندەرمەن, اۆتونومدى جەلدەتكىشپەن جانە ەڭ كۇردەلى وپەراتسيالاردى جۇرگىزۋگە مۇمكىندىك بەرەتىن نەرا-فيلترلەرى بار لامينارلى توبەلەرمەن جابدىقتالعان.
«قامقورلىق» وڭالتۋ ورتالىعىنىڭ اشىلۋى ەڭ كىشكەنتاي ناۋقاستاردى قولداۋ ءۇشىن ماڭىزدى قادام دەۋگە بولادى. بۇل جەردە بالالار تۋعاننان ءۇش جاسقا دەيىن وڭالتۋ كومەگىن الا الادى. سونداي-اق 2023 جىلدىڭ قازان ايىندا نەيروحيرۋرگيالىق جانە تراۆماتولوگيالىق جاڭا بولىمشەلەردىڭ اشىلۋى ەلدىڭ تۇكپىر-تۇكپىرىنەن كەلەتىن ءتۇرلى جاراقاتى بار بالالارعا قاجەتتى كومەكتى كەدەرگىسىز الۋعا مۇمكىندىك بەرەدى.
– ارىپتەستەرىممەن 18 جاستان كەيىن وڭالتۋ ماسەلەلەرىنە قاتىستى وزەكتى سۇراقتاردى تالقىلادىق. ويتكەنى وسى جاسقا دەيىنگى جاعداي بويىنشا ءبىز ايتارلىقتاي جەتىستىككە قول جەتكىزدىك. الايدا جۇيە 18 جاستان كەيىنگى جاعدايدى پىسىقتاۋدى قاجەت ەتەدى. ءبىز الداعى جۇمىسىمىزدا ەسكەرەتىن كوپتەگەن جاعىمدى تۇستاردى اتاپ وتتىك. قارىم-قاتىناسىمىز مۇنىمەن اياقتالمايدى. ءبىز جاستاردىڭ تۇرمىس جاعدايى مەن ءومىر ساپاسىن جاقسارتۋعا كومەكتەسەتىن زاڭنامالىق باستامالاردى, باسقا دا ماسەلەلەلەردى بىرلەسىپ تالقىلاۋدى جالعاستىرامىز, – دەدى دينارا ناۋموۆا.
سونىمەن قاتار دەپۋتات قاراعاندى وبلىستىق مەكتەپ-ينتەرناتىندا بولىپ, وبلىس بويىنشا 160 بالانى قامتيتىن مەكتەپ كابينەتتەرىنىڭ جۇمىسىمەن تانىستى. دەپۋتات مۇگەدەك بالالارعا قىزمەت كورسەتۋ باعىتىندا مەملەكەت-جەكەشەلىك ارىپتەستىكتى رەتتەۋ تۋرالى ينتەرنات باسشىلىعىنىڭ ۇسىنىستارىنا نازار اۋداردى.