وڭىرگە ورتاق تاجىريبە

ەنەرگەتيكا سالاسىنىڭ كوش­باسشى­لارىن بىرىكتىرەتىن كاسىبي حالىقارالىق پلاتفورما ايماقتاعى نەگىزگى ءوندىرۋشى كاسىپورىندار باسشىلارىنىڭ, باقى­لاۋشى ورگاندار وكىلدەرىنىڭ, ينۆەس­تورلاردىڭ, جەتەكشى قۇرال-جابدىق كومپانيالارىنىڭ, تەحنولوگيا لي­تسەنزيارلارىنىڭ, سونداي-اق ينجەنەر­لىك-كونسترۋكتورلىق, قۇرىلىس كاسىپ­ورىندارىنىڭ نازارىن اۋداردى. ەنەر­گەتيكا مينيسترلىگى مەن «سامۇرىق-ەنەرگو» اق ستراتەگيالىق ارىپتەستىگىمەن «Vostock Capital» كومپانياسى ۇيىم­داستىرعان ءىس-شا­راعا ءوز ەلىمىزدىڭ, قىر­عىز­ستاننىڭ, وزبەكستاننىڭ جانە تاجىكستاننىڭ ەنەرگەتيكا سالاسىنىڭ ماماندارىمەن قاتار ەۋروپا, ءباا, قىتاي, جاپونيا, تۇركيا جانە باسقا دا مۇددەلى ەلدەردەن كەلگەن تەحنولوگيا مەن جابدىق جەتكىزۋشىلەر جينالدى.

ايماق ەلدەرى اراسىنداعى ىنتىماق­تاستىقتى نىعايتۋعا ىقپال ەتەتىن جيىن­دا جىلۋ ەنەرگەتيكاسى سالاسىنداعى سىن-قاتەرلەر مەن ستراتەگيالارعا دەن قويىلدى. ورتاق ديالوگ وڭىردەگى ەنەرگەتيكالىق جانە ەكولوگيالىق قاۋىپسىزدىك, جۇمىس ىستەپ تۇرعان جىلۋ ستانسالارىنىڭ سەنىمدىلىگى, جىلۋ ەلەكتر ورتالىقتارىنىڭ كومىردەن گازعا اۋىسۋىنىڭ پراكتيكالىق جوبالارىندا كومىرتەگى بەيتاراپتىعىنا قول جەتكىزۋ مىندەتىن ەسكەرە وتىرىپ, توزىعى جەتكەن ستانسالاردى تەحنيكالىق قايتا جاراقتاندىرۋدى, ولاردى جاڭعىرتۋ بارىسىنداعى زاماناۋي يننوۆاتسيالىق شەشىمدەردى تالقىلاۋعا نەگىزدەلدى.

جەو تيىمدىلىگىن ارتتىرۋ باعىتىن­داعى تاجىريبەمەن الماسۋ بارىسىندا جوبالاردى ىسكە اسىرۋ ماقساتىندا قابىل­دانىپ جاتقان تاسىلدەرمەن تانى­سۋعا دەگەن قىزىعۋشىلىعىن ەسكەرە وتىرىپ, قاتىسۋشىلارعا الماتىداعى ەڭ ءىرى ا.جاقۇتوۆ اتىنداعى 2-جەو-عا ەكسكۋرسيا ۇيىمداستىرىلدى. «الەس» اق قۇرامىنا كىرەتىن بۇل ستانسا وتىندى كومىردەن گازعا اۋىستىرۋمەن جاڭعىرتۋدىڭ باستاپقى كۇردەلى كەزەڭىنەن ءوتىپ جاتقانى ءمالىم. ياعني كوپتەگەن قارجىلىق, تەحنيكالىق-تەحنولوگيالىق, تسيفرلىق, ەكونو­ميكالىق, لوگيستيكالىق مىندەتتەردى شەشۋ كەرەك. جەو-2-دەگى قايناعان جۇمىس ەنەرگەتيكانىڭ پارنيكتىك گاز شىعارىندىلارىن بىرتىن­دەپ تو­مەندەتۋگە جانە كومىرتەگى بەيتا­راپ­تىعىنا قول جەتكىزۋگە كوشۋى­­نىڭ كوپقىرلى اسپەكتىلەرى مەن قيىندىق­تارىن ايقىن كورسەتتى.

2-جەو ماماندارى نىساننىڭ تاريحىمەن تانىستىرىپ, جابدىقتار مەن باسقا دا ماڭىزدى قوندىرعىلاردىڭ ەرەكشەلىكتەرىن كاسىبي تۇرعىدا اڭگىمەلەپ بەردى. قاتىسۋشىلار نەگىزگى قالقان باسقارماسىن, تۋربينالىق تسەحتى, №1 باسقارۋ قالقان بلوگىن, اشىق تاراتۋ قۇرىلعىسىنىڭ ترانسفورماتورلارىن جانە سالىنىپ جاتقان جاڭا ستانسا نىسانىن ارالاپ كوردى.

سونىمەن قاتار 2-جەو-دا بەكىتىلگەن كەستەگە سايكەس جابدىقتاردىڭ سەنىم­دىلىگىن ارتتىرۋعا جانە الداعى جىلىتۋ ماۋسىمىندا ستانسانىڭ تۇراقتىلىعىن قام­تاماسىز ەتۋگە باعىتتالعان جوندەۋ جۇمىستارى كەڭ قارقىن الدى. بۇل اعىم­داعى, ورتاشا جانە كۇردەلى جوندەۋ جۇمىستارىن قوسا العاندا, ستانسانىڭ تۋربينالىق, قازاندىق اگرەگاتتارىن قالىپقا كەلتىرۋدىڭ ەداۋىر كولەمىن قامتيدى. قازىرگى كەزدە «ەنەرگوجوندەۋ» وجك ماماندارىنىڭ كۇشىمەن 2 قازان­دىق اگرەگات, 3 تۋربينالىق اگرەگات جانە 5 ترانسفورماتور جوندەۋدەن ءوتتى. ورتالىقتى جاڭعىرتۋ مەن گازعا اۋىستىرۋ بويىنشا جۇرگىزىلىپ جاتقان جۇمىس­تاردىڭ ويداعىداي اياقتالىپ, قالا ەكولوگياسىن جاقسارتۋعا ىقپال ەتۋى الماتى ەنەرگەتيكتەرىنىڭ يگى ماقساتقا جەتۋدەگى ارشىندى قادامى بولماق.