ۋاقىت تالابىنا ساي كەڭسەدەگى جۇمىس ورنىنا سۇرانىس تومەندەپ, اركەز وزەكتىلىگىن جوعالتپايتىن جۇمىسشى ماماندىعىنىڭ ءمانى ارتتى. ونسىز تاۋار ءوندىرۋ, ءۇي سالۋ, ينفراقۇرىلىم تارتۋ جانە باسقا دا كوپتەگەن ماڭىزدى جۇيەنىڭ ۇزدىكسىز قىزمەتىن قامتاماسىز ەتۋ مۇمكىن ەمەس.
بيىل 1-توقساندا ەكونوميكانىڭ ءتۇرلى سالاسىندا 9,2 ملن ادام ەڭبەك ەتسە, ونىڭ 7 ملن-ىن جالدامالى جۇمىسشىلار قۇرادى (جۇمىسپەن قامتىلعانداردىڭ جالپى سانىنىڭ 76,2%-ى). 2,2 ملن ادام ءوز بەتىمەن كىرىس كوزىن تاپتى (جۇمىسپەن قامتىلعانداردىڭ جالپى سانىنىڭ 23,8%-ى).
وتكەن جىلدىڭ سايكەس مەرزىمىمەن قاتار قويعاندا ەلدە جۇمىسپەن قامتۋ 134,6 مىڭ ادامعا, نەگىزىنەن جالدامالى جۇمىسشىلار ەسەبىنەن ارتقان. جۇمىسپەن قامتىلعانداردىڭ ەڭ كوپ ۇلەسى ساۋدا (16,8%), ءبىلىم بەرۋ (13,1%), ونەركاسىپ (12,3%) جانە اۋىل شارۋاشىلىعى (11,1%) سالالارىندا بايقالدى. سونىمەن بىرگە ەڭبەك رەسۋرستارى نارىعىندا نەگىزىنەن كاسىبي داعدىنى عانا قاجەت ەتەتىن ورتا جانە تومەن بىلىكتى قىزمەتكەرلەرگە سۇرانىس كوبەيدى. بيىلعى ساۋىردە Enbek ەلەكتروندى بيرجاسىندا باسىم بولىگى وسىنداي 90 مىڭنان استام ۇسىنىس ورنالاستىرىلعان. جۇمىستىڭ بۇل باعىتى قىزمەتكەردىڭ ءبىلىمى مەن ەڭبەك وتىلىنە ارنايى تالاپ قويمايتىنىمەن ەرەكشەلەنەدى. بۇل جاس ماماننىڭ نەمەسە جاڭا سالادا ءوزىن سىناپ كورۋدى ۇيعارعان ادامنىڭ ەڭبەك جولىن جەڭىلدەتىپ, كاسىپتى قىسقا مەرزىمدە يگەرۋىنە جاعداي جاسايدى.
OLX حابارلاندىرۋلار سەرۆيسى مەن ەnbek ەلەكتروندى بيرجاسىنىڭ دەرەگىنشە, قازىر ونەركاسىپ, قۇرىلىس جانە تكش سالاسىندا جۇمىس كۇشىنە قاجەتتىلىك تۇراقتى تۇردە ءوسىپ كەلەدى. ەڭ تانىمال ءوندىرىس پوزيتسياسىنا (523 ۇسىنىس) دانەكەرلەۋشى, اعاش ۇستاسى, قويماشى, ءوندىرىس مەنەدجەرى جانە كاسىپورىنداعى جۇمىس ۇدەرىسىنىڭ باسقا دا وكىلدەرى اينالىساتىن ماماندىقتار كىرەدى. ناقتى ماماندىق پەن جۇمىس بەرۋشىگە بايلانىستى جالاقى ورتاشا ەسەپپەن 255 000 تەڭگە كولەمىندە. قۇرىلىس الاڭدارىندا جانە جوندەۋ بريگادالارىندا كادرلارعا تۇراقتى قاجەتتىلىكتى ورتاشا جالاقىسى 250 000 تەڭگەنى ۇسىناتىن 580 بوس جۇمىس ورنى بويىنشا اتاپ وتۋگە بولادى. ونەركاسىپتىك كاسىپورىندار مەن قۇرىلىس-جوندەۋ كومپانيالارىندا ەلەكتر-گازبەن دانەكەرلەۋشىگە جوعارى سۇرانىس 562 بوس جۇمىس ورنى بويىنشا بايقالادى. ەڭبەكاقى تولەۋ دەڭگەيىنە اسەر جۇمىس تاجىريبەسىنە, بىلىكتىلىگىنە جانە دانەكەرلەۋ تۇرىنە سايكەس وزگەرىپ, ورتاشا ەسەپپەن 250 000 تەڭگەنى قۇرايدى. سونداي-اق ونەركاسىپ كاسىپورىندارىنىڭ جوندەۋ شەبەرحانالارىنا قاجەت سلەسار ءۇشىن وسىنداي ەڭبەكاقىمەن 530 بوس جۇمىس ورنى بار.
ەشقاشان ەسكىرمەيتىن جۇرگىزۋشى (تاكسي, جۇك تاسىمالداۋ, لوگيستيكا) ماماندىعى بويىنشا جاڭا قىزمەتكەرلەرگە 300 000 تەڭگە ورتاشا جالاقىمەن OLX-تە 505, ەnbek-تە 617 بوس جۇمىس ورنى ۇسىنىلعان. سونداي-اق قىزمەت كورسەتۋ دە – ءاردايىم قاجەت, كوكجيەگى كەڭ سالا. ساتۋشى, داياشى جانە اكىمشى سياقتى ماماندىقتاردى قامتيتىن سەكتور 200 000 تەڭگە مەدياندى جالاقى تولەۋگە ءازىر. كەز كەلگەن مەكەمەنىڭ ەرەجەسى مەن ءتارتىبىن رەتتەيتىن اكىمشىلەر ءۇشىن ورتاشا 240 000 تەڭگە جالاقىمەن 155 بوس جۇمىس ورنى بار. ال اسپازدار 264 جاڭا جۇمىس ورنىن تولىقتىرا الادى (ورتاشا جالاقى – 260 000 تەڭگە). ارينە, جۇمىسشى جالاقىسىنىڭ دەڭگەيى ءار ءوڭىر بويىنشا, بىلىكتىلىككە جانە جۇمىس ەرەكشەلىگىنە بايلانىستى اۋىتقيدى.
ەكونوميكانىڭ تەپە-تەڭدىگى مەن تيىمدىلىگىن ساقتاي وتىرىپ, «كوگىلدىر جاعالىلار» ماڭىزدى الەۋمەتتىك ءرول اتقارادى. ولاردىڭ مىندەتىنە تاۋار ءوندىرۋ مەن جەتكىزۋ, تەحنيكالىق قىزمەت كورسەتۋ مەن جوندەۋ سياقتى قول ەڭبەگى مەن ارنايى داعدىلارعا نەگىزدەلگەن ءارتۇرلى كۇندەلىكتى تاپسىرمالار كىرەدى. مامان ەڭبەگىنىڭ ءوندىرىس ۇدەرىسىنە جانە ءارتۇرلى سالانىڭ جۇمىسىنا ايتارلىقتاي اسەر ەتەتىنىن ەسكەرسەك, ونىڭ قوعام دامۋىنداعى ۇلەسىن سالماقتاۋ قيىن ەمەس.