سقو-نىڭ بايتەرەك اۋىلىندا بەس جاسار قىز ۇيىنەن شىعىپ كەتىپ, جوعالىپ كەتكەن. ءبۇلدىرشىندى پوليتسەيلەر جەزقازعان-پەتروپاۆل تاسجولىنىڭ بويىندا, ۇيىنەن 5 شاقىرىم جەردەن تاپتى, دەپ حابارلايدى Egemen.kz.
بايتەرەك اۋىلىنىڭ تۇرعىندارى 102 ارناسىنا حابارلاسىپ 5 جاسار قىزدىڭ جوعالىپ كەتكەنىن مالىمدەگەن. ءبۇلدىرشىننىڭ اتا-اناسى, تۋىستارى توڭىرەكتى تۇگەل قاراپ شىققان. ناتيجە بولماعاسىن, ءتارتىپ ساقشىلارىنىڭ كومەگىنە جۇگىنگەن.
«اۋداندىق پوليتسيا ءبولىمىنىڭ جەكە قۇرامى دەرەۋ ىزدەستىرۋ جۇمىستارىن باستاپ كەتتى. اۋىل ءىشىن ارالاۋ ناتيجە بەرمەگەن سوڭ, پوليتسەيلەر ىزدەستىرۋ اۋماعىن كەڭەيتتى. ناتيجەسىندە جوعالعان قىز بالا جەزقازعان-پەتروپاۆل تاسجولىندا پودگورنوە اۋىلى باعىتىندا شامامەن ۇيدەن 5 شاقىرىم جەردە تابىلىپ, امان-ەسەن اتا-اناسىنا قايتارىلدى», دەپ حابارلادى پوليتسيا.