قاراعاندى ايماعىنىڭ دارىندى وقۋشىلارى بيىلعى وقۋ جىلىن ويداعىداي اياقتادى. ولار وسى جىلى دا حالىقارالىق, رەسپۋبليكالىق دەڭگەيدەگى ءتۇرلى جارىستارعا قاتىسىپ, جوبالارىن ءساتتى قورعادى. تالانتتى جاستاردى قولداۋ ماقساتىندا جاقىندا عانا اشىلعان پريشاحتينسكىدەگى وقۋشىلار سارايىندا وبلىس اكىمى ەرماعانبەت بولەكپاەۆ بەيرەسمي كەزدەسۋ وتكىزىپ, ولارمەن ەمەن-جارقىن اڭگىمە ءوربىتتى. توپ جارىپ جۇرگەن بالالاردى ماراپاتتاپ, جارقىن جەتىستىكتەرگە قول جەتكىزە بەرۋگە تىلەكتەستىگىن جەتكىزدى.
دارىندى بالالاردىڭ باسقوسۋىندا حالىقارالىق, رەسپۋبليكالىق وليمپيادالار مەن عىلىمي جوبالاردىڭ 58 مەدال يەگەرى مەن ولاردىڭ ۇستازدارى ماراپاتتالدى. ءبىرىنشى ورىن – 200 مىڭ تەڭگە, ەكىنشى ورىن – 150 مىڭ تەڭگە, ءۇشىنشى ورىن – 100 مىڭ تەڭگە سەرتيفيكاتتارعا يە بولعان دارىندى وقۋشىلاردىڭ جەتەكشىلەرى العىس حاتتارعا يە بولدى.
– وبلىستىڭ ماقتانىشىنا اينالعان, رەسپۋبليكالىق, حالىقارالىق وليمپيادالار جانە عىلىمي جوبا سايىستارىنىڭ جۇلدەگەرلەرىمەن كەزدەسۋ داستۇرگە اينالدى. مەن ءۇشىن مۇنداي كەزدەسۋلەردىڭ ءمانى باسقا, ماعىناسى بولەك. ءبىز, ۇلكەندەر, بالامىزدىڭ ومىرلىك جولىنا قىزىعۋشىلىق تانىتىپ, ءار جەتىستىگىنە قۋانامىز. سىزدەر وزدەرىڭىزدىڭ بىلىمدەرىڭىزدىڭ ارقاسىندا ەرەكشەلەنىپ قانا قويماي, مەكتەپ بەدەلىن كوتەرىپ, وبلىستىڭ, ەلىمىزدىڭ مەرەيىن ۇستەم ەتتىڭىزدەر. جەتىستىكتەرىڭىزدى ەستىپ, ءبىر جاساپ قالامىز. سول سەبەپتى, بۇل كەزدەسۋ ەرەكشە جىلۋلىق پەن قۋانىش سىيلايدى. وبلىستا بالالاردىڭ ءبىلىم الۋىنا بارلىق جاعداي جاسالعان. حالىقارالىق, رەسپۋبليكالىق وليمپيادالاردان جۇلدەگەر اتانعان سىزدەردى كورىپ, بولاشاعىمىزدىڭ جارقىن ەكەنىنە سەنىم ارتامىز. سىزدەر لايىقتى ءبىلىم الىپ, ەلىمىزدى كوركەيتەدى دەگەن سەنىمدەمىن, – دەدى ايماق باسشىسى.
ەمىن-ەركىن اڭگىمە كەزىندە وقۋشىلار ويعا العان جوسپارلارىمەن ءبولىستى.
ماسەلەن, قاراعاندىداعى №30 مەكتەپتىڭ تۇلەگى, ۋليانا راديونوۆا ورىس ءتىلى مەن ادەبيەتى ءپانى بويىنشا رەسپۋبليكالىق وليمپيادانىڭ كۇمىس جۇلدەگەرى. الداعى ۋاقىتتا فيلولوگيا سالاسىندا ءبىلىمىن تەرەڭدەتكىسى كەلەدى. قارقارالى اۋدانى بەسوبا اۋلىنىڭ 11-سىنىپ وقۋشىسى ايدانا تولەگەن گەوگرافيا پانىنەن ۇزدىك ناتيجەلەرگە قول جەتكىزىپ, رەسپۋبليكالىق وليمپيادانىڭ التىن مەدالىن جەڭىپ العان ەدى. ايدانانىڭ پانگە دەگەن سۇيىسپەنشىلىگىن گەوگرافيا ءپانىنىڭ مۇعالىمى بولىپ قىزمەت ەتەتىن اكەسى ارتتىرعان. ايدانا «مەنەدجمەنت جانە باسقارۋ» ماماندىعى بويىنشا وقۋعا ءتۇسۋدى جوسپارلاپ وتىر.
ال ازيا-تىنىق مۇحيتى حالىقارالىق وليمپياداسىنىڭ جەڭىمپازى اتانعان, ماتەماتيكالىق عىلىمدار باعىتى بويىنشا وليمپيادانىڭ قولا جۇلدەگەرى, «مۇراگەر» مامانداندىرىلعان مەكتەپ-ليتسەي-ينتەرناتىنىڭ 10-سىنىپ وقۋشىسى جەڭىسبەك بەيبارىس وبلىس اكىمىنە جاڭا زاماناۋي وقۋشىلار سارايى ءۇشىن وقۋشىلاردىڭ اتىنان العىسىن ءبىلدىردى. ونىمەن قوسا, جاس عالىم «قالادان دا وسىنداي وقۋشىلار سارايى سالىنا ما؟» دەگەن ساۋالىن جولدادى.
ءوز كەزەگىندە ايماق باسشىسى جاس دارىندى جاڭا جەتىستىگىمەن قۇتتىقتادى. الداعى ۋاقىتتا جاس دارىنداردى دايارلايتىن مۇنداي سارايلاردىڭ بوي كوتەرەتىنىن ايتىپ, جاۋاپ بەردى.
— بۇگىندەرى قوسىمشا ءبىلىم بەرۋگە وتە ماڭىزدى كوڭىل ءبولىنىپ كەلەدى. بۇل جايلى پرەزيدەنت جىل سايىنعى جولداۋلارىندا اتاپ وتەدى. الداعى ۋاقىتتا پريشاحتينسك بالالارى ۇيىرمەلەر مەن سەكتسيالارعا قاتىسىپ, جاڭا دوستار تاۋىپ, عىلىم ۇيرەنۋگە جانە جان-جاقتى دامۋعا بولاتىن ەكىنشى ۇيلەرىنە اينالادى دەپ ۇمىتتەنەمىن. بۇل جۇمىستى ءارى قاراي دا جالعاستىرامىز. مايقۇدىق پەن تەمىرتاۋدا وقۋشىلارعا ارنالعان زاماناۋي سارايلار سالۋ ءارى بيىل بالقاش پەن وساكاروۆ اۋدانىندا قوسىمشا ءبىلىم بەرۋ ورتالىعىن اشۋ جوسپارىمىزدا بار, – دەدى ە.قابدۋلا ۇلى.
كەزدەسۋ كەزىندە وبلىس اكىمى وقۋشىلاردىڭ تالابىن شىڭداپ, ءبىلىمىن تەرەڭدەتىپ جۇرگەن ۇستازدار قاۋىمىنا العىس ايتتى.
– بۇگىن جاقسى كەزدەسۋ بولدى دەپ ەسەپتەيمىن. «ۇستازى جاقسىنىڭ ۇستانىمى جاقسى» دەگەن ءسوز بار. ءبىلىم بيىگىنەن كورىنىپ, جەتىستىككە جەتكەندەرىڭىز – مۇعالىمدەرىڭىزدىڭ ەرەن ەڭبەگىنىڭ ارقاسى. تالانتتى تاني ءبىلۋ, دارىندى اشا ءبىلۋ – مۇعالىمنىڭ شەبەرلىگى. جاس بولسا دا, تۋعان جەرلەرىنىڭ اتىن شىعارىپ جۇرگەن تالانتتى, دارىندى وقۋشىلارعا جانە ولاردى ءبىلىم بايگەسىنە دايىنداپ جۇرگەن ۇستازدارعا العىس بىلدىرەمىن, – دەدى ايماق باسشىسى.
ودان كەيىن ءسوز العان ن.نۇرماقوۆ اتىنداعى مامانداندىرىلعان مەكتەپ-ليتسەي-ينتەرناتىنىڭ ماتەماتيكا ءپانىنىڭ مۇعالىمى ەكاتەرينا نيپرۋك دارىندى شاكىرت تاربيەلەۋ ءار ۇستازدىڭ مىندەتى بولۋعا ءتيىس دەدى.
– ماتەماتيكا ءپانىنىڭ مۇعالىمىمىن ءارى بالالارعا ءۇش تىلدە ساباق بەرەمىن. بۇگىنگى كەزدەسۋگە وقۋشىلارمەن بىرگە قاتىسىپ وتىرعانىما قۋانىشتىمىن. سىزگە دە ۇلكەن العىس بىلدىرەمىز. جاس تالانتتارىمىز بۇگىنگى كەزدەسۋدەن سوڭ ارمەن قاراي تالابىن ارتتىرادى دەپ ويلايمىن. وقۋشىنىڭ تالانتىن تانىپ, ونى اشا ءبىلۋ – ءار مۇعالىمگە بەرىلگەن سىن, – دەدى ە.نيپرۋك.
مۇنىمەن قوسا, دارىندى بالالار ايماق باسشىسىنىڭ مەكتەپتە قالاي وقىعانىن, بوس ۋاقىتىندا نەمەن اينالىساتىنىن سۇراپ ءبىلدى. ماماندىق تاڭداۋ كەزىندە قانداي قاعيداتتارعا سۇيەنۋ كەرەكتىگىن سۇرادى. وبلىس اكىمى ەل ەرتەڭى سانالاتىن جاستارعا سەنىم كوپ ارتىلاتىنىن ايتىپ, ءجۇزىن شاتتىق بولەگەن بالالارمەن كەزدەسۋدەن ەرەكشە اسەر العانىن جەتكىزدى.
قاراعاندى وبلىسى