قاراعاندى قالاسى ءبىلىم ءبولىمىنىڭ ەرەكشە ءداستۇرى دەسەك تە بولادى, جىل بويى ۇزدىك دەپ تانىلعان وقۋشىعا «جىل وقۋشىسى» ماراپاتىن تابىستايدى. قازىلار القاسىنىڭ شەشىمىمەن بۇل جولعى جەڭىمپاز – قاراعاندىداعى ماعجان جۇماباەۆ اتىنداعى گيمنازيانىڭ 6-سىنىپ وقۋشىسى توقتار كارىباەۆ.
جىل سايىن وقۋ جىلىنىڭ سوڭىندا وبلىس ورتالىعىنداعى 80-نەن استام مەكتەپ وقۋشىسى اراسىنان ۇزدىك انىقتالادى. تالاپقا ساي, وقۋدا وزات بولۋىمەن قاتار ونەرلى, ورەلى, تالانتتى, تالاپتى بولۋى شارت.
توقتار ەرسىن ۇلى بايقاۋ بارىسىنداعى بىرنەشە كەزەڭنەن سۇرىنبەي, ۇزدىك شىققان. ەسسە جازۋدان, شەشەندىك ونەردەن قاتارلاستارىنىڭ الدى بولىپ, باسىم ۇپايمەن وق بويى وزىق شىقتى.
بايقاۋدى ۇيىمداستىرعاندار توقتاردىڭ ارتىستىك قابىلەتىنە ەرەكشە كوزدەرى تۇسكەنىن, ونەرگە, ونىڭ ىشىندە كينو جانە تەاتر سالاسىنا دەگەن قىزىعۋشىلىعىن ايرىقشا اتاپ ايتىپ وتىر.
توقتارعا بەس كەزەڭ بويى قولداۋ كورسەتكەن ۇستازى, سىنىپ جەتەكشىسى ەلميرا سىزدىقوۆا تالانتتى شاكىرتى توقتاردىڭ توپ جارعانىنا بەك قۋانىشتى ەكەنىن تولعانىسپەن جەتكىزدى.
– «جىل وقۋشىسى» سايىسى كۇزدە باستالىپ, جىل بويى جالعاستى. وقۋشىلار بەس تۋردان ءوتتى. ءبىلىمى, تالانتى, قارىم-قابىلەتى, قىزىعۋشىلىعى جاعىنان سىنعا ءتۇستى. جالپى ەسەپتە توقتار 497 ۇپايمەن العا شىقتى. قوعامنىڭ بار سالاسىنان حابارى بار تالانتتى وقۋشىمنىڭ ءبىلىم كوكجيەگى وتە كەڭ. كەز كەلگەن پانگە يكەمدى. تاريح پەن ادەبيەتتى ءسۇيىپ وقيدى. تاڭداۋى – تەاتر سالاسى. ال ارمانى – كينورەجيسسەر بولۋ, – دەيدى ەلميرا سىزدىقوۆا.
وقىرماننىڭ ەسىندە بولسا, جاقىندا گازەتىمىزگە «وقۋشىلاردىڭ ەرەكشە كۇندەلىگى» دەگەن اتاۋمەن ماقالا جازىپ, ءبىلىم سالاسىنداعى باسشىلاردىڭ تاراپىنان ۇلتتىق كۇندەلىككە قولداۋ كورسەتىلسە دەگەنبىز. كوپ ۇزاعان جوق, قالالىق ءبىلىم ءبولىمىنىڭ ادىسكەرلەرى توقتاردىڭ مۇعالىمى ەلميرا سىزدىقوۆانىڭ ەڭبەگىنە, جوباسىنا جان-جاقتى دەمەۋ كورسەتىپ, قالا مەكتەپتەرىنە ەنگىزەمىز دەگەن جاقسى جاڭالىق ايتقان ەدى. ەندى, مىنە, ءتول شاكىرتى توپ جارىپ جاتىر.
بالا توقتاردىڭ بيىكتەن كورىنۋى دە تەگىن ەمەس. ويتكەنى ەسىمى ءتۇبى ءبىر تۇركى جۇرتىنان شىققان تۇڭعىش عارىشكەر, حالىق قاھارمانى توقتار اۋباكىروۆتىڭ قۇرمەتىنە قويىلعان. بالا توقتاردىڭ تۇساۋىن باتىر توقتار كەسىپ, باتاسىن بەرگەن.
قاراعاندى وبلىسى