ونوماستيكاعا ىجداعاتتىلىقپەن قاراپ, ەلدىك ماسەلەنى نازاردان تىس قالدىرۋعا بولمايتىنى بەلگىلى. ويتكەنى شاماسى كەلسە كوكەسىنىڭ اتىنا كوشە, اتاسىنىڭ اتىنا اۋىل اتاۋىن بەرگىسى كەلەتىندەر از ەمەس. مۇنداي ماسەلەمەن, اسىرەسە, مينيسترلىك ءجيى ۇشىراسادى. مينيسترلىكتەر ۇيىنە ەلدەن قول جيناپ الىپ, ۇسىنىس جىبەرەتىندەر جەتىپ ارتىلادى.
كوميسسيا كەلىسىمى كۇشەيەدى
مەملەكەت باسشىسى ۇلتتىق قۇرىلتايدا ونوماستيكا سالاسىن تارتىپكە كەلتىرۋ جونىندە ايتقان بولاتىن. پرەزيدەنت تاپسىرماسىنا سايكەس ارنايى جول كارتاسى ازىرلەندى. ونوماستيكا قۇجاتتارىنا ءبىرشاما وزگەرىس ەنگىزىلدى. دەگەنمەن تاريحي تۇلعالار ءتىزىمىن تولىقتىرۋ, ەلدى مەكەندەرگە, كوشەلەرگە ات بەرۋ ماسەلەسىندە اتقارىلاتىن شارۋا ءالى دە كوپ. «Amanat» پارتياسى قاراعاندى وبلىستىق فيليالى عيماراتىنىڭ ءماجىلىس زالىندا وتكەن «وڭىرلىك ونوماستيكا ماسەلەلەرى» سەمينارىنداعى پىسىقتالعان بىرقاتار جۇمىس اتقارىلسا, وندا ونوماستيكانىڭ وڭالۋىنا وڭ اسەرىن تيگىزەدى.
القالى باسقوسۋدىڭ مودەراتورى بولعان مادەنيەت جانە اقپارات ۆيتسە-ءمينيسترى ەربول الىقۇلوۆ جوعارىداعى ماڭىزدى ماسەلەگە قاتىستى رەسپۋبليكالىق جۇمىس توبى قۇرىلعانىن, جەرگىلىكتى اكىمدىكتەرمەن بىرلەسىپ, ءبىرشاما شارانىڭ قولعا الىنعانىن جەتكىزدى.
– ماسەلەن, وبلىستىق ونوماستيكا كوميسسياسىنىڭ كەيبىر فۋنكتسيالارىن رەسپۋبليكالىق ونوماستيكا كوميسسياسىنىڭ قۇزىرىنا بەرۋ تۋرالى جۇمىستار جۇرگىزىلدى. الداعى ۋاقىتتا اۋىلدار مەن ەلدى مەكەندەرگە, كوشەلەرگە اتاۋ بەرۋ رەسپۋبليكالىق كوميسسيا كەلىسىمىمەن جۇزەگە اسىرىلاتىن بولادى. جۇمىس توبى مۇشەلەرى ەلىمىزدىڭ بەلگىلى ينستيتۋتتارىنىڭ عالىمدارىمەن بىرلەسىپ, سونداي-اق ورتالىق مەملەكەتتىك ارحيۆ مەكەمەسىمەن قولدانىستاعى تاريحي تۇلعالاردىڭ ءتىزىمىن, جەر-سۋ اتاۋلارىن جاڭادان پىسىقتايدى. جۇمىس توبى مۇشەلەرىنىڭ تاراپىنان قولدانىستاعى تاريحي تۇلعالار ءتىزىمىن وزەكتەندىرۋ بارىسىندا كەڭەس ءداۋىرى كەزىندەگى تاريحي ەسىمدەر قايتا قارالدى. جالپى العاندا, تىزىمدە 697 تۇلعا ەسىمى بار. ونىڭ 463-ءى رەسپۋبليكالىق دەڭگەيدە, 234-ءى وڭىرلىك دەڭگەيدە ۇلىقتالاتىن تۇلعالار, – دەدى ەربول الىقۇلوۆ.
مودەراتور ەلدى مەكەندەر مەن كوشەلەردى قايتا اتاۋ بويىنشا 2024–2028 جىلدارعا ارنالعان جول كارتاسى ازىرلەنگەنىن, ول مەملەكەتتىك قۇجاتتىڭ پرەزيدەنت اكىمشىلىگىنىڭ قاراۋىندا ەكەنىن جەتكىزدى.
وڭىردەگى اتاۋلار ءالى دە وزگەرەدى
قاراعاندى وبلىسى اكىمىنىڭ ورىنباسارى ەرلان قۇسايىن ونوماستيكا سالاسى بويىنشا ايماقتا اتقارىلعان جۇمىستاردى قىسقاشا اتاپ ءوتىپ, ۆيتسە-ءمينيستردىڭ, سەمينارعا قاتىسۋشىلاردىڭ نازارىنا ۇسىنىسىن جولدادى.
– بۇگىنگى كۇنى ۇلتتىق ونوماستيكا كەڭىستىگىن قالىپتاستىرۋعا ەل پرەزيدەنتى پارمەنىمەن ۇلكەن باسىمدىق بەرىلىپ وتىر. وبلىسىمىزدىڭ توپونيمدەرى دە باسقا وڭىرلەر سەكىلدى سان مىڭداعان جىلدار ءداۋىرىنىڭ جەمىسى. 2000 جىلداردىڭ باسىنان بەرى عىلىمي نەگىزدە جاسالعان جۇمىستار بارشىلىق. ارنايى ەتنوتوپونيميكالىق ەكسپەديتسيالار ۇيىمداستىرىلدى. ەتنوگرافيالىق دەرەكتەر دايىندالدى. فولكلورلىق ماتەريالدار جيناقتالدى. قازىنا قاريالارىمىزدىڭ اۋزىنداعى ەستەلىكتەر جازىپ الىندى. بيىل «جاڭارعان اتاۋلار» دەگەن اتپەن ارنايى انىقتامالىق توپتاما جارىققا شىعادى. 2014 جىلدان بەرى وبلىس اۋماعىندا 28 ەلدى مەكەن, 851 قۇرامداس بولىكتىڭ 76 مەكەنىنىڭ اتى اۋىستىرىلدى. جىلدار بويى مىزعىماي تۇرعان وكتيابر اۋدانىنا ۇلت كوسەمى ءاليحان بوكەيحاننىڭ ەسىمى, لەنين كوشەسىنە ابايدىڭ, كريۆوگۋز كوشەسىنە قاسىمنىڭ ەسىمى بەرىلدى, – دەدى ەرلان بەيسەمباي ۇلى.
ايماق باسشىسىنىڭ ورىنباسارى تاريحي تۇلعالار تىزىمىندە نۇركەن ءابدىروۆ, مارتبەك مامىراەۆ, پەتر تەراەۆ, امانتاي داۋلەتبەكوۆ سەكىلدى كەڭەس وداعىنىڭ باتىرلارى عانا بارىن, ەكىنشى دۇنيەجۇزىلىك سوعىسقا قاتىسقان قالعان 30 كەڭەس وداعىنىڭ باتىرى ەنبەي قالعانىن جەتكىزدى. كەلەر جىلى جەڭىستىڭ 80 جىلدىعىنا ورايلاستىرا وتىرىپ, باتىرلاردى تۇلعالاردىڭ تىزىمىنە قوسۋدى ۇسىندى. سونىمەن قوسا, بيىل كومپوزيتور, مەملەكەتتىك سىيلىق لاۋرەاتى, كسرو حالىق ءارتىسى سىدىق مۇحامەدجانوۆتىڭ 100 جىلدىعى. بىراق بۇل تۇلعا دا تىزىمدە جوق. وسىنى سەمينار قاتىسۋشىلارىنىڭ نازارلارىنا ۇسىندى.
وڭىردە الداعى ۋاقىتتا 2 ەلدى مەكەن, 9 قۇرامداس بولىكتىڭ اتاۋى وزگەرتىلەدى. سونىمەن بىرگە رەسپۋبليكالىق كوميسسياعا ساران, تەمىرتاۋ قالالارى مەن بۇقار جىراۋ اۋدانى بويىنشا 18 ءبىلىم بەرۋ ۇيىمدارىنا قايتا اتاۋ بەرۋ جونىندە ۇسىنىس حات جولدانعان. 9 مەكتەپتىڭ ءتيىستى قۇجاتتارى ازىرلەنىپ جاتىر.
جاڭا جوبا ونوماستيكانى وڭتايلاندىرادى
سەمينار بارىسىندا «تاريحي-دياحرونيالىق ءادىستى قولدانۋ ارقىلى ونوماستيكالىق اتاۋلاردى جۇيەلەندىرۋ قىزمەتى» جوباسىنىڭ تانىستىرىلىمى جاسالدى. مۇندا ءار ءوڭىردىڭ توپونيمدەرى جيناقتالىپ, ءار اتاۋدىڭ وتكەنى مەن قازىرگى جاعدايىنا عىلىمي ساراپتاما جاسالىپ, اتالۋ ءۋاجى مەن قاعيداتى, دامۋ دياحرونياسى زەردەلەنىپ, سونىمەن قاتار, ەلدى مەكەن, جەر-سۋلاردىڭ تاريحي اتاۋلارىن قالپىنا كەلتىرۋ جۇمىستارى جۇرگىزىلەدى. جوبا ناتيجەلەرى ەل توپونيمدەرىنىڭ ەلەكتروندى 3D فورماتتاعى كارتاسىنا ەنەدى.
– بيىلعى جوبانىڭ ماقساتتارىنىڭ ءبىرى رەتىندە زەرتتەۋ وڭىرلەرىنە تاريحي-تانىمدىق ەكسپەديتسيالار ۇيىمداستىرىلادى. ءدال وسى مەرزىمدە جەتىسۋ وبلىسىندا ەكسپەديتسيا ءجۇرىپ جاتىر. ەكسپەديتسيا قۇرامىنا «ونوماستار وداعىنىڭ» مۇشەلەرى, گەوگرافتار, تاريحشىلار كىردى. ەكسپەديتسيا بارىسىندا جەر, ەلدى مەكەندەردى ارالاپ, فوتوبەينە ماتەريالدار ءتۇسىرىلىپ, قورىتىندىسى رەتىندە تانىمدىق بەينەفيلم جانە وڭىرلىك سۋرەتتەر ارقىلى انىقتامالىق جاسالادى. تۇسىرىلگەن فوتوبەينە ماتەريالدار 3D كارتا بازاسىنا ەنىپ, جالپى قولدانىمعا ۇسىنىلادى. ونوماستار وداعىنىڭ عالىمدارى ءوز زەرتتەۋلەرىندە ەلىمىزدىڭ گەوگرافيالىق نىساندارى فوتوسۋرەتتەرىنىڭ ينتەرنەت جەلىسىندە وتە از نەمەسە جوق ەكەنىن بايقاپ, مۇمكىندىگىنشە كوپ فوتوسۋرەت جاساۋدى ماقسات قويدىق. سونىمەن بىرگە ەكسپەديتسيا بارىسىندا جاسالاتىن تانىمدىق بەينەفيلم سيۋجەتىنە جەرگىلىكتى حالىقپەن كەزدەسىپ, سۇحبات الىپ, حالىقتىق ەتيمولوگيا, اڭىز-اڭگىمەلەردى دە ەنگىزەمىز. بۇل ماتەريالداردىڭ ونوماستيكا اياسىنان كەڭىرەك ءتىل مەن تاريحقا, ەتنوگرافيا مەن ادەبيەت سالاسىنا دا قوسارى بولادى دەپ ويلايمىز, – دەدى «ونوماستار وداعى» قوعامدىق بىرلەستىگىنىڭ باسقارما توراعاسى, رەسپۋبليكالىق ونوماستيكا كوميسسياسىنىڭ مۇشەسى گۇلنار بەكەنوۆا.
جاڭا اتاۋلار كارتالاردا دا جاڭعىرتىلادى
ەرەكشە اتاپ ءوتۋ كەرەك, «2GIS» جانە «Yandex maps» ناۆيگاتسيالىق قۇرالدارداعى ونوماستيكالىق اتاۋلاردى ناقتىلاۋ جانە بىرىزدەندىرۋ ماسەلەسى بويىنشا بىرقاتار جۇمىس اتقارىلدى. «2GIS», «Yandex» كومپانيالارىنىڭ وكىلدەرىمەن بىرقاتار كەزدەسۋ وتكىزىلىپ, ارنايى جۇمىس توبى قۇرىلدى.
گەوسەرۆيستەردەگى ونوماستيكالىق اتاۋلاردى جانە گەوگرافيالىق وبەكتىلەر اتاۋلارىن زاڭدى تۇردە بەكىتىلگەن اتاۋلارىمەن ناقتىلاۋ جانە بىرىزدەندىرۋ ماسەلەسى بويىنشا Agile ادىستەمەسى شەڭبەرىندە مادەنيەت جانە اقپارات مينيسترلىگى جانە «ۇلتتىق اقپاراتتىق تەحنولوگيالار» اق-مەن بىرگە اكسەلەراتسيالىق توپ قۇرىلعان.
– ونوماستيكا جۇمىسىنىڭ كريتەريلەرىن وڭتايلاندىرۋ جانە ونوماستيكالىق كوميسسيامەن توپونيمدەردىڭ قايتالانۋىن بولدىرماۋ ماقساتىندا «ۇلتتىق اقپاراتتىق تەحنولوگيالار» اق-مەن بىرلەسىپ, «مەكەنجاي تىركەلىمى» اقپاراتتىق جۇيەسىنە پايدالانۋشىعا بىردەي اتاۋلاردى ايماق بولىنىسىندە ءسۇزۋ (فيلتر) جانە «ونوماست» ءرولىن قوسۋ ارقىلى ءتيىستى وزگەرىستەر ەنگىزىلدى. وسىلايشا, قازاقستان رەسپۋبليكاسىنىڭ مادەنيەت جانە اقپارات مينيسترلىگى جانە جەرگىلىكتى اتقارۋشى ورگاندارمەن بىرلەسىپ, اتالعان گەوسەرۆيستەردەگى ونوماستيكالىق جانە گەوگرافيالىق نىساندار اتاۋلارىن زاڭدى تۇردە بەكىتىلگەن اتاۋلارمەن قولدانۋ جانە كورسەتۋ مينيسترلىكتىڭ ۇدايى باقىلاۋىندا, – دەيدى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ باسقارما باسشىسى مايگۇل ابدىعالي.
اقمولا: تاريحي اتاۋلار قايتارىلدى
2020 جىلى «اقمولا وبلىسىنىڭ توپونيميكاسى» ەتنوتاريحي جانە توپونيميكالىق زەرتتەۋ باعدارلاماسى» اياسىندا اقمولا وبلىسىنىڭ توپونيميكالىق كەڭىستىگىن تاريح عىلىمدارىنىڭ دوكتورى, پروفەسسور جامبىل ارتىقباەۆ زەرتتەگەن. ول كوپتەگەن مونوگرافيا, انىقتاما, ماقالا مەن باسقا دا ەڭبەكتەردى جارىققا شىعارعان. ولاردىڭ اراسىندا «اقمولا ءوڭىرى توپونيمدەرى: تاريحي قاباتتارى, تابيعات اسەرى, تىلسىم سىرلارى», «اقمولا وبلىسى جەر-سۋ اتاۋلارىنىڭ قۇپيالارى», «اقمولا وبلىسى توپونيمدەرىنىڭ اتلاسى», «اقمولا وبلىسى ەلدى مەكەندەرىنىڭ سيپاتتاماسى» اتتى ەڭبەكتەرىن اتاۋعا بولادى. سول ەڭبەكتىڭ ارقاسىندا 80 ەلدى مەكەننىڭ تاريحي اتاۋى تابىلعان. بۇل تۋرالى اقمولا وبلىستىق ىشكى ساياسات باسقارماسىنىڭ ونوماستيكا جانە ءتىل ءبولىمىنىڭ باسشىسى ايگۇل تالپاقوۆا «اقمولا وبلىسىنداعى ەلدى مەكەندەردىڭ بايىرعى تاريحي اتاۋلارىنىڭ زەرتتەلۋى تۋرالى» اتتى بايانداماسىندا ايتتى.
– قازاقستان مەن رەسەي قالالارىنداعى ارحيۆتەردەگى ىزدەنىستىڭ ناتيجەسىندە تابىلعان اقمولا وبلىسىنىڭ بىرقاتار ەلدى مەكەننىڭ تاريحي اتاۋلارىنا قاتىستى قۇجاتتار مەن كارتالاردى جيناقتاپ, «اقمولا وبلىسىنىڭ تاريحي توپونيمدەرى» كىتابىن باسىپ شىعاردىق. كىتاپتا اقمولا وبلىسىنىڭ ونوماستيكالىق كەڭىستىگى بويىنشا جاڭا زەرتتەۋ ناتيجەلەرى ۇسىنىلعان. باسىلىمدا وبلىستىڭ اكىمشىلىك-اۋماقتىق بىرلىكتەرىنىڭ اتاۋلارى بويىنشا تاريحي دەرەكتەر كەلتىرىلگەن. ءوڭىردىڭ ونوماستيكالىق اتاۋلارىن زەرتتەۋدە نەگىزگى دەرەككوز رەتىندە ارحيۆ قۇجاتتارى, ەسكى توپوگرافيالىق كارتالار باسشىلىققا الىندى. بۇل قۇجاتتاردىڭ اراسىندا قونىس اۋدارۋ كارتالارى, قونىستانۋشىلاردى تىركەۋ قۇجاتتارى, قونىسقا ورنالاستىرۋ جانە ەسەپكە الۋ ۆەدوموستۆولارى, دالا گەنەرال گۋبەرناتورىنىڭ بۇيرىقتارى مەن قىزمەتتىك حات كوشىرمەلەرى بار. ناتيجەسىندە, 125 ەلدى مەكەننىڭ تاريحي اتاۋى تابىلدى. بۇگىنگى كۇنى اقمولا وبلىسى اۋماعىندا 30-دان ارتىق ەلدى مەكەنگە تاريحي اتاۋلارى قايتارىلدى, – دەدى ايگۇل دۇزەلبايقىزى.
پاۆلودار: ۇلىلار ەسىمىن ۇلىقتايدى
پاۆلودار وبلىسىندا 2015 جىلدان بەرى العاندا 773 كوشە, 44 ەلدى مەكەننىڭ اتاۋى وزگەرتىلىپتى. بىلتىردىڭ وزىندە-اق وبلىستىق ونوماستيكا كوميسسياسىنىڭ 2 وتىرىسى ءوتىپ, كوميسسيانىڭ قورىتىندىسى نەگىزىندە 145 كوشە, 1 كەنت, 8 اۋىل مەن 6 وكرۋگ قايتا اتالعان.
– جالپى العاندا, وڭىرلىك ەلدى مەكەندەردىڭ قازاق تىلىندەگى پايىزدىق كورسەتكىشى ەگەمەندىكتىڭ العاشقى كەزەڭىمەن سالىستىرعاندا تولىق 70 پايىزعا جەتىپ, تاۋەلسىزدىك العان جىلدارى 17 پايىزدى عانا قۇراعان قازاقشا كوشە اتاۋلارى, قازىرگى تاڭدا 52 پايىزدان اسقان جايى بار. بۇعان قوسا, سوڭعى 10 جىلدىڭ ىشىندە پاۆلودار وبلىسىنداعى 60 ءبىلىم بەرۋ جانە مادەنيەت نىساندارىنا رەسپۋبليكالىق ونوماستيكا كوميسسيانىڭ قورىتىندىسى نەگىزىندە شوقان ءۋاليحانوۆ, احمەت بايتۇرسىن ۇلى, مىرجاقىپ دۋلات ۇلى, سۇلتانماحمۇت تورايعىر ۇلى, ءماشھۇر ءجۇسىپ كوپەەۆ, مۇحتار اۋەزوۆ, باۋىرجان مومىش ۇلى, جىلبەك اعادىلوۆ, ناعىمبەك نۇرمۇحاممەدوۆ ءتارىزدى تاريحي تۇلعالاردىڭ ەسىمدەرى بەرىلدى, – دەدى ءوزىنىڭ بايانداماسىندا پاۆلودار وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى مەدەت تاۋاسقان.
ماڭعىستاۋ: جالعىز اۋىلدىڭ اتىن اۋىستىرادى
ماڭعىستاۋ وبلىسىندا 1991–2024 جىلدار ارالىعىندا يدەولوگيالىق تۇرعىدان ەسكىرگەن اتاۋلاردى وزگەرتۋ جانە تاريحي اتاۋلاردى قايتارۋ ماقساتىندا جۇيەلى جۇمىستار جۇرگىزىلىپ, جالپى 486 اتاۋ وزگەرتىلگەن (39 وبەكت, 447 اكىمشىلىك-اۋماقتىق بىرلىك پەن قۇرامداس بولىك).
ءبىر قىزىعى, ماڭعىستاۋ ءوڭىرى يدەولوگيالىق تۇرعىدان ەسكىرگەن اتاۋلارى بار ەلدى مەكەندەر مەن ولاردىڭ قۇرامداس بولىكتەرىن قايتا اتاۋ جونىندەگى 2022–2025 جىلدارعا ارنالعان جول كارتاسىنا ەنگىزىلمەگەن ەكەن. ويتكەنى وڭىردە اتاۋى ەسكىرگەن باۋتينو اۋىلى عانا بار. بۇگىندە ول اۋىلدىڭ اتاۋىن «بالىقشى» دەپ قايتا اتاۋ باعىتى بويىنشا زاڭناما تالاپتارىنا سايكەس, جەرگىلىكتى دەڭگەيدەگى جۇمىستار جۇرگىزىلىپ جاتىر.
– ماڭعىستاۋ تاريحىن, كونە ماعلۇماتتارىن, جەر-سۋ اتاۋلارىن ينتەرنەت رەسۋرسى ارقىلى بارشا جۇرتقا پاش ەتۋ ماقساتىندا «ماڭعىستاۋ وبلىسىنىڭ توپونيمياسى» – mangystau.atay.kz سايتىنىڭ قىزمەتى جالعاسادى. سايتتا ءوڭىردىڭ 2000-عا جۋىق جەر-سۋ اتاۋلارى, 500-دەن اسا قۇدىق پەن 85 بۇلاق كوزى, 250-دەن اسا قورىم قامتىلىپ, ولارعا قاتىستى اڭىز-اڭگىمەلەر جاريالانعان. ماسەلەلەرگە كەلەتىن بولساق, بۇگىنگى تاڭدا ءوڭىر تۇرعىندارىنان كوپتەگەن شاعىم ءتۇسىپ وتىر, ونىڭ ىشىندە, پرەزيدەنتكە, ۇكىمەتكە جازىلاتىن ارىزداردىڭ باسىم بولىگى – كىسى ەسىمدەرىن ۇلىقتاۋ جونىندە. ولارعا ناقتى جاۋاپ بەرۋدىڭ ءوزى قيىندىق تۋعىزادى. وسى رەتتە, «تاريحي تۇلعالار ءتىزىمىن» زاڭنامالىق تۇردە نورماتيۆتىك-قۇقىقتىق اكتىمەن بەكىتۋدى ۇسىنامىن. تاعى ءبىر ۇسىنىس – اكىمشىلىك-اۋماقتىق بىرلىكتەرگە, ەلدى مەكەندەردىڭ قۇرامداس بولىكتەرىنە اتاۋ بەرۋ كەزىندە ءتيىستى اۋماق حالقىنىڭ پىكىرىن ەسكەرۋ قاعيدالارىنا وزگەرىس ەنگىزۋ كەرەك. اتاپ ايتقاندا, تاريحي جەر اتاۋى تاريح ينستيتۋتىنىڭ رەسمي ساراپتامالىق اكتىسىمەن راستالسا جانە ونوماستيكا سالاسى بويىنشا ءتيىستى شتاتتىڭ بولىنۋىنە ىقپال ەتۋدى ۇسىنامىز, – دەدى ماڭعىستاۋ وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ابىلقايىر بايپاقوۆ.
سەمينار ءتۇيىنى
ونوماستيكا سالاسىنىڭ باعىت-باعدارى ايقىندالعان القالى باسقوسۋ سوڭىندا قاتىسۋشىلار ءوزارا پىكىر الماستى. مادەنيەت جانە اقپارات ۆيتسە-ءمينيسترى ەربول شىمكەنتباي ۇلىنا, اتالعان مينيسترلىكتىڭ ارحيۆ, قۇجاتتاما جانە كىتاپ ءىسى كوميتەتىنىڭ ونوماستيكا باسقارماسىنىڭ باسشىسى ەلەركە تورەحانعا, «ونوماستار وداعى» قوعامدىق بىرلەستىگىنىڭ باسقارما توراعاسى گۇلنار بەكەنوۆاعا قاتىسۋشىلار تاراپىنان ءبىرشاما ۇسىنىس جاسالدى. ءوز كەزەگىندە ۆيتسە-مينيستر سەميناردا كوتەرىلگەن ماسەلەنىڭ بارلىعىن جازىپ العانىن, سايكەسىنشە, سول بويىنشا جۇمىستى جانداندىرا تۇسەتىنىن جەتكىزدى.
ونوماستيكا وڭتايلانسا, ۇلتتىق مۇددە ۇلعايادى. ۇلتتىق قۇرىلتايدا مەملەكەت باسشىسىنىڭ بۇل ماسەلەگە ارنايى توقتالعانى دا – وسى. «ونوماستيكا بۇل – اتا-بابالارىمىزعا بايلانىستى يا بەلگىلى تۇلعالاردىڭ تۋىسقاندارىنىڭ ءىسى ەمەس. بۇل – مەملەكەتتىڭ شارۋاسى. وسى سالاداعى بارلىق ءراسىمدى ءىس جۇزىندە رەتتەۋ ماڭىزدى. وندا ايماقتاردىڭ ەرەكشەلىگىمەن قاتار, جالپىۇلتتىق باسىمدىقتار دا ەسكەرىلۋى كەرەك», دەگەن ەدى پرەزيدەنت.
سەميناردىڭ سەپتىگى ءتيىپ, تالابىن كۇشەيتكەن كوميسسيا جۇمىسى ساپالى شىعىپ, كوشەگە, ەلگە, جەرگە اتاۋ بەرگەندە ۇلتتىق مۇددە تۇرعىسىنان باعا بەرىلسە مىڭ مارتە يگى بولار ەدى. سوندا عانا ونوماستيكانىڭ احۋالى وڭالادى.
قاراعاندى وبلىسى