س.سەيفۋللين اتىنداعى قاراعاندى وبلىستىق اكادەميالىق قازاق دراما تەاترى ۋفادا وتكەن ۇلتتىق تەاترلاردىڭ حالىقارالىق Vlll فەستيۆالىندە «ۇزدىك ەر ادام ءرولى ءۇشىن» اتالىمىن جانە ارنايى جۇلدەنى ەنشىلەپ قايتتى.
باشقۇرتستان استاناسى ۋفا قالاسىنىڭ 450 جىلدىعىنا ارنالعان ايتۋلى فەستيۆالعا رەسەيدەن 15, قازاقستان جانە قىرعىزستاننان بىرنەشە تەاتر قاتىستى.
فەستيۆالعا جينالعان قاتىسۋشىلار مەن قوناقتاردى باشقۇرتستان رەسپۋبليكاسىنىڭ مادەنيەت ءمينيسترى ءامينا شافيكوۆا قۇتتىقتاپ, ىزگى تىلەگىن ءبىلدىردى.
– جالپى, تەاتر ونەرى الەمگە ورتاق بولسا دا, مۇسىلمان حالىقتارى, ونىڭ ىشىندە قازاق, قىرعىز تەاترلارىنىڭ ورنى بولەك. ولاي دەۋىمە سەبەپ, بۇل ەلدەردىڭ تاريحى ءتىپتى تەرەڭدە. ال تاريحى باي قاۋىمنىڭ قالىڭ كورەرمەنگە ۇسىنارى البەتتە مول ءارى تاعىلىمدى بولارى ءسوزسىز, – دەدى ءامينا شافيكوۆا.
راسىندا, ءار ەلدىڭ ساحنالاعان قويىلىمىنان الار تاعىلىم مول ەدى. ءبىر اپتا ىشىندە قازىلار القاسى مەن ساراپشىلار ءتۇرلى جانرداعى 16 سپەكتاكلدى كورىپ, تالقىلادى. ۋفا قالاسىنىڭ تەاتر ساحنالارىندا كۇنىنە ءۇش بىردەي قويىلىمنان كورسەتىلگەن.
س.سەيفۋللين اتىنداعى قاراعاندى وبلىستىق اكادەميالىق قازاق دراما تەاترى ۇلتتىق تەاترلار بايگەسىنە رەسەيدىڭ ۆاحتانگوۆ تەاترىندا, ەۋروپا تەاترلارىندا رەجيسسەرلىگىمەن شىڭدالعان قازاقتىڭ تالانتتى رەجيسسەر قىزى گۇلناز بالپەيىسوۆا ساحنالاعان مۇحتار اۋەزوۆتىڭ «قاراگوز» تراگەدياسىن الىپ باردى. ۇلتتىق كلاسسيكا ءىنجۋ-مارجانىنىڭ بۇگىنگى كۇنمەن ۇندەستىرىلىپ قويىلعان جاڭا نۇسقاسىن بەلگىلى حالىقارالىق تەاترتانۋشىلار مەن ونەرتانۋشى ساراپشىلار جوعارى باعالادى. اسىرەسە ساكەن تەاترى اكتەرلەرىنىڭ ساحنا شەبەرلىگى, وبراز كەيىپتەۋدەگى وزىندىك وي-ورنەك, ءىس-قيمىل ارەكەتتەرىنە قايران قالدى.
ناتيجەسىندە, فەستيۆالدىڭ نەگىزگى سەگىز اتالىمىنىڭ ءبىرى «ۇزدىك ەر ادام ءرولى ءۇشىن» جۇلدەسى «قاراگوز» قويىلىمىندا نارشا بەينەسىن سومداعان ساكەن تەاترىنىڭ اكتەرى باۋىرجان نۇرماعامبەتوۆكە بەرىلدى.
ال ع.مۇسىرەپوۆ اتىنداعى اكادەميالىق بالالار مەن جاسوسپىرىمدەر تەاترى «قۇلاگەر» قويىلىمى «سپەكتاكلدىڭ ۇزدىك مۋزىكالىق-پلاستيكالىق شەشىمى» اتالىمىن الىپ بەردى.
مۇنىمەن قوسا باشقۇرتستاننىڭ اتاقتى اكتەرلەرى ساحنا شەبەرلىگىن ەرەكشە تانىتقان ارتىستەرگە دە ارنايى جۇلدەلەر تاپسىردى. ساكەن تەاترىنىڭ اكتريساسى انەلى ساعىندىقوۆاعا «قاراگوز» ءرولى ءۇشىن بەرىلدى.
– «تۋعانلىق» فەستيۆالىنىڭ باعدارلاماسى تاجىريبە الماسۋ, بەلگىلى تەاتر تارلاندارىنىڭ شەبەرلىك ساعاتتارى سياقتى تانىمدىق ءىس-شارالارمەن تولىعىپ وتىرعانى دا, فەستيۆالدىڭ اتىنا ساي قاتىسۋشىلاردىڭ تۋىس-تۋعاندىق قارىم-قاتىناستارىن بەكىتە ءتۇستى», – دەيدى تەاتر باسشىسى قۇرمان قالىموۆ.
فەستيۆالدىڭ تاريحى 1991 جىلدان باستاۋ الادى. العاشقىدا تۇركىتىلدەس حالىقتار تەاترلارىنىڭ فەستيۆالى اتالعانىمەن, بۇگىندە ول ۇلتتىق تەاتر فەستيۆالى دەڭگەيىنە كوتەرىلگەن.
قاراعاندى وبلىسى