اۋىل مەديتسيناسىنىڭ ءال-اۋقاتىن ارتتىرۋ ءۇشىن وندا جاس دارىگەرلەردى جونەلتۋ جۇمىستارى وڭىرىمىزدە جۇيەلى جالعاسىپ جاتىر. بىلتىر جاس مەديتسينا ماماندارىنا بەرىلگەن الەۋمەتتىك قولداۋ كولەمى 5 ملن تەڭگە بولسا, بيىل 8,5 ملن تەڭگەگە دەيىن وسەدى. وتكەن جىلى بۇل مۇمكىندىكتى پايدالانعان 61 جاس مامان اۋىلدا ەڭبەك ەتىپ ءجۇر. اۋىلداعى دارىگەر تاپشىلىعىنىڭ ازايىپ كەلە جاتقانىنان الەۋمەتتىك قولداۋدىڭ تيىمدىلىگىن وڭاي اڭعارۋعا بولادى.
بۇقار جىراۋ اۋدانى بوتاقارا كەنتىندە جاس دارىگەرلەر قاجەتتىنىڭ بارلىعىمەن قامتاماسىز ەتىلگەن. اۋداندا «ديپلوممەن – اۋىلعا!» باعدارلاماسى جۇيەلى ىسكە اسىپ تۇر. بۇعان سايكەس, تۇرعىن ءۇي ساتىپ الۋعا شامامەن 9 ملن تەڭگە پايىزسىز نەسيە قاراستىرىلعان. ءۇي العىسى كەلمەگەن جاس ماماندارعا قىزمەتتىك تۇرعىن ءۇيدى دە تاڭداۋ مۇمكىندىگى بار. بوتاقاراداعى اۋداندىق اۋرۋحانانىڭ ءتورت وتباسىعا ارنالعان مەديتسينالىق ءۇيى بار. ورتالىق جىلىتۋ جۇيەسىنە قوسىلعان ۇيلەردە قاجەتتى جيھازبەن, تۇرمىستىق تەحنيكامەن قامتىلعان. ءۇيدىڭ جانىندا بالالار ويىن الاڭى سالىنعان. بۇل جەردەن جاس مەديتسينا ماماندارى تۇرعىن ءۇيدى جالعا الادى.
جالپى, پراكتيكا دارىگەرى احرور ۋسمانوۆ قاراعاندى وبلىسىنا وڭتۇستىك قازاقستان وڭىرىنەن كوشىپ كەلگەن. قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىن ويداعىداي اياقتاپ, ديپلومىن قولىنا ۇستاپ, بوتاقاراعا قونىس اۋدارادى.
– ءبىزدىڭ وقۋ ورنىمىزعا قاراعاندى وبلىسىنان وكىلدەر كەلدى, تۇلەكتەردى جۇمىسقا شاقىردى. ولاردىڭ ۇسىنعان شارتتارى ۇنادى. ويلانىپ, بارۋعا شەشىم قابىلدادىق. بۇگىندە ۋادە ەتىلگەن بارلىق كەلىسىم جۇزەگە استى. ايەلىم دە وسى سالادان, بولاشاق مەدبيكە, – دەيدى ا.ۋسمانوۆ.
اكۋشەر-گينەكولوگ اقبوتا قوجامقۇلوۆا دا رەزيدەنتۋرانى تامامداعاننان سوڭ كۇيەۋىمەن, ەكى بالاسىمەن بىرگە بوتاقاراعا كوشىپ كەلىپ, وسىندا جۇمىسقا ورنالاسقان.
– ارينە, بۇدان باسقا دا تاڭداۋ بولدى, بىرنەشە اۋرۋحانادان جۇمىس ورنى تابىلدى. بارلىق جەردە اكۋشەر-گينەكولوگتەرگە سۇرانىس بار, جالپى, ماماندىعىم سۇرانىسقا يە. مۇندا جاقسى جاعداي ۇسىنىلدى. مەن قالادا قالماعانىما وكىنبەيمىن. بارلىعى ىڭعايلى, باسپاناعا قاتىستى ۋايىم جوق, بارلىق جاعداي جاسالعان. ءبىز مۇندا كەرەگىمىزدى عانا الىپ, كەلە سالدىق. دايىن پاتەرگە قونىستانىپ, كەلەسى كۇنى جۇمىسقا شىقتىق. بالالار بىردەن مەكتەپكە ورنالاستى. ءۇي, جۇمىس, مەكتەپ بارلىعى – جاقىن جەردە. ۇجىمىم دا جاقسى, ءبارى بىردەن ۇنادى. اۋىلدا جۇمىس ىستەپ, كاسىبي تاجىريبە جيناۋعا بولادى, – دەيدى ا.قوجامقۇلوۆا.
بۇقار جىراۋ اۋداندىق اۋرۋحانا ديرەكتورى دانيار قوجاباەۆ بەيىندى ماماندارعا قاجەتتىلىك ءالى دە بار دەيدى. اۋرۋحانادا ماتەريالدىق-تەحنيكالىق بازا جاڭارتىلىپ, زاماناۋي جابدىقتار الىنىپ جاتىر. الايدا كادر جەتىسپەۋشىلىگى بار. بىلتىر وسىنداي باعدارلامانىڭ قولداۋىن سەزىنگەن 8 جاس قىزمەتكەر كەلگەن: 3 اكۋشەر-گينەكولوگ, 2 جالپى تاجىريبەلىك دارىگەر, 3 اكۋشەر. ەندى اۋرۋحاناعا بەيىندى ماماندار اۋاداي قاجەت. ەندوكرينولوگ, ۋلترادىبىستىق زەرتتەۋ مامانى سەكىلدى. وسى ورايدا دانيار قوجاباي ۇلى ەرتەرەكتە مۇنداي باعدارلامالاردىڭ بولماعانىن, قازىرگى جاس دارىگەرلەرگە قولداۋدىڭ ءتۇر-ءتۇرى بارىن اتاپ ءوتتى.
– مەن وسىندا 90-جىلداردىڭ سوڭىندا كەلدىم قالادان. ول ۋاقىتتا مۇنداي باعدارلامالار بولعان جوق. قازىر جاس ماماندار ءۇشىن ازىرلەنگەن الەۋمەتتىك پاكەت وتە جاقسى. بۇل – اۋىلدا جۇمىس ىستەۋگە كەرەمەت ىنتالاندىرۋ, – دەيدى اۋرۋحانا ديرەكتورى.
بىررەتتىك الەۋمەتتىك كومەكتىڭ «ديپلوممەن – اۋىلعا!» باعدارلاماسىنان بولەك ەكەنىن ايتا كەتۋىمىز كەرەك. بۇل – سول كوتەرمەاقىنىڭ ۇستىنە ەنگىزىلگەن قوسىمشا قولداۋ. مەديتسينا سالاسىندا جۇمىس ىستەيتىن مامانداردى قولداۋ, اۋىلداعى مەديتسينانى دامىتۋ, اۋىلداعى كادر تاپشىلىعىن شەشۋ ءۇشىن ازىرلەنگەن باعدارلاما. جىل باسىندا پارلامەنت ءماجىلىسى باعدارلاماعا قاتىستى زاڭ جوباسىن قابىلداعان ەدى.
وسىنداي بايىپتى باعدارلامالارعا سۇيەنە وتىرىپ, جاس مامانداردى اۋىلعا تارتۋ ارقىلى ونداعى دارىگەر تاپشىلىعى جويىلادى. راسىمەن, ديپلومى بار كەز كەلگەن بىلىكتى مامانعا بىرنەشە تاڭداۋ بار. جان-جاقتى الەۋمەتتىك قولداۋ دا مول. جاس دارىگەرگە تەك, جالىنداپ تۇرىپ, ەڭبەك ەتۋ كەرەك.
قاراعاندى وبلىسى