قازاقستان حالقى اسسامبلەياسىنىڭ كەزەكتى سەسسياسىندا قاسىم-جومارت توقاەۆ بەيبىتشىلىكتى, دوستىق پەن ىنتىماقتاستىقتى نىعايتۋداعى ەڭبەگى ءۇشىن ەلىمىزدەگى ەتنومادەني ورتالىقتار وكىلدەرىن ماراپاتتادى. ولاردىڭ قاتارىندا «اسسامبلەيا جاستارى» ۇيىمىنىڭ قاراعاندى ايماعىنداعى باسشىسى الەكساندر ۋرماشوۆ تا بار.
پرەزيدەنت الەكساندرعا قوعامداعى بىرلىكتى, كەلىسىمدى ساقتاپ, ۆولونتەرلىك قىزمەتتى دامىتۋعا قوسقان ۇلەسى مەن بەلسەندى ازاماتتىق ۇستانىمى ءۇشىن العىس جاريالادى.
– مەملەكەت باسشىسىنىڭ العىسى – بارشامىزعا ايتىلعان العىس. بۇل – ورتاق جۇمىستىڭ ناتيجەسى. العىسحاتپەن بىرگە بارىس بەلگىشەسىن يەلەنۋ بارىنە بىردەي بۇيىرا بەرمەيتىنى راس. ۇلكەن ماراپاتتى ەڭبەكپەن اينالىساتىن بارلىق قحا ەرىكتىلەرىنە ايتىلعان العىس رەتىندە قابىلدادىم. ولار بۇگىندە كوپتەگەن الەۋمەتتىك جوباعا بەلسەندى اتسالىسىپ ءجۇر. ماسەلەن, بۇگىندە «جۇرەكتەن – جۇرەككە» اكتسياسىنا ءارتۇرلى جاستاعى ادامداردان تۇراتىن وبلىس اسسامبلەياسىنىڭ 12 مىڭنان استام ەرىكتىسى جينالدى. ءبىز بۇل باعىتتاعى جۇمىستاردى جالعاستىرامىز. الداعى ۋاقىتتا سۋ تاسقىنىنان كەيىن جاعدايى كۇردەلەنگەن قۇرىلىستاردى, م ۇلىكتى قالپىنا كەلتىرىپ, تۇرعىندارعا ۇيلەرىنە ورالۋعا كومەكتەسۋ كەرەك. بەس ايدا بارلىعىنا ۇلگەرۋ مىندەتى تۇر. قىسقا مەرزىمدە ماقساتقا جەتۋ جولىندا بىزگە بىرىگۋ كەرەك, – دەيدى الەكساندر ۋرماشوۆ.
پرەزيدەنتتىڭ قاتىسۋىمەن وتكەن قحا سەسسياسى الەكساندر ۋرماشوۆتىڭ ءبىرىنشى ساپارى ەمەس. جاس بەلسەندى «اسسامبلەيا جاستارى» ۇيىمىنىڭ جىل سايىن وتەتىن سەسسيالارىنا تۇراقتى قاتىسىپ, ايماق جاستارىنىڭ ابىرويىن اسقاقتاتىپ ءجۇر.
پرەزيدەنت اسسامبلەيانىڭ ۆولونتەرلىك قىزمەتى, «جۇرەكتەن – جۇرەككە», «قايىرىمدىلىق كەرۋەنى» سەكىلدى اكتسيالارىن اتاپ ءوتىپ, وعان قاراعاندى وبلىسىنىڭ قحا وكىلدىگى بەلسەندى قاتىساتىنىنا ەرەكشە توقتالدى. سونداي-اق الەكساندر سەكىلدى ۇستانىمىنا بەرىك ازاماتتاردىڭ جۇمىسىنا ريزا ەكەنىن جەتكىزدى.
الەكساندردىڭ ايتۋىنشا, مەملەكەت باسشىسىنىڭ العىسى سەكىلدى مارتەبەلى ماراپاتتاردىڭ بارلىعى وعان ەتنوسارالىق قاتىناستاردى, قوعامداعى بىرلىكتى ساقتاۋعا جانە قحا جاستار قوزعالىسىن دامىتۋعا قوسقان ۇلەسى ءۇشىن بەرىلدى. بەلسەندى قاراعاندىلىق بۇعان دەيىنگى پىكىرتالاس فورماتىنداعى اسسامبلەيا سەسسيالارىندا دا قوعامداعى بىرلىكتى ساقتاۋدا ءوز پىكىرىن ايتۋمەن كوپتەن كوزگە تۇسكەن.
– بىرنەشە جىل بۇرىن سەسسيانى وتكىزۋ فورماتى وزگەردى. ەندى ول بەلگىلى باعىتتارعا جاۋاپتى ورتالىق مەملەكەتتىك ورگانداردىڭ قاتىسۋىمەن پانەلدىك پىكىرتالاس فورماتىندا وتە باستادى. بيىل دا سۋ تاسقىنىنا بايلانىستى سەسسيا فورماتى وزگەرتىلىپ, ونلاين جۇيەگە اۋىستىرىلدى. ق.توقاەۆتىڭ سۋ تاسقىنىنان زارداپ شەككەندەردىڭ وتەماقى الاتىنى تۋرالى سوزدەرى ەرەكشە ەستە قالدى. ولاردى قيىن جاعدايدا قالدىرماۋ وتە ماڭىزدى. مەن سولتۇستىك قازاقستان, اقمولا وبلىستارى, ارقالىق قالاسىندا بولىپ, زارداپ شەككەندەرمەن سويلەستىم, ماسەلەنىڭ اسا اۋقىمدى ەكەنىن باعامدادىم. بۇل تۋرالى باياندامامدا اتاپ ءوتتىم. ول جاقتا گۋمانيتارلىق كومەك قابىلداپ, ەۆابەكەتتەرگە باردىق. ەرىكتىلەردىڭ بىرىگىپ جۇمىس ىستەيتىنىن, وتانداستارىمىزدىڭ قاجەتتى كومەكتى جيناپ, سولتۇستىككە جىبەرىپ جاتقانىن كوردىم. ەل مۇددەسى ءۇشىن اتقارىلىپ جاتقان جۇمىستاردىڭ بەكەر ەمەس ەكەنىنە كوزىم جەتتى, – دەيدى ا.ۋرماشوۆ.
العىس ارقالاعان الەكساندر باسشىلىق ەتەتىن وڭىردەگى «اسسامبلەيا جاستارى» 2022 جىلدىڭ قاڭتارىندا قۇرىلعان. بۇگىندە 6 نەگىزگى باعىتتا جۇمىس اتقارادى. جاستاردى الەۋمەتتىك جاعىنان قولداۋ ماقساتىندا «Social Assembly» جوباسى قولعا الىنعان. مۇندا جاستاردى جۇمىسقا ورنالاستىرۋعا, ءبىلىم الۋلارىنا جاعداي جاساۋعا باسىمدىق بەرىلەدى. ەكىنشى باعىت – «بىرلىك ءتىلى». بۇل باعىتتا اسسامبلەيا قۇرامىنداعى جاستارعا مەملەكەتتىك ءتىلدى ۇيرەتەدى. ياعني جاستارعا قازاق ءتىلىن ءبىلۋ مىندەتتەلگەن. پرەزيدەنت اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا تاريحي جادىگەرلەردىڭ ساقتالۋىنا ايرىقشا توقتالعان ەدى. ق.توقاەۆتىڭ باستاماسىن قولداپ, اسسامبلەيا جاستارى «ەل مۇراسى» دەگەن باعىتتا جۇمىستارىن باستاپ كەتتى. جاستار ارقاداعى تاريحي ورىندار مەن جادىگەرلەردىڭ ساقتالۋىنا ءوز ۇلەستەرىن قوسادى. «تازا ورتا» باعىتىنداعى ەرىكتىلەر وڭىردەگى ەكولوگيانى جاقسارتۋ جانە قورشاعان ورتانى ساقتاۋ ءۇشىن ەڭبەك ەتەدى. جاس بۋىننىڭ پاتريوتتىق رۋحىن كوتەرۋ ماقساتىندا «قاسيەتتى پارىز» جوباسى جۇزەگە اسىرىلىپ جاتىر. جاستاردى مەدياجوبالاردى جاساۋعا ۇيرەتەتىن «Jastar media» جوباسى دا بار.
قاراعاندى وبلىسى