مايقۇدىقتاعى ساياباققا 1 100 اعاش ەگىلدى. بۇعان قوسا بۇل دەمالىس ورنىندا الما, شەتەن, مامىرگۇل, مويىل, قاراعان, قاراعاي, تەرەك, ۇساق جاپىراقتى قاراعاش وسەدى. اتالعان اۋماقتى اباتتاندىرۋعا جەرگىلىكتى تۇرعىندار, مەملەكەتتىك قىزمەتكەرلەر, ەكوەرىكتىلەر, بيزنەس وكىلدەرى قاتىستى.
اعاش ەگۋگە وبلىس اكىمى ەرماعانبەت بولەكپاەۆ تا قاتىستى.
– پرەزيدەنتتىڭ باستاماسىمەن ەلىمىزدە «تازا قازاقستان» ەكولوگيالىق اكتسياسى باستالدى. بۇل ءبىر كۇندىك اكتسيا ەمەس, ۇزاق مەرزىمگە سوزىلماق. وبلىسىمىزدىڭ تۇرعىندارى اۋماقتاردى تازالاۋعا, كوگالداندىرۋعا بەلسەندى قاتىسىپ جاتىر. ايماقتاعى بارلىق اۋدان مەن قالادا اعاش ەگىلىپ جاتىر. مۇنداي جۇمىس ءالى دە جالعاسادى. قاراعاندىنىڭ وزىندە 90 مىڭنان اسا اعاش ەگىلەدى. كيرزاۆود اۋدانىندا ورمان القابىن قالپىنا كەلتىرۋ جوسپارلانعان. بەلسەندىلىك تانىتقاندارىڭىز ءۇشىن بارشاڭىزعا راحمەت, – دەدى ءوڭىر باسشىسى.
يگىلىكتى ىسكە ءاليحان بوكەيحان اۋدانى مەكتەپتەرىنىڭ ديرەكتورلارى دا ءوز ۇلەسىن قوستى.
– كوكتەمنىڭ باستالۋىمەن بىزدە ءاردايىم سەنبىلىك وتەدى. ءبىز مۇنداي ءىس-شارالاردان شەت قالمايمىز. ءبىز ديرەكتورلار كورپۋسىمەن ساياباقتا اعاش ەكتىك. ال اتا-انالار قاۋىمى, مۇعالىمدەر مەن وقۋشىلار مەكتەپ اۋماعىن كوگالداندىرۋمەن اينالىسادى. بارلىق اعاش تامىر جايىپ, قالا تۇرعىندارىن قۋانتادى دەپ ۇمىتتەنەمىز, – دەيدى №85 مەكتەپ ديرەكتورى سالتانات تۇرسىنوۆا.
ۇلكەندەرمەن بىرگە بالالار دا اعاش ەگىپ, سەنبىلىككە قاتىستى.
– ءبىزدىڭ ساياباقتىڭ تازا, جاقسى جانە ادەمى بولعانىن قالايمىن. اعاممەن بىرگە كەلدىم. ۇلكەندەرگە كومەكتەستىم, كوشەتتەر ەككەن شۇڭقىرلارعا توپىراق سالىپ وتىردىم. ءوزىم ءبىر اعاش ەكتىم. مەن ساياباققا ءجيى بارىپ, ونىڭ قالاي ءوسىپ جاتقانىن باقىلاپ تۇرامىن, – دەيدى 7 جاستاعى ارسەني وبەرت.
بيىل ءاليحان بوكەيحان اۋدانىنا 10 مىڭنان اسا ءتۇرلى اعاش ەگىلەدى. بۇعان قوسا قاراعاندىدا اۋەجاي اۋماعىنا 1000 تەرەك ەگىلدى. اكتسياعا 300-دەن اسا ادام قاتىستى. الداعى ۋاقىتتا كوشەتتەرگە كۇتىم جاسالادى.
قاراعاندى وبلىسى