اتىراۋ وبلىسىنا اسكەري كۇشتەر مەن تەحنيكالار تارتىلادى

ول الدىمەن اتىراۋ قالاسىنداعى سۋ تاسقىنىنىڭ بولجامدى ەكىنشى تولقىنىنا دايىندىق جۇمىستارىمەن تانىستى. قازىر باتىس وڭىردە رەسەي فەدەراتسياسىنىڭ يريكلين سۋ قويماسىنان سۋدىڭ كەلۋىنە بايلانىستى, سونداي-اق جايىق وزەنىنە قۇيىلار ساعاداعى ءىرى تاسقىن مەن سۋ دەڭگەيىنىڭ كوتەرىلۋى سالدارىنان جاعداي كۇردەلى كۇيىندە قالىپ وتىر.

باتىس قازاقستان وبلىسىنداعى ءىرى سۋ تاسقىنىنان كەيىن اعىن سۋ وزەن ارناسىمەن اتىراۋ وبلىسىنا قاراي جىلجىپ, كاسپي تەڭىزىنە قۇيادى. سوڭعى تاۋلىكتە بقو اۋماعىنان كەلەتىن سۋدىڭ ەسەبىنەن اتىراۋ قالاسىندا سۋ دەڭگەيى 6 سم-گە كوتەرىلدى.

ۇكىمەت باسشىسى ولجاس بەكتەنوۆ اتىراۋ وبلىسىنا سۋ تاسقىنى جاعدايى تۇراقتانعان وڭىرلەردەن اسكەري قىزمەتشىلەر مەن تەحنيكانى جەدەل جەتكىزىپ, كۇشتەردى ارتتىرۋدى تاپسىردى.

اتىراۋ وبلىسىندا سۋ تاسقىنىنىڭ الدىن الۋعا بايلانىستى دايىندىق جۇمىستارىنىڭ 92 پايىزى ورىندالعان. جۇمىستى ءتيىمدى جۇرگىزۋ ءۇشىن قالا 111 سەكتورعا بولىنگەن. ۇزىندىعى 482 شاقىرىم قورعانىس بوگەتى سالىندى. بوگەت سالۋ اياقتالعان ۋچاسكەلەر تەحنيكالىق قاداعالاۋ ارقىلى تەكسەرىلدى. بۇل جۇمىستارعا تجم, ءىىم, قورعانىس مينيسترلىگى, ۇلتتىق ۇلاننىڭ 6 مىڭعا جۋىق اسكەري قىزمەتشىسى, اكىمدىك قىزمەتكەرلەرى, 2 مىڭعا جۋىق تەحنيكا جۇمىلدىرىلعان. وتكەن سەنبىدە جاعالاۋدى نىعايتۋ سەنبىلىگىنە 9 مىڭعا جۋىق ەرىكتى قاتىستى.

جايىقتان كاسپي تەڭىزىنە سۋ وتكىزۋ قابىلەتىن ارتتىرۋ ءۇشىن وزەن ءتۇبىن تەرەڭدەتۋ ءجۇرىپ جاتىر. سۋ جولىن تازارتۋ, تەرەڭدەتۋ جانە كەڭەيتۋ ماقساتىندا ارنايى تەحنيكالىق فلوتتىق كەمەلەر, گيدراۆليكالىق ەكسكاۆاتورلار تارتىلعان.  

وڭىردەگى سۋارۋ-سۋلاندىرۋ جۇيەسىندە سۋ تاسقىنىنا قارسى جۇمىستار قولعا الىنعان. اتىراۋ وبلىسىنداعى 15 كانالدىڭ 14-ءى جايىق وزەنى بويىندا ورنالاسقان. سوكولوك, نارىن, قاراوزەك, باقساي كانالىمەن تاسقىن سۋدىڭ وزدىگىمەن اعۋىنا مۇمكىندىك بار. وسىعان بايلانىستى سۋدى بۇرۋ ءۇشىن جەر بەدەرىن پايدالانۋ ماقساتىندا ارنالار تازارتىلىپ, كانالدىڭ جيەگى بۇزىلادى. مىسالى, NCOC كومپانياسى قولدانىستاعى قۇرىلىستاردى بولشەكتەپ, ۇزىندىعى 24 كم بولاتىن سوكولوك قوسىمشا اينالما ارناسىن سالۋ ءۇشىن جەردى قازۋ جۇمىستارىن جۇرگىىپ جاتىر. جالپى العاندا, سۋ بۇرۋ ارنالارى تاسقىن سۋدى سەكۋندىنا 139,9 تەكشە مەتر كولەمدە اعىزۋ مۇمكىندىگىنە يە. بارلىق سۋ قابىلداعىشتا سورعى ستانسالارىنىڭ قىزمەتكەرلەرى تاۋلىك بويى كەزەكشىلىك اتقارادى.  

دەگەنمەن, يندەر اۋدانىندا قاۋىپتى اۋماققا جارسۋات جانە قۇرىلىس ەلدى مەكەندەرى كىرەدى. بۇل اۋماقتا 10,5 شاقىرىم بوگەت ورنالاسقان. سونداي-اق سۋ باسۋ قاۋپى بار يندەربور, ەلتاي, ەسبول, كوكتوعاي, بودەنە, ورلىك جانە ىنتىماق اۋىلدارىندا بوگەتتەر كوتەرىلىپ جاتىر. جاعالاۋدى نىعايتۋ جۇمىستارى يندەر, ماحامبەت, يساتاي جانە قۇرمانعازى اۋداندارىندا جالعاستى.

ال جىلىوي اۋدانىندا توتەنشە جاعداي زارداپتارىن جويۋ, ەلەكتر جانە گازبەن جابدىقتاۋدى قالپىنا كەلتىرۋ جالعاسىپ جاتىر. قازىر 201 ۇيدە گاز بەرۋ قالپىنا كەلتىرىلدى, 41 ۇيدە دەزينفەكتسيالىق جۇمىستار اياقتالدى. زارداپ شەككەن تۇرعىندارعا باسپانانى ۋاقىتشا جالعا الۋ ءۇشىن جانە باسقا ماقسات ءۇشىن 100 اەك مولشەرىندە قارجىلىق كومەك كورسەتىلىپ, 3 271 وتباسى تولەم الدى. زالالدى باعالاۋ جانە وتەۋ جونىندەگى كوميسسيا جۇمىسىن جالعاستىرىپ جاتىر.