«تازا قازاقستان» اكتسياسى اياسىندا تۋعان جەرىن تازالاپ جۇرگەن جاستار ۇلكەن ولجاعا كەنەلدى. جاڭاتاس قالاسىنىڭ جاستارى شامامەن 3,5-4 مىڭ جىل بۇرىن تاسقا قاشاپ سالىنعان تاڭبالى جارتاس تاۋىپ الدى. دەرەككە سەنسەك, تاريحي مۇراداعى پەتروگليفتەر قولا ءداۋىرى ادامدارىنىڭ قولتاڭباسى ەكەن.
ەرتە كوكتەمدە جەرگە توسەلگەن قىزىل كىلەمدەي گۇلدەرىمەن كوزدىڭ جاۋىن الاتىن اقتوعاي سايىنىڭ تابيعاتىنا تامسانبايتىندار كەمدە-كەم. قاراتاۋدىڭ قىر گ ۇلى قۇلپىرعان بۇل جەرىن جاسى ەگدە ازاماتتار ىقىلىم زامانداعى ادامداردىڭ مەكەنى دەگەندى ءجيى ايتادى. سولاي ەكەنىنە تاعى ءبىر مارتە كوز جەتتى.
«مۇنداعى ەرەكشە جازۋ كوزگە وتتاي باسىلدى. تاريحشى بولماعان سوڭ, ارنايى ماماندى شاقىرۋعا تۋرا كەلدى. ناتيجەسىندە, جارتاستاعى جازۋ كونە تاريحتان سىر شەرتىپ تۇرعانىن ءبىلىپ, قۋانىپ قالدىق», دەيدى ەرىكتىلەردىڭ ءبىرى اسىلجان پازىلبەكوۆ.
قولا داۋىرىندە عۇمىر كەشكەن ادامدار تانىمىنداعى دۇنيەنى تاسقا ءتۇسىرىپ, ءومىر ءسۇرۋ سالتىن جارتاسقا قاشاپ قالدىرعان ەكەن. جارتاس بەتىندەگى بەينەدەن ءتۇرلى جانۋاردىڭ كەلبەتىن اڭعارعانداي كۇي كەشەسىڭ. اشىق اسپان استىنداعى قۇندىلىقتار جينالعان اۋماقتا جۇزدەن استام پەتروگليف بار دەسەدى.
«قاراتاۋ جوتاسى – ەلىمىزدەگى كيەلى ايماقتاردىڭ ءبىرى رەتىندە بەلگىلى. تاريحي-گەوگرافيالىق ماڭىزى زور وڭىردە مىڭجىلدىقتاردان سىر شەرتەتىن قۇندىلىقتار از ەمەس. ەندى بۇل ماڭايدى عالىمدار ارنايى زەرتتەگەنى ابزال. زەرتتەۋ جۇمىستارىنىڭ ناتيجەسىنە سايكەس ءوڭىردى تۋريستىك باعىتتاردىڭ قاتارىنا قوسۋعا مۇمكىندىك تۋى ىقتيمال», دەيدى تاريحشى-ارحەولوگ ساۋران قاليەۆ.
كونە تاريحتان سىر شەرتكەن ەسكەرتكىشتەر قورى بەرىكقارا مەن قاراتاۋدىڭ تەرىسكەيىندە سيرەك تە بولسا بار. مۇنداعى تاڭبالى تاستاردى عالىمدار ادامزات تاريحى ءۇشىن قاجەتتى عىلىمي جاڭالىققا تەلىپ وتىر.
جامبىل وبلىسى