وڭىردە سۋ دەڭگەيى كۇرت كوتەرىلۋىنەن ەسىل وزەنىنىڭ «حرومزاۆود» شاعىن اۋدانى ماڭىنداعى بوگەتتى تاسقىن سۋ شايىپ كەتىپ, 114 تۇرعىن ءۇي سۋ استىندا قالدى. قازىرگى ۋاقىتتا قارۋلى كۇشتەردىڭ اسكەري قىزمەتشىلەرى توتەنشە جاعدايلار جانە پوليتسيا دەپارتامەنتتەرى ماماندارىمەن بىرلەسىپ, پەتروپاۆل قالاسى ماڭىنداعى بىلعارى زاۋىتى اۋدانىندا ەۆاكۋاتسيالىق جۇمىستار جۇرگىزىپ جاتىر, دەپ حابارلايدى Egemen.kz قورعانىس مينيسترلىگىنە سىلتەمە جاساپ.
سونىمەن قاتار اسكەريلەر قاپتارعا قۇم سالۋ, ىقتيمال سۋ باسۋ ۋچاسكەلەرىنە توسقاۋىلدار قويۋ, بوگەتتەردى نىعايتۋ, گۋمانيتارلىق كومەكتى جەتكىزۋ-ءتۇسىرۋ جۇمىستارىندا ءجۇر. ولار بەسكول, ۇلكەن مالىشكا, بورنيەۆكا, دالموۆكا, تەپليچنىي ەلدى مەكەندەرى تۇرعىندارىن ەۆاكۋاتسيالاۋعا كومەكتەستى. اسكەريلەردىڭ كومەگىمەن قاپشىقتاردى تولتىرۋ, پەتروپاۆل ماڭىنداعى اينالما جولدى نىعايتۋ, زارەچنىي كەنتىندەگى بوگەتتى بەكىتۋ جۇمىستارى جۇرگىزىلىپ, بەسكول, ميچۋرين اۋىلدارىندا قۇم سالىنعان قاپتار توسەلىپ جاتىر.
قۇتقارۋ جۇمىستارىنا «استانا» وڭق, 68665 اسكەري ءبولىمىنىڭ جانە سقو اۋماقتىق قورعانىس بريگاداسىنىڭ اسكەري قىزمەتشىلەرى تارتىلعان.
ۆەدومستۆونىڭ مالىمەتىنشە اپاتپەن كۇرەسكە 27 ناۋرىز بەن 12 ءساۋىر ارالىعىندا قارۋلى كۇشتەردىڭ 4 959 اسكەري قىزمەتشىسى, 170-تەن استام اۆتوموبيل تەحنيكاسى, 11 تىكۇشاق, 5 اسكەري-كولىكتىك ۇشاعى جۇمىلدىرىلعان. 2 724 جەرگىلىكتى تۇرعىن ەۆاكۋاتسيالانىپ, 828 ادام جانە 136 توننادان استام جۇك تاسىمالدانعان. 352 600-دەن استام قاپ قۇم دايىندالىپ, توسەلگەن.