قاراعاندى قالاسىنداعى «جاستار» سپورت كەشەنىندە «RoboLand – 2024» IX حالىقارالىق روبوتتەحنيكا, باعدارلامالاۋ جانە يننوۆاتسيالىق تەحنولوگيالاردىڭ فەستيۆالى ءوتتى. بۇل جولعى وڭىرىمىزدە ءوتىپ جاتقان ونەرتاپقىشتار سايىسىندا رەسەي, ازەربايجان, وزبەكستان, قىرعىزستان ەلىنىڭ ورەندەرى باق سىناستى.
RoboLand – ەلىمىزدەگى العاشقى جانە ءىرى روبوتتەحنيكالىق جوبا. جاس ونەرتاپقىشتاردىڭ ءبىر الاڭدا توعىسىپ, تاجىريبە الماساتىن ورتاسىنا اينالدى. تەحنيكالىق شىعارماشىلىق پەن جاڭا تەحنولوگيالاردىڭ جارىساتىن ەڭ اۋقىمدى فورۋمى. بۇل سايىس 2015 جىلدان بەرى وتكىزىلىپ كەلەدى. 2016 جىلدان باستاپ حالىقارالىق مارتەبەگە يە بولدى. ەڭ العاش 5 اتالىم بويىنشا 30 كوماندا باق سىناسقان.
فەستيۆالدىڭ نەگىزگى ۇيىمداستىرۋشىلارى – وقۋ-اعارتۋ مينيسترلىگى, «Kazdidac» قاۋىمداستىعى, قاراعاندى وبلىسىنىڭ ءبىلىم باسقارماسى, وبلىستىق وقۋ-ادىستەمەلىك ورتالىعى. بۇل جولعى حالىقارالىق بايقاۋعا 678 وقۋشىدان قۇرالعان 348 كوماندا قاتىستى. ياعني جاس تەحنولوگتەردىڭ جارمەڭكەسىندەي جاراسىم تاپتى.
فەستيۆالدىڭ اشىلۋ سالتاناتىنا وبلىس اكىمىنىڭ ورىنباسارى ەرلان قۇسايىن, وبلىستىق ءبىلىم باسقارماسىنىڭ باسشىسى گۇلباقىت سەرىكجانوۆا قاتىسىپ, جاس ورەندەرگە ساتتىلىك تىلەدى. بالالاردىڭ شىعارماشىلىق بەلسەندىلىگىن دامىتۋعا ىقپال ەتۋ, تەحنيكالىق پاندەردى مەڭگەرتۋ, ءبىلىم بەرۋدەگى روبوتتەحنيكانىڭ مۇمكىندىكتەرىن تانىتۋ ماقساتىندا ءوتىپ جاتىر.
– كەيىنگى جىلدارى مەملەكەت باسشىسىنىڭ تىكەلەي قولداۋىمەن ءىت, روبوتتەحنيكا سالاسىنا ءمان بەرىلىپ, قولداۋ كورسەتىلىپ كەلەدى. وسى باعىتتا جۇزدەگەن ءىس-شارا, ۇلكەن جوبالار جۇزەگە اسىرىلىپ وتىر. سولاردىڭ ءبىرى ءارى بىرەگەيى – «RoboLand-2024» بايقاۋى. وسى اۋقىمدى ءىس-شارانىڭ باستاۋىندا تۇرعان ازاماتتارعا ريزاشىلىعىمدى بىلدىرەمىن. وسى ءىس-شاراعا ۋاقىتىن ءبولىپ, ارنايى كەلىپ قاتىسىپ جاتقان بارلىق كومانداعا جانە ۇستازدارعا, وقۋشىلارعا العىسىمدى ايتقىم كەلەدى. كەزىندە الاش ارىسى مىرجاقىپ دۋلات ۇلى «تەڭدىككە جەتسەك تە, جۇرتتىعىمىزدى ساقتاساق تا, دۇنيەدەن سىباعالى ورنىمىزدى الساق تا, ءبىر عانا وقۋدىڭ ارقاسىندا الامىز. جاقسىلىققا باستايتىن جارىق جۇلدىز – وقۋ» دەگەن ەكەن. بۇگىنگىدەي باسەكە مەن ءبىلىمنىڭ زامانىندا بۇل ماسەلە ءوزىنىڭ وزەكتىلىگىن جويعان جوق. سوندىقتان قادىرلى وقۋشىلار, ەلىمىزدىڭ ەرتەڭى وزدەرىڭىز سياقتى ءبىلىمدى, ساۋاتتى, مىقتى ازاماتتار دەپ بىلەمىز, – دەدى وبلىس اكىمىنىڭ ورىنباسارى ەرلان بەيسەمباي ۇلى.
جىل سايىن فەستيۆالدىڭ دارەجەسى ارتىپ, سايكەسىنشە, ونەرتاپقىشتاردىڭ اراسىنداعى باسەكەلەستىكتىڭ كۇشەيىپ كەلە جاتقانى كوڭىل قۋانتادى. ادەتتەگىدەي, تىركەۋ مەن قورىتىندىلاۋدىڭ ەلەكتروندىق جۇيەسى, سونداي-اق تاۋەلسىز كاسىبي تورەشىلەر القاسى وزگەرىسسىز قالادى. جارىستىڭ باس تورەشىسى – حالىقارالىق سپورتتىق جانە ءبىلىم بەرۋ روبوتتەحنيكاسى قاۋىمداستىعىنىڭ پرەزيدەنتى ماكسيم ۆاسيلەۆ.
– بۇل فەستيۆال وسىمەن 9- مارتە وتكىزىلىپ جاتقاندىقتان, ۇلكەن تاجىريبەمىز بار. ويتكەنى مەن بۇل سايىستا ءبىرىنشى رەت باس تورەشى بولىپ تۇرعان جوقپىن. فەستيۆالدا ءىس جۇزىندە وزدەرىنىڭ ءبىلىم بەرۋ ۇدەرىستەرىندە روبوتتاردى پايدالاناتىن وقۋشىلار قاتىسادى. روبوتتاردى وزدەرىنىڭ ۇستازدارىنىڭ كومەگىمەن, نۇسقاۋىمەن جاساپ ۇيرەنگەن بالالار باق سىنايدى. سايىس قورىتىندىلارى سەكۋندومەر قورىتىندىسى مەن بالل بويىنشا شىعارىلادى, – دەيدى باس تورەشى ماكسيم ۆاسيلەۆ.
فينالعا وزا شىققان ونەرتاپقىش ورەندەر 15 سانات بويىنشا باق سىناستى. سونىمەن قاتار «RoboLand Kazakhstan» ساناتىنا وزگەرىستەر ەنگىزىلگەن ەكەن. ياعني قاتىسۋشىلار شىعارماشىلىق ساناتتاعى جاڭا تاقىرىپتار بويىنشا بىلىمدەرىن دوداعا سالدى.
وزبەكستاننان كەلگەن دەلەگاتسيانىڭ جەتەكشىسى ەلدار اپپازوۆ الدىمەن بۇل جەرگە تاجىريبە الۋ ءۇشىن قاتىسامىز دەيدى.
– RoboLand-قا ءبىز ءتورتىنشى رەت قاتىسۋدامىز. بۇل – بەدەلدى الاڭداردىڭ ءبىرى. ءبىزدىڭ ەلىمىزدە مۇنداي دەڭگەيدەگى فەستيۆالدار وتكىزىلمەيدى. كەيىن وزىمىزگە ەنگىزۋ ءۇشىن تاجىريبە جيناپ جاتىرمىز دەسە دە بولادى. بيىل ۇلكەن قۇراممەن كەلدىك. 6 جاستان 18 جاسقا دەيىنگى 25 قاتىسۋشىمىز بار. ولار 12 ساناتتا باق سىنادى. وتكەن جىلى ولجالى قايتقانبىز. جالپى, كوماندالىق ەسەپتە ەكىنشى ورىنعا يە بولدىق, – دەيدى ەلدار اپپازوۆ.
بىشكەكتەن كەلگەن رينات سوۆەتقانوۆ بۇل فەستيۆالعا ءتورتىنشى مارتە قاتىسىپ وتىر. ول RoboLand-تىڭ بىرنەشە دۇركىن جۇلدەگەرى. العاش رەت 2018 جىلى مەكتەپ وقۋشىسى رەتىندە قاتىستى. ال قازىر ي.راززاكوۆ اتىنداعى قىرعىز مەملەكەتتىك تەحنيكالىق ۋنيۆەرسيتەتىنىڭ ءبىرىنشى كۋرسىندا وقيدى. كوماندامەن بىرگە ەكوروبوت قۇرۋدى تالاپ ەتەتىن شىعارماشىلىق ساناتتا ونەر كورسەتتى.
– بۇكىل الەمدە قورشاعان ورتانى قورعاۋ تاقىرىبى وتە وزەكتى. ويتكەنى جاھاندىق جىلىنۋ جانە باسقا دا فاكتورلار ءجۇرىپ جاتىر. ءبىز ەكولوگياعا تەرىس اسەردى ازايتۋعا ىقپال ەتكىمىز كەلەدى. تازا ەنەرگيا ءوندىرۋ ءۇشىن مودۋلدىك جەل گەنەراتورىن جاسادىق, – دەيدى قاتىسۋشى.
«RoboLand» فەستيۆالىنە وقۋشىلار Robotmouse, روبوتتى جيناۋ, تەڭگە الۋ, سونداي-اق جاس ەرەكشەلىكتەرى بويىنشا شىعارماشىلىق باعىتتاعى سايىس, سۋمو Grand, سۋ روبوتتارىنىڭ ءلابيرينتتى باعىتتارى, لابيرينت جانە روبوگەومەتريا بويىنشا قاتىستى.
بۇل جولى دا جاراسىم تاپقان ونەرتاپقىشتار جارمەڭكەسى تارتىستى ءوتتى. جۇلدەگەرلەر العىسحات جانە ەستەلىك سىيلىقتارمەن ماراپاتتالدى. كەلەر جىلى وقۋشىلار اراسىنداعى ءىرى جوباعا ون جىل تولادى. ءوز كەزەگىندە ۇيىمداستىرۋشىلار اۋقىمىن بۇدان ارمەن كەڭەيتىپ, مۇمكىندىكتى مولايتامىز دەدى.
ءبىلىم بەرۋدەگى يننوۆاتسيالىق تاسىلدەردى ەنگىزۋ شەڭبەرىندە وبلىستا 240-تان استام روبوت-تەحنيكا زەرتحانالارى جۇمىس ىستەيدى. مۇنىمەن قوسا 700-گە جۋىق ينفورماتيكا جانە فيزيكا مۇعالىمدەرى «روبوتتەحنيكانى وقىتۋ ادىستەمەسى» كۋرسى بويىنشا بىلىمدەرىن جەتىلدىرگەن بولاتىن.
وتكەن جىلى «مۇراگەر» مامانداندىرىلعان مەكتەپ-ليتسەي-ينتەرناتىنىڭ وقۋشىلارى روبوتتەحنيكادان اقش-تا وتكەن چەمپيوناتتىڭ جەڭىمپازى اتانىپ, ەل تاريحىندا تۇڭعىش رەت Champions Award سىيلىعىنىڭ قولا جۇلدەگەرى اتانعانىن جانە ايتا كەتۋىمىز قاجەت.
قاراعاندى وبلىسى