انا مەن بالا ۇلتتىق ورتالىعىنىڭ ديرەكتورى, بەلگىلى بالالار دارىگەرى بەكباي حايرۋلين 65-كە قاراعان شاعىندا ومىردەن ءوتتى, دەپ حابارلايدى Egemen.kz.
University Medical Center ورتالىعىنىڭ حابارلاۋىنشا, بەكباي حايرۋلين ۇزاققا سوزىلعان دەرتىنەن قايتىس بولدى.
«بۇگىن تاڭەرتەڭ 64 جاسىندا ءبىزدىڭ قىمباتتى دوسىمىز, ارىپتەسىمىز جانە جاي عانا مەيىرىمدى, جاناشىر ادام, پەدياتر, UMC مەديتسينا ورتالىعىنىڭ ديرەكتورى بەكباي ەسليام ۇلى حايرۋلين قايتىس بولدى. ارىپتەستەرى مەن ەمدەلۋشىلەردىڭ قۇرمەتى مەن سۇيىسپەنشىلىگىنە يە بولعان بەكباي ەسليام ۇلى سانالى عۇمىرىن ادامدارعا رياسىز كومەك كورسەتۋگە ارنادى. ءوزىنىڭ ەڭبەك جولىندا دەنساۋلىق ساقتاۋ سالاسىن دامىتۋعا, تالاي ادامنىڭ ءومىرىن ساقتاپ قالۋعا ولشەۋسىز ۇلەس قوستى. UMC ۇجىمى ورنى تولماس قازاعا قايعىرىپ, بەكباي ەسليام ۇلىنىڭ وتباسى مەن جاقىندارىنا كوڭىل ايتادى», دەپ جازدى UMC.
بەكباي حايرۋلين – مەديتسينا عىلىمدارىنىڭ كانديداتى, «ەمدەۋ ءىسى» ماماندىعى بويىنشا دوتسەنت, جوعارى ساناتتى دارىگەر. ا.ۆ.لۋناچارسكي اتىنداعى استراحان مەملەكەتتىك مەديتسينا ينستيتۋتىن پەدياتريا ماماندىعى بويىنشا بىتىرگەن.
2009 جىلدان باستاپ «ۇلتتىق مەديتسينالىق حولدينگ» اق كومپانيالار توبىندا قىزمەت اتقاردى:
«انا مەن بالا ۇلتتىق عىلىمي ورتالىعى» اق ديرەكتورى;- «ۇلتتىق مەديتسينالىق حولدينگ» اق كلينيكالىق قىزمەتتى باسقارۋ جانە باقىلاۋ دەپارتامەنتىنىڭ ديرەكتورى;- «ۇلتتىق مەديتسينالىق حولدينگ» اق باس كلينيكالىق اۋديتورى;- «رەسپۋبليكالىق جەدەل مەديتسينالىق جاردەم عىلىمي ورتالىعى» اق مەديتسينالىق كومەكتى ۇيىمداستىرۋ جانە ساپاسىن باقىلاۋ ءبولىمىنىڭ باسشىسى.
2009 جىلعا دەيىن – دەنساۋلىق ساقتاۋ مينيسترلىگىنىڭ باس پەدياتر دارىگەرى, ەمدەۋ-پروفيلاكتيكا دەپارتامەنتى انا مەن بالا دەنساۋلىعىن قورعاۋ باسقارماسىنىڭ باستىعى, مەديتسينالىق قىزمەت كورسەتۋ سالاسىنداعى باقىلاۋ كوميتەتىنىڭ مەديتسينالىق قىزمەت ساپاسىن باقىلاۋ ءبولىمىنىڭ باستىعى, وبلىستىق دەنساۋلىق ساقتاۋدى دامىتۋدى باقىلاۋ دەپارتامەنتىنىڭ مەڭگەرۋشىسى بولىپ قىزمەت اتقارعان. مەديتسينالىق قىزمەت كورسەتۋ سالاسىنداعى باقىلاۋ كوميتەتىنىڭ استانا قالاسى بويىنشا دەپارتامەنتى ديرەكتورىنىڭ ورىنباسارى بولدى.