مەملەكەت باسشىسى قاسىم-جومارت توقاەۆ ەل دامۋىنىڭ ەڭ ماڭىزدى ون باعىتىنىڭ ىشىندە تۇرعىنداردى باسپانامەن قامتاماسىز ەتۋ ماسەلەسى بار. اسىرەسە وندا جاس مامانداردى جان-جاقتى قولداۋعا قاتىستى دا ماسەلە كوتەرىلگەن. كۇنى كەشە ۇلىس كۇنىنە وراي جاس مەديتسينا ماماندارىنا بۇقار جىراۋ اۋدانىنىڭ دوسكەي اۋلىنان 40 پاتەردىڭ كىلتى بەرىلۋى – سوزىمىزگە دالەل.
وسى ۋاقىتقا دەيىن جاس ماماندارعا ارنالعان باعدارلاما اياسىندا ايماعىمىزدا 600-دەن اسا باسپانا بەرىلگەن. كەيىنگى بەس جىلدىقتىڭ كورسەتكىشى وسىلاي دەيدى. دەنساۋلىق ساقتاۋ باسقارماسى جىل سوڭىنا دەيىن تاعى 100 مەديتسينا مامانىن ۇيمەن قامتيمىز دەپ وتىر. باسپانامەن قامتۋدى جوسپارلاپ وتىرعانىن باسا ايتتى. بۇل جولعى پاتەر كىلتىن العان جاس مامانداردىڭ باسىم بولىگى – №4 ەمحانا, كوپسالالى بالالار اۋرۋحاناسى مەن كوپسالالى №1 اۋرۋحانا دارىگەرلەرى.
– مەرەكە قارساڭىندا ۇلكەن قۋانىش بولىپ جاتىر. كەز كەلگەن وتباسى, ونىڭ ىشىندە جاستار ءۇشىن باسپانانىڭ ورنى ەرەكشە. «اي-حاي مەنىڭ ءوز ءۇيىم, كەڭ سارايداي بوز ءۇيىم» دەپ وسكەن قازاقتىڭ بالاسىمىز عوي. قۋانىش قۇتتى بولسىن! جالپى, مەملەكەت تاراپىنان مەديتسينا سالاسىنىڭ دامۋىنا ۇلكەن باسىمدىق بەرىلىپ جاتىر. باسىمىز اۋىرىپ, بالتىرىمىز سىزداسا ەڭ الدىمەن دارىگەرگە جۇگىنەمىز. اجالدان اراشالاپ قالاتىن, ۇزىلگەن ءۇمىتتى قايتا جالعايتىن – دارىگەرلەر قاۋىمى. سىزدەرگە دەگەن قۇرمەتىمىز شەكسىز, – دەدى وبلىس اكىمىنىڭ ورىنباسارى ەرلان بەيسەمباي ۇلى.
بەيبىتشىلىك كوشەسىنىڭ بويىندا بەس قاباتتى ەكى ءۇي قاتار ورنالاسقان. ونىڭ بىرەۋى – دەنساۋلىق ساقتاۋ سالاسىنىڭ قىزمەتكەرلەرىنىكى, ەكىنشىسى ءبىلىم سالاسىنىڭ ماماندارىنا بەرىلگەن. كەزىندە قاراۋسىز قالعان ءۇي دەمەسەڭىز, ىرگەتاسى – بەرىك, قابىرعالار – ءتۇپ-ءتۇزۋ. ارنايى كوميسسيا قۇرامىنىڭ تەكسەرىسىنەن سوڭ «جارامدى» دەپ تانىلعان.
سودان سوڭ كۇردەلى جوندەۋ جۇمىستارىن جۇرگىزۋگە شەشىم شىعىپ, تەندەر ويناتىلىپ, «گرادسترويسەرۆيس» جشس ۇتىپ الادى. اتالعان مەردىگەر قوس ۇيمەن قوسا, بىلتىر اۋىلداعى مەكتەپكە كۇردەلى جوندەۋ جۇمىستارىن جاساعان. وقۋ جىلىنا دەيىن ويداعىداي اياقتاپ, قولدانىسقا بەرىپتى.
– قاراۋسىز قالعان ۇيگە تولىق كۇردەلى جوندەۋ جۇمىستارىن جۇرگىزىپ, ورتالىق جىلۋ جانە ەلەكتر جەلىسىن تارتتىق. سۋ قۇبىرىن جۇرگىزىپ, ءۇي ىشىنە سۋ كىرگىزدىك. ءۇيدىڭ سىرتىن قاپتاپ, شاتىرىن قايتا جاسادىق. جوندەۋ جۇمىستارى بارىسىندا ەشقانداي قيىندىققا تاپ بولمادىق. ءبىلىم سالاسىندا قىزمەت ىستەيتىن ماماندارعا بەرىلەتىن ءۇيدىڭ جوندەۋ جۇمىستارى دا تولىق اياقتالدى. ەندى سىرتقى جۇمىستارى عانا قالىپ تۇر. الداعى 15 كۇندە اياقتالادى, – دەيدى «گرادسترويسەرۆيس» جشس وكىلى بەرىكجان تولەگەنوۆ.
پاتەر كىلتىن العان №4 ەمحانانىڭ جالپى پراكتيكالىق دارىگەرى جاندوس كارىقۇل – باسپانالى بولعانداردىڭ ىشىندەگى تاجىريبەسى جاعىنان ەڭ جاسى. كەزەگىن كوپ كۇتپەگەن. وقۋىن ءتامامداي سالىسىمەن وسى ەمحاناعا جۇمىسقا قابىلدانعان. وتباسىمەن ەكى جىل ءۇي جالداپ كەلگەن.
– جاستاردى قولداۋ ماقساتىندا قۇرىلعان باعدارلامالار قاتارى ارتا بەرسىن دەگىم كەلەدى. سەبەبى قولىنا ديپلومىن الىپ, جۇمىسقا ەندى كىرگەن جاس مامان ءۇشىن قيىندىق كوپ. اسىرەسە باسپانا – باستى ماسەلە. كەيىن جاس دارىگەرلەرگە ارنالعان باعدارلامانىڭ بارىن ەستىپ, كەزەككە تۇردىم. مىنە, كەزەگىمدى التى اي كۇتىپ, بۇگىن ءۇيلى بولىپ جاتىرمىز. جىل ءبىزدىڭ وتباسىمىزعا وسىنداي كول-كوسىر قۋانىشىمەن كەلىپ جاتىر, – دەگەن رياسىز پەيىلىمەن ءبولىستى جاندوس قۋانىش ۇلى.
باسپانالى بولىپ, باقىتقا كەنەلىپ جاتقانداردىڭ قاتارىندا №4 ەمحانانىڭ ءىى ساناتتى جالپى پراكتيكالىق دارىگەرى شاحرۋح تۋلامەتوۆ تا بار. تۇركىستان وبلىسىنىڭ تۋماسى شاحرۋح وقۋىن تامامداعان سوڭ, ءارى قارايعى ارمانىن قاراعاندىدا جالعاستىرۋدى ۇيعارىپتى. مىنە, ەڭبەك جولىن باستاعالى بەرى جەتى جىل ءوتىپتى.
– 2009 جىلى قاراعاندى مەملەكەتتىك مەديتسينالىق ۋنيۆەرسيتەتىنە وقۋعا ءتۇسىپ, ونى ويىمداعىداي ءتامامداپ, سوسىن وسى جاقتا قالدىم. وسىدان بەس جىل بۇرىن شاڭىراق كوتەردىم. ەكى بالانىڭ اكەسىمىن. بۇعان دەيىن ءۇي جالدادىق. بۇگىن مەرەكە قارساڭىندا ءۇيلى بولىپ, قۋانىشىمىز ەسەلەنىپ جاتىر. پاتەرگە تولىق جوندەۋ جۇمىستارى جاسالىپتى. جاپ-جاڭا جيھازدارى دا بار. ءبىز سەكىلدى جاس ماماندارعا بۇل دا – ءبىر ۇلكەن كومەك, – دەپ ريزاشىلىعىن جەتكىزدى شاحرۋح تۋلامەتوۆ.
بۇل – دوسكەي اۋىلىندا اق تۇيەنىڭ قارنى جارىلعان كۇن. اۋىل جۇرتى دا قۇشاقتارىن ايقارا اشقان, ەل قوسىلدى دەپ. ەندى جاس مامانداردىڭ شاعىن اۋدانى بار. ءبىر-اق كۇندە كورشى بولىپ شىعا كەلگەن جاس ماماندار ەندى كەزەك-كەزەگىمەن قونىستويىن دۇبىرلەتەدى. وسىلايشا, جاڭا جىل جاستارعا ايتارلىقتاي جاقسىلىعىمەن كەلدى.
قاراعاندى وبلىسى