اۋىلعا قامقور ازامات

نۇرلان ايتمۇحامبەت ۇلى – بۇگىندە بەلدى كاسىپكەر. «Abadan» سپورت كلۋ­بى­نىڭ باسشىسى. قارا­عان­دى قالا­سىندا «با­راكيات» مەيرامحاناسى, قۇرىلىس سا­لا­سىنا ما­ماندانعان سەرىكتەستىگى دە بار.

اتىمتاي ازامات اۋىلىنان ايانىپ قالعان ەمەس. قارقارالى اۋدا­نىنىڭ قويان­­دى اۋىلىندا ءجۇز ادام سىياتىن مە­شىت تۇرعىزىپ, حا­لىق يگىلىگىنە ۇسىن­عالى بىرنەشە جىل بولدى. اۋىلدىڭ بالالا­رىنا ارناپ شاعىن فۋتبول الاڭى مەن «بو­لاشاق» بالالار ويىن الاڭىن تارتۋ ەتتى.

جەتىمىن جىلاتپاعان ەلمىز عوي. وسى­نى قاتاڭ قاعيدات ساناعان ول قوياندى اۋى­لىندا ون بولمەلى, تۇر­مىستىق قاجەت­تىلىكتەرىمەن قامتا­ماسىز ەتىلگەن باسپانا سالىپ, بالالار ۇيىنەن سەگىز بالا اسىراپ الدى.

– جىل سايىن «اۋىل كۇنىن» وتكىزۋدى داستۇرگە اينالدىردىق. قازاقتىڭ اتىن بۇكىل الەمگە تانىتقان قوياندى بۇدان دا زور قۇرمەتكە لايىق دەپ ويلايمىن, – دەيدى نۇرلاننىڭ ءوزى.

ول وسى شارۋانىڭ ءبارىن قارا­عاندىدا ءجۇرىپ-اق تىندىرىپ ءجۇر.

– بۇل شارۋالاردى ەلدەن ماقتاۋ ەستۋ ءۇشىن جاسامايمىن. بار ماقساتىم – تۋعان ەلىمە از دا بولسا, پايدامدى تيگىزۋ. بالا­لاردىڭ تاربيەسى مەن كۇنكورىسىنە, وقۋعا تۇسۋىنە, وتباسىن قۇرۋىنا, باس­پانالى بولۋىنا قولىمنان كەلگەنشە كومەك كورسەتەمىن. ەڭ باستىسى – تۋعان اۋىلىمنىڭ ىرگەسى سوگىلمەي, بەرەكەسى ارتا بەرسە بولعانى, – دەيدى ن.قالتاەۆ.

بۇعان قوسا كاسىپكەر قازاق حاندى­عىنىڭ 550 جىلدىق تويىنا ورايلاستىرىپ, 130 ءتۇپ الما اعاشىن وتىرعىزىپ, باۋ-باقشانىڭ قاق ورتاسىنان سۋبۇرقاق ورناتىپ بەرگەن.

نۇرلان ايتمۇحامبەت­ ۇلى­نىڭ ەسىم-سويىن ەل-جۇرت «Abadan» كلۋبىنىڭ نەگىزىن قالاۋشى رەتىندە جاقسى تانيدى. «قازاق قاسقىر اۋەگىنىڭ كوسەمىن ابادان دەيدى ەكەن. كوكجال سەكىلدى توپ­تىڭ الدىندا بولايىق دەپ وسى اتاۋ­دى تاڭدادىق», دەيدى. بۇل – جەكپە-جەك سپورتىنىڭ جات­تىعۋ زالى. كلۋبتا UFC جەكپە-جەگىن وتكىزەتىن شارشى الاڭ, جاتتىعۋعا قاجەتتى سپورت جاب­دىقتا­رىنىڭ ءتۇر-ءتۇرى بار. كاسىپ­كەر وسى ارقىلى قازاق بالا­لارىنان بولاشاق چەمپيونداردى دايارلاپ ءجۇر.

اۋىلعا قامقورلىق – ەلگە قام­قور­لىق. ۇلتقا وسىنداي قىز­مەت ەتىپ جۇر­گەن قالتاەۆتىڭ بۇل ءبىز بىلەتىن قايى­رىمدى ءىسى عانا.

قاراعاندى وبلىسى