كۇن مەن ءتۇن تەڭەلىپ, جەر انا جاڭاراتىن مەرەكەگە وراي قاراعاندىداعى «VOGUE» مەيرامحاناسىندا جىلداعى ءداستۇر بويىنشا «دالا دۋمان» مەرەكەسى ءوتتى.
ۇلتتىق قۇندىلىق ۇلىقتالعان دۋماندى كەشتى وتكىزۋگە «قازاق انالارى. داستۇرگە جول» قوعامدىق بىرلەستىگى جانە «حانتالاپاي» ورتالىعىنىڭ قىزمەتكەرلەرى ۇيىتقى بولدى. اق داستارقان باسىنا جايعاسقان مەيماننىڭ قولىنا سۋ قۇيۋ سىندى عۇرىپتان باستاۋ الدى كورىكتى كەش. وڭ قاناتقا ۇيىمداستىرىلعان كورمە دومبىرا, قوبىز, شاڭقوبىز, سىبىزعى سەكىلدى قاسيەتتى اسپاپتار مەن كادەسىيمەن بەزەندىرىلگەن.
الاشتىڭ ەستى اندەرى شىرقالدى, داۋلەسكەر كۇيشىلەر دومبىرانىڭ قوس شەگىنەن شەرتپە, توكپە كۇي بەبەۋلەتتى. بەس مىڭ جىلدان بەرى قارايعى تاعىلىمدى سالت-ءداستۇر مەن بىرقاتار كادەلى كورىنىس ساحنالاندى.
رۋحاني كەشتىڭ تىزگىنىن ۇستاعان ارقانىڭ ايتۋلى اساباسى ايتۋعان ىرىسالدين اتالى سوزبەن, اجارلى ناقىشپەن ءىس-شارانىڭ شىرايىن كىرگىزدى. ەلوردانىڭ ىرگەسىندەگى قوسشى شاھارىنان كەلگەن ەتنوانسامبل ونەرىمەن حالىقتى ءتانتى ەتىپ, بەۋ دەگىزدى.
وبلىس اكىمىنىڭ ورىنباسارى ەرلان قۇسايىن, «Amanat» پارتياسى جەرگىلىكتى فيليالىنىڭ توراعاسى بەكزات التىنبەكوۆ باستاعان ەل ازاماتتارى قالىڭ جۇرتشىلىقتى ۇلىس كۇنىمەن قۇتتىقتادى. ءتول مادەنيەتىمىزدى وركەندەتىپ جۇرگەن كەشتىڭ ۇيىمداستىرۋ القاسىنا, مەيرامحانا قوجايىنى دانيار قالىمبەت پەن مادەنيەت جاناشىرى ەلميرا سايلاۋقىزىنا العاۋسىز العىستارىن ءبىلدىردى.
مەيرامحانا تورىندە كەزەكتەسە ونەر كورسەتكەن مىڭ بۇرالعان بيشىلەر, داۋسى التى قىردان ءارى اساتىن انشىلەر كەشتىڭ شىرايىن كىرگىزدى. «دالا دۋمان» ەتنوفولكلورلىق سازدى كەشى تەك بىرىڭعاي مۋزىكالىق قويىلىم عانا ەمەس, كوپتەن قاۋىشپاعان جاندار ەمەن-جارقىن جۇزدەسىپ, رۋحاني بايىپ قايتاتىن ءداستۇرلى مەرەكەگە اينالعانداي.
بۇل كەش ءتول تاريحىمىزدى, ۇلتتىق بولمىسىمىزدى ايشىقتاي ءتۇستى.
قاراعاندى وبلىسى