كوكتەمنىڭ شۋاقتى مەرەكەسى دە ءوزىنىڭ ءسان-سالتاناتىمەن كەلىپ قالدى. نازىكجاندىلاردىڭ ءبىر مەزگىل قۇشاعى گۇلگە, جانى نۇرعا بولەنەدى. كۇنى كەشە ايماق باسشىسى ەرماعانبەت بولەكپاەۆ سان سالادا ەڭبەك ەتىپ جۇرگەن ايەلدەر قاۋىمىمەن كەزدەسىپ, اشىق اڭگىمە ءوربىتتى. حالىقارالىق ايەلدەر كۇنىنە وراي وتكەن مەرەكەلىك جيىندا وبلىس اكىمى كوپبالالى انالارعا «التىن القا», «كۇمىس القا» تاقتى.
شۋاقتى مەرەكەنىڭ قۇرمەتىنە وراي پرەزيدەنت جارلىعىمەن ايماعىمىزداعى 8 كوپبالالى انا «التىن القا», 39 انا «كۇمىس القا» يەگەرى اتانىپ وتىر. بۇل باسقوسۋدا ايماق باسشىسىنىڭ قولىنان «التىن القانى» الۋ باقىتى زاكيرا مۇقىمبەكقىزى مەن عاليا قاشاۋباەۆاعا بۇيىردى. ال «كۇمىس القامەن» سۆەتلانا ءجۇمادىلوۆا مەن ۆەنەرا كەنتاەۆا ماراپاتتالدى.
ايماق باسشىسى پرەزيدەنت جولداعان قۇتتىقتاۋحاتتى فيلولوگيا عىلىمدارىنىڭ دوكتورى, پروفەسسور, قوعام قايراتكەرى نۇرسۇلۋ بۋكەتوۆاعا تابىستادى. ە.بوكەتوۆ اتىنداعى قاراعاندى ۋنيۆەرسيتەتىنىڭ ساياساتتانۋ جانە الەۋمەتتانۋ كافەدراسىنىڭ اعا وقىتۋشىسى, الەۋمەتتانۋ ماگيسترى, ايەلدەر ىستەرى جانە وتباسىلىق-دەموگرافيالىق ساياسات جونىندەگى وبلىستىق كوميسسيانىڭ مۇشەسى تاتيانا رەزۆۋشكينانى ۇلتتىق كوميسسيانىڭ العىسحاتىمەن ماراپاتتادى.
– انالاردىڭ مەرەكەسى – ومىردەگى ەڭ ىزگى مەرەكەنىڭ ءبىرى. سەبەبى انا – ءاربىر ادام ءۇشىن ەڭ اياۋلى, ەڭ ارداقتى جان. دۇنيەدە انادان قىمبات, انادان اسىل جان جوق. بار جىلۋىن بالا تاربيەسىنە ارنايتىن دا, وتباسىلىق ءداستۇردى ساقتايتىن دا اياۋلى انالارىمىز بەن اسىل اجەلەرىمىز. سوندىقتان انالار مەرەكەسى – ءبىزدىڭ بارلىعىمىز ۇلكەن قۋانىشپەن قارسى الاتىن جاقسى ءبىر مەرەكەمىز. بولاشاعىن ويلاعان ەل, ەڭ الدىمەن, ايەلدەرگە قۇرمەت كورسەتەدى. بۇل – ءومىردىڭ بۇلجىماس زاڭى, – دەدى ءوزىنىڭ قۇتتىقتاۋ سوزىندە ە.قابدۋلا ۇلى.
مەملەكەتتىك ماراپاتتاردى تابىستاعان سوڭ اكىم جيىنعا قاتىسۋشى جاندارمەن اشىق اڭگىمەلەستى. پرەزيدەنتتىڭ قۇتتىقتاۋىن العان پروفەسسور نۇرسۇلۋ بۋكەتوۆا العىس ءبىلدىرىپ, ايەلدەردىڭ قوعامداعى ورنى مەن بەدەلى جونىندە ءسوز قوزعاي ءوتتى.
بالقاش قالاسى انالار كەڭەسىنىڭ توراعاسى الميرا مۋسينا بالا تاربيەسى تۋرالى ايتسا, بەس بالانىڭ اناسى, ونىڭ ىشىندە ءۇش قىزى سپورت شەبەرلىگىنە ۇمىتكەر ماريا وسپانوۆا وتباسى قۇندىلىعى جونىندە اڭگىمەلەدى.
«Batyl Jurek» قوعامدىق قورىنىڭ ساران قالاسىنداعى فيليالىنىڭ باسشىسى بيبىگۇل ستەتسكو قوردىڭ اتقارىپ جاتقان جۇمىستارىنا توقتالدى.
قازاقستاننىڭ ءجۇزۋ سپورتى بويىنشا ەڭبەك سىڭىرگەن جاتتىقتىرۋشى ەۆگەنيا ۆلاديميروۆنا قازىرگى ۋاقىتتا پاراسپورتشىلاردى دايىنداپ جاتىر. بىلتىر ازيا ويىنىنان جۇلدەلى ورىن العان رومان پوتاپوۆتى جاتتىقتىرعان. ءجۇزۋ سپورتىنا كورسەتىلىپ جۇرگەن مەملەكەت قامقورلىعىنا ريزاشىلىعىن جەتكىزدى.
قارقارالىداعى «ارمان» شارۋا قوجالىعىنىڭ باسشىسى, كاسىپكەر ناتاليا الەكساندروۆنا دا جيىندا ءسوز الدى. مەملەكەتتىك تىلدە ەركىن كوسىلگەن بەس بالانىڭ اناسى اۋىل تىرشىلىگىندەگى انانىڭ اتقارار ءرولىن ءسوز ەتتى.
ەلۋ جىلعا جۋىق وساكاروۆ اۋداندىق اۋرۋحاناسىندا دەرماتو-ۆەنەرولوگيالىق كابينەتىنىڭ مەدبيكەسى بولىپ قىزمەت ەتكەن رايسا يلۆانيدي اۋىل مەديتسيناسىنا ايرىقشا نازار اۋدارىلعانىن ايتىپ, العىسىن ءبىلدىردى. قاراعاندى ۋنيۆەرسيتەتى مورفولوگيا كافەدراسىنىڭ پروفەسسورى مايدا تۇسىپبەكوۆا دا مەديتسينا توڭىرەگىندە ءسوز قوزعادى.
«تازالىق ەكسپەرت» جشس قىزمەتكەرى ديدار ابدىكارىموۆا دا مەرەكەلىك كەزدەسۋگە شاقىرتۋ العانىنا العىسىن ءبىلدىرىپ, «كوشە تازالىعىمەن قوعام بولىپ كۇرەسۋىمىز قاجەت», دەدى.
شەت اۋدانى جوعارعى قايراقتىعا قاراستى مايباس قىستاعىندا جولداسىنا قولعابىس ەتىپ, تراكتور ايداپ, ءشوپ شاباتىن ارايلىم بايداشوۆا شارۋاشىلىقتارىنىڭ الداعى جوسپارلارىن ايتىپ بەردى.
مەرەكەلىك كەزدەسۋ سوڭىندا وساكاروۆ اۋداندىق مادەني-دەمالىس ورتالىعىنىڭ مۋزىكالىق جەتەكشىسى انارگۇل ناۋرىزحان «ابزال انا» ءانىن شىرقادى. جانى جادىراعان مەيماندار كەنشىلەر سارايىندا وتەتىن مەرەكەلىك كونتسەرتكە جول تارتتى.