وبلىس اكىمدىگى مەن پرەزيدەنت ءىس باسقارماسىنىڭ مەديتسينالىق ورتالىعى ءوزارا ىنتىماقتاستىق تۋرالى مەموراندۋمعا قول قويدى. استانادان ارنايى كەلگەن بىلىكتى ماماندار ءۇش كۇن بويى جەرگىلىكتى دارىگەرلەرگە شەبەرلىك ساباقتارى مەن سەمينارلار وتكىزەدى. بۇعان قوسا قاراعاندىلىق دارىگەرلەرمەن بىرگە 20 شاقتى جوعارى تەحنولوگيالىق وپەراتسيا جاساۋدى جوسپارلاپ وتىر.
ونكولوگتەر, نەيروحيرۋرگتەر مەن كارديوحيرۋرگتەر, ەندوكرينولوگ, اللەرگولوگتەر مەن گەنەتيكتەر جانە باسقا دا باعىتتاعى 30-عا جۋىق دارىگەر ەكى كۇن بويى قاراعاندىلىق ناۋقاستارعا مەديتسينالىق كومەك كورسەتەدى.
ىنتىماقتاستىق كەلىسىمنىڭ ماقساتى – ايماعىمىزداعى مەديتسينالىق قىزمەت ساپاسىن جاقسارتىپ, اق جەلەڭدى جانداردىڭ كاسىبي بىلىكتىلىگىن كوتەرۋ. ءوڭىر باسشىسى ەرماعانبەت بولەكپاەۆ بۇل مەموراندۋمنىڭ ءوڭىر ءۇشىن ماڭىزدى ەكەنىن اتاپ ءوتتى.
– پرەزيدەنت ءىس باسقارماسىنىڭ مەديتسينالىق ورتالىعى – دەنساۋلىق ساقتاۋ سالاسىنداعى كوشباسشى قۇرىلىمنىڭ ءبىرى. ءبىز دارىگەرلەرىمىزدىڭ كاسىبيلىگىن بىرلەسىپ ارتتىرامىز. جەمىستى ىنتىماقتاستىققا جانە العا قويىلعان ماقساتتار مەن مىندەتتەرگە قول جەتكىزۋگە ۇمىتتەنەمىز, – دەدى وبلىس اكىمى.
اتالعان ورتالىق باسشىسى الەكسەي تسوي استاناعا قاراعاندىدان كەلگەن, قاراعاندى مەديتسينا ۋنيۆەرسيتەتىندە ءبىلىم العان مامانداردىڭ كوپتىگىن ايتادى.
– الداعى ۋاقىتتا بىرلەسىپ جول كارتاسىن ازىرلەۋ مىندەتى تۇر. ءبىز مەديتسينا قىزمەتكەرلەرىن زاماناۋي وقىتۋ, مەنەدجمەنت ستاندارتتارىن ەنگىزۋ, سونداي-اق پراكتيكالىق دەنساۋلىق ساقتاۋ, العاشقى مەديتسينالىق-سانيتارلىق كومەك ماسەلەلەرىن بىرگە پىسىقتايمىز. پاتسيەنتتەردىڭ مەديتسينالىق كومەكتى باسقا جەرگە بارماي, وبلىستىڭ وزىندە ەمدەلۋىن قامتاماسىز ەتۋ – نەگىزگى مىندەتىمىز. بۇل ءۇشىن ايماقتا بار جاعداي جاسالعان, زاماناۋي جابدىقتار ورناتىلعان. اكىمدىك دەنساۋلىق ساقتاۋدى جاڭعىرتۋ جۇمىسىمەن جۇيەلى تۇردە اينالىسىپ كەلەدى. دارىگەرلەردىڭ كاسىبيلىگى دە – جوعارى. تەك بۇرىن جاسالماعان بەلگىلى ءبىر باعىتتار بويىنشا وقىتۋ, ۇيرەتۋ كەرەك. قاراعاندىلىق ماماندار تەز يگەرىپ كەتەدى دەپ ويلايمىن. ەڭ باستىسى – ماماندار اراسىندا تىعىز دەڭگەيدە بايلانىس ورناتۋ. جاعدايى اۋىر ناۋقاستاردى بىزگە جىبەرۋگە بولادى. ءبىزدىڭ مەديتسينالىق ورتالىق ءمامس جۇيەسى ارقىلى تەگىن كومەك كورسەتەدى. دەگەنمەن ناۋقاستىڭ ءوز وڭىرىندە ەمدەلۋىنە, بۇل ءۇشىن جەرگىلىكتى جەردە بارلىق جاعدايدى جاساۋعا باسىمدىق بەرىلەدى, – دەيدى ا.تسوي.
مەديتسينالىق ورتالىق ماماندارىنىڭ قاراعاندىعا كەلەتىنى ەكى-ءۇش اپتا بۇرىن حابارلانعان.
– ورتالىق ماماندارىنا جاعدايى اۋىر ناۋقاستار تۋرالى دەرەكتەر الدىن الا ۇسىنىلدى. سوعان سايكەس ءتيىستى باعىتتاعى ماماندار كەلدى. الداعى ءبىر-ەكى كۇن ماماندار ءۇشىن دە, ناۋقاستار ءۇشىن دە ناتيجەلى بولادى دەپ ويلايمىن, – دەيدى وبلىستىق دەنساۋلىق ساقتاۋ باسقارماسىنىڭ باسشىسى بيبىگۇل تولەگەنوۆا.
مەموراندۋمعا قول قويعاننان سوڭ ەلوردالىق قوناقتار پروفەسسور ح.ماقاجانوۆ اتىنداعى كوپبەيىندى اۋرۋحاناعا بارىپ, بولىمشەلەردى ارالاپ, كلينيكا جۇمىسىمەن تانىسىپ شىقتى.
قاراعاندى وبلىسى