ۆيلەن بوريسوۆيچ مولوتوۆ-لۋچانسكي. بۇل ەسىم ەلگە ەرتەدەن بەلگىلى. ءىى دارەجەلى «دوستىق» وردەنىنىڭ كاۆالەرى. «قازاقستان رەسپۋبليكاسىنىڭ دەنساۋلىق ساقتاۋ ءىسىنىڭ ۇزدىگى» توسبەلگىسىنىڭ يەگەرى. مەديتسينا عىلىمدارىنىڭ دوكتورى, پروفەسسور. كەيىپكەرىمىز ەل مەن جەردى كيە كورەدى. قازاققا دەگەن قۇرمەتى جىل وتكەن سايىن ارتپاسا, ەش كەمىگەن ەمەس.
ول بۇگىندە – وبلىستىق قازاقستان حالقى اسسامبلەياسىنىڭ عىلىمي-ساراپتامالىق توبىنىڭ جەتەكشىسى, «قاراعاندى ەۆرەي مادەنيەتى ورتالىعى» قوعامدىق بىرلەستىگىنىڭ توراعاسى, قازاقستان حالقى اسسامبلەياسىنىڭ مۇشەسى. بالقاشتىڭ باۋىرىندا دۇنيە ديدارىن اشقانىنا دا بىلتىر 70 جىل بولدى. سانالى عۇمىرىن ەل دامۋىنا, بىرلىك پەن بەيبىتشىلىكتىڭ سالتانات قۇرۋىنا ارناعان جان.
«مەنىڭ كىشى وتانىم – بالقاش قالاسى. ايگىلى كوكشە تەڭىزدىڭ جاعاسى. ءالى ەسىمدە 8 سىنىپ وقىپ جۇرگەندە ەسسە جازعانىم. سوندا جۋساننىڭ ءيىسىن, جازىق دالا مەن كولدىڭ تولقىنى تۋرالى تولعانىپ جازعانمىن. قازاق جەرىنە دەگەن ىڭكارىلىگىم سول قالپى ءالى. كيەۆ دالاسىندا ەكى جىل اسكەري بورىشىمدى وتەگەندە ەل مەن جەرىمدى قاتتى ساعىندىم. بۇل وتكەن عاسىردىڭ 70-ءشى جىلدارى ەدى. 1937 جىلى مەنىڭ اجەم قاراعاندىداعى دولينكادا جازاسىن وتەگەن سوڭ 1952 جىلى انام ەكەۋى قايتا قاۋىشتى. وسىلايشا, مەن بالقاش قالاسىنىڭ بەيبىت اسپانىندا دۇنيەگە كەلدىم. اجەم ارى ءۇشىن ءومىر سۇرگەن, ادامداردىڭ الا ءجىبىن اتتاماعان ءجىبى ءتۇزۋ جان ەدى. ال انام قازاقستاندى ءومىرىنىڭ سوڭىنا دەيىن قازاقستاندى ءسۇيىپ ءوتتى. اجەمنىڭ ء«بىز بۇل ەلدىڭ حالقىنان مەيىرىم مەن شاپاعاتتى كوپ كوردىك دەيتىن», دەپ وتكەنىنە كوز جۇگىرتە ءوتتى ۆ.بوريسوۆيچ.
كەيىپكەرىمىز «بىرلىگى بوساڭسىعان مەملەكەتتىڭ بەرەكەسى دە كەتەدى» دەگەن ۇستانىمدا.
– ۇلتتى ۇيىستىرا ءبىلۋ – ۇلكەن ەرلىك! ال وعان باستايتىن – وتانداستاردىڭ الداعى كۇنگە دەگەن سەنىمى. قايدان ءبىلىپ وتىر دەمەڭىز. از عۇمىر جاسادىم دەپ تە ايتا المايمىن. عاسىر سوڭىنداعى تارشىلىق تەپەرىشىن كورگەن بىرەۋ بولسا, سول مەنمىن! مەن عانا ەمەس, شاڭىراعى وپىرىلىپ ورتاسىنا تۇسكەن كسرو حالقى تۇگەلدەي كورگەن بولار. كوشكەنى كوشىپ, كەتكەنى كەتىپ جاتتى. بىراق ەرتەڭگى جارقىن بولاشاققا دەگەن سەنىم جۇرەگىمدە ءبىر ساتكە بولسىن سونگەن ەمەس. تالاپتاندىم, ەڭبەكتەندىم. بىرنەشە قىزمەتتى قاتار اتقاردىم. وتانداستارىمىز ءتۇرى مەن تۇسىنە, ۇلتى مەن ءدىني نانىم-سەنىمىنە قاراماستان ءبىر شاڭىراق استىنا بىرىكتى. ەلىمنىڭ كوپشىلدىگىنە ەرەكشە ريزامىن جانە العىسىمدى بىلدىرگىم كەلەدى, – دەيدى ول.
ۆيلەن بوريسوۆيچ تەراپيا سالاسىندا عانا ەمەس, ونىمەن قاتىستى بارلىق عىلىمدى تۇتاس مەڭگەرىپ, الدىنان وتكەن ناۋققاستىڭ رياسىز العىسىن العان ادام. قاراعاندى كلينيكالارىندا پروفەسسورمەن شاعىن جانە ۇلكەن قۇرامدا جۇمىس ىستەمەگەن, تىم كۇردەلى جاعدايلاردا, دارىگەرلىك كونسيليۋمداردا گاۋحارعا بەرگىسىز كەڭەسىن الماعان ارىپتەستەرى جوق شىعار. مۇنىمەن قوسا, 150-گە جۋىق عىلىمي ەڭبەك الىس-جاقىن شەتەلدەردىڭ مەرزىمدى باسىلىمىندا جارىق كورگەنىن دە اتاپ وتكەنىمىز ءجون.