قاراعاندى وبلىسى شاحتينسك قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتى ءىىم ۇلتتىق ۇلانىنىڭ 6505 اسكەري ءبولىمىنىڭ اسكەري قىزمەتشىسىنە قاتىستى اكىمشىلىك قۇقىق بۇزۋشىلىق تۋرالى ءىستى قاراۋ بويىنشا كوشپەلى اشىق سوت وتىرىسىن وتكىزدى.
سوت وتىرىسىندا ت. ەسىمدى ساربازدىڭ ەلىمىزدىڭ قارۋلى كۇشتەرىنىڭ, باسقا دا اسكەرلەرى مەن اسكەري قۇرىلىمدارىنىڭ ىشكى قىزمەتىنىڭ جارعىسىن جانە وتانعا, حالقىنا جانقيارلىقپەن قىزمەت ەتۋگە انت بەرگەننەن كەيىن ءوز كومانديرىنىڭ بۇيرىعىن ورىنداۋدان اشىق جانە ايقىن باس تارتقانى, ياعني قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 652-بابىنىڭ 6-بولىگىندە كوزدەلگەن قۇقىق بۇزۋشىلىق جاساعانى انىقتالدى.
بۇل نورمانىڭ سانكتسياسى بالامالى جازالاۋ شارالارىن – ايىپپۇل نەمەسە قاماۋعا الۋدى كوزدەيدى, سوت ەكىنشى – قاماۋعا الۋ جانە گاۋپتۆاحتاعا وتىرعىزۋ شاراسىن قولدانۋدى ۇيعاردى.
شاحتينسك قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىنىڭ توراعاسى جامبىل كارىمباەۆتىڭ ايتۋىنشا, سوت ت-نىڭ قىزمەت اتقارۋ ورنى اۋىر جانە اسا اۋىر قىلمىستار جاساعان قازاقستاننىڭ بارلىق وڭىرىنەن سوتتالعاندار جازاسىن وتەپ جاتقان تۇزەۋ مەكەمەسى ەكەنىن ەسكەرگەن.
سوت ۇدەرىسى باسقالارعا ۇلگى بولۋى ءۇشىن اسكەري ءبولىمنىڭ ءماجىلىس زالىندا ءبولىم باسشىلىعى جانە جەكە قۇرامنىڭ قاتىسۋىمەن ءوتتى.